I tō taime Ha’ape’ape’ara’a
Tē hōro’a nei Te Ha’api’ira’a Tumu ’e te mau Fafaura’a i te tauturu ’ia ’ore ana’e te mau mea e tupu mai tā ’oe e hina’aro.
Fa’ahōho’ara’a nā Luciana Abrão
’Ua māuruuru ’ore a’ena ānei ’oe ? ’Oia vau. ’Ua māururu ’ore au i te hepetoma i ma’iri a’enei. E ’ere i te ha’avare—ma te roimata, pauroa.
’Ua parau te Fatu ia Iosepha Semita, « ’a fa’a’oroma’i i te mau ’ati ra, e rave rahi ho’i tā ’oe e fa’ari’i ». ’Aue. ’Aita roa vau e ’āfaro ra i terā parau.
’Aua’e rā, tē parau fa’ahou ra te pāpa’ira’a mo’a : « ’A fa’a’oroma’i i te reira, nō te mea, inaha, tei pīha’i iho vau ia ’oe, ē tae noa atu i te hope’a o tō ’oe mau mahana » (Te Ha’api’ira’a Tumu ’e te mau Fafaura’a 24:8, reta tei fa’ahuru-’ē-hia). Nā reira ïa. Pāmu a’enei te aho.
’Ia feruri ana’e au i te reira, ’ua ’ite a’era vau tei pīha’i iho noa te Fatu iā’u i roto i tō’u mau māuruuru ’ore ato’a ’o tā’u i fa’aruru. Teie te tahi mau hi’ora’a :
I te taime ’aita vau i fa’ari’i te ti’ara’a e ha’uti te teata ta’ata ora […]
I te 15ra’a o tō’u matahiti, ’ua tata’u vau nō te ha’uti nō te hō’ē teata ta’ata ora i te fare ha’api’ira’a. ’Ua tītau vau i te ti’ara’a tumu, terā rā i te pae hope’a, ’aita vau i ravehia nō te reira.
Nō te fa’ahope roa, ’ua hōro’a a’ena te ’orometua i te mau ti’ara’a na’ina’i ato’a, nō reira ’aita hō’ē a’e ti’ara’a nō’u. ’Ua fa’ata’a te ’orometua iā’u ’ei arata’i i te mau pīahi ’e nō tōna aroha iā’u, ’ua tu’u mai ’oia i te hō’ē ti’ara’a ’āpī—’ua haere noa vau i ni’a i te tahua e 30 tētoni noa ’ei pāretenia māmū.
’Oia ïa. ’Ua ta’i au.
… ’Ua ha’apūai te Fatu iā’u
’Ia hi’o vau i muri, ’ua ’ite a’era vau ē, ’ua tauturu te Fa’aora iā’u ’ia fa’aruru i taua taime māuruuru ’ore ra. ’Ua ha’apūai ’oia iā’u ’ia tāpe’a noa i te hō’ē huru maita’i ’e ’ia fa’ananea atu ā i te haeha’a. I te pae hope’a, ’ua ’oa’oa vau i tō’u taime i roto i te teata ta’ata ora i te ivara’a o te matahiti.
« ’Ia rave ’ana’anatae tātou i te mau mea ato’a i roto i tō tātou mana ; ’ei reira e ti’a ai ia tātou ’ia ti’a mai ma te ti’aturi pāpū roa, nō te ’ite i te fa’aorara’a a te Atua, ’e nō te fa’a’itera’ahia mai tōna ra rima » (Te Ha’api’ira’a Tumu ’e te mau Fafaura’a 123:17, reta tei fa’ahuru-’ē-hia).
’Ia ’ore ana’e te tū’aro e tupu mai tā’u i hina’aro …
I te matahiti hope’a nō tā’u ha’api’ira’a tuarua, ’ua hina’aro vau e fa’aō atu i roto i te pupu tā’irira’a pōpō a te fare ha’api’ira’a teitei. E ti’a iā’u ’ia upo’oti’a ’oi’oi i ni’a i te tamāhine tei tāpurahia i ni’a a’e iā’u, nō te fa’aō atu i roto i te pupu. I tō’u rā ha’utira’a ’e ’ōna, ’ua pau vau.
Noa atu ’ua māuruuru ’ore au, ’ua ha’uti au i roto i te pupu taure’a a te fare ha’api’ira’a teitei. I roto i te ha’utira’a hope’a a te taure’a nō te fare ha’api’ira’a teitei, ’o vau te ti’ara’a mātāmua. E aha rā tei tupu ? ’Ua pau vau i te ha’utira’a hōpe’a. ’Ua ta’i au—fa’ahou ā.
I muri iho ’ua māuruuru ’ore fa’ahou ā vau. I muri a’e i te fa’ari’ira’a i te hō’ē feti’a nō te mau nota maita’i i te ha’api’ira’a ’e te ha’utira’a tū’aro, ’ua fa’aoti rātou e ’īriti i tā’u feti’a—nō te mea e au ra ’ua fa’ata’ahia te reira nō te feiā e ha’uti i roto i te pupu fare ha’api’ira’a teitei.
… Nō te hō’ē noa « taime poto »
I taua taime ra, ’ua riro te tā’irira’a pōpō ’ei tuha’a rahi i roto i tō’u orara’a, ’e teie mau māuruuru-’ore-ra’a e au ra iā’u ’ua rahi roa ïa. Te mea tā’u i ’ore i ’ite, ’oia ho’i tei pīha’i iho noa te Fa’aora iā’u, nō te tauturu iā’u. ’Aita teie mau māuruuru ’ore rahi roa i vai maoro ē a muri noa atu, noa atu e au ra iā’u e vai noa te reira ē a muri noa atu.
« ’Ia vai te hau i roto i tō ’oe vārua ; e vai poto noa tō ’oe fifi ’e tō ’oe mau ’ati ; ’ei reira mai te mea e fa’a’oroma’i māite ’oe i te reira, e fa’ateitei te Atua ia ’oe » (Te Ha’api’ira’a Tumu ’e te mau Fafaura’a 121:7–8, reta tei fa’ahuru-’ē-hia).
’A tāmata ai au i te fa’aupo’oti’a ’ore i te māuruuru ’ore […]
I te tahi taime, ’ua tāmata vau i te ’ape hope roa te māuruuru ’ore. I te 13ra’a o tō’u matahiti ’e ’aita vau i ō i roto i te tōmite a te mau pīahi, ’aita roa vau i tāmata fa’ahou, noa atu ’ua riro te reira ’ei ’ohipa e ’ana’anataehia paha e au. ’Ua vaiho vau te reira i te hiti nō tō’u mata’u ’ia māuruuru ’ore fa’ahou […]
Tītauhia iā’u ’ia « ’ore e mata’u »
’Ua tītauhia iā’u ’ia ha’amana’o ē, tei pīha’i iho noa te Fatu ia tātou, i roto ato’a i tō tātou mau māuruuru ’ore. I te tahi taime, ’aita te mau mea e tupu mai tā tātou e hina’aro, e nehenehe rā ’oia e tauturu ia tātou ’ia fa’aruru i te mau urupu’upu’u fāna’o ’ore ’e ’a tāmata i te mau ’ohipa ’āpī.
« ’A hi’o mai iā’u nei i tō mau mana’o ato’a na ; ’eiaha e fē’a’a, ’eiaha e mata’u » (Te Ha’api’ira’a Tumu ’e te mau Fafaura’a 6:36–37, reta tei fa’ahuru-’ē-hia).
’Ia ’ore ana’e te tāvinira’a misiōni ’ia tupu mai tei mana’ohi’a […]
I muri a’e te ha’api’ira’a tuarua, ’ua fa’aoti au e tāvini i te hō’ē misiōni. Terā rā, ’ua fa’ari’i au i te tahi mau fifi mana’o-’ore-hia i te pae o te ea, tei tāpe’a iā’u ’ia haere i te taime tā’u i ’ōpua.
’Ua ti’a iā’u ’ia fa’a’oroma’i, i te pae hope’a rā ’ua pi’ihia vau i te misiōni nō Mexico Guadalajara hiti’a o te rā. I reira ’ua ha’api’i au e rave rahi ta’ata fa’ahiahia ’e ’ua tauturu ato’a i te tahi o rātou ’ia bāpetizohia. Noa atu rā tō’u fa’aro’o, tō’u ha’apa’o ’e tā’u ’ohipa itoito, ’aita hō’ē o rātou i fa’aea itoito noa i roto i te ’Ēkālesia […]
’Ua ti’aturi au i te hina’aro o te Atua
Pinepine te mau tupura’a o te orara’a i te ’ore e noa’a ia tātou e fa’atere. E’ita e ti’a iā’u ’ia fa’a’āfaro ’oi’oi noa i tō’u mau fifi i te pae o te ea. E’ita e ti’a iā’u e fa’ahepo ia vetahi ’ē ’ia ora i te ’evanelia. E nehenehe rā tā’u e ti’aturi i te tārena ’e i te rāve’a a te Fatu.
« Nō reira, ’a ha’amo’a na [’oe] ia ’outou iho ’ia riro tō [’oe] mana’o rōtahi i te Atua ra, ’e e tae mai ïa te mau mahana e ’ite ai [’oe] iāna ra ; ē nā reirahia i tōna ihora tau mau ’e tōna ihora rāve’a, ’e ma te au ho’i i tōna iho hina’aro » (Te Ha’api’ira’a Tumu ’e te mau Fafaura’a 88:68, reta tei fa’ahuru-’ē-hia).
I te taime ’a māuruuru ’ore ai au i te hepetoma i ma’iri a’enei […]
E ta’ata pa’ari au i teienei. ’Ua māuruuru ’ore noa ā vau. I te hepetoma i ma’iri a’enei, ’ua haere atu vau i te hō’ē vauvaura’a parau pāpa’i. E mana’o pāpū maita’i tō’u nō te tahi o tā’u mau pāpa’ira’a, ’ua fa’ari’i rā vau i te tahi mau fa’ata’ara’a māuruuru ’ore nā roto mai i te tahi atu mau ta’ata pāpa’i […]
Tei reira ’oia iā’u ra
Teienei, tē tāmata nei au i te ti’aturi ri’i atu ā i te Fatu. ’Ua riro te mau māuruuru ’ore ’ei tuha’a nō te orara’a. E ’ere te reira i te fa’a’itera’a ē, tē rave nei ’oe i te tahi ’ohipa ’ino.
E ho’i mai nā tātou i te pāpa’ira’a mo’a mai te ha’amatara’a mai. ’Oia mau, « e rave rahi » tō tātou mau ’ati ’e mau māuruuru ’ore. ’Ua ’ite rā vau ē, tei reira te Fatu ’iā’u ra nā roto i teie mau tāmatara’a. ’E tei reira ato’a ’oia ia ’oe ra.
« ’A fa’a’oroma’i i roto i te mau ’ati, nō te mea e rave rahi te mau ’ati e tae i ni’a iho ia ’oe na ; ’a fa’a’oroma’i i te reira, nō te mea, inaha, tei pīha’i iho vau ia ’oe, ē tae noa atu i te hope’a o tō ’oe pu’e mahana » (Te Ha’api’ira’a Tumu ’e te mau Fafaura’a 24:8, reta tei fa’ahuru-’ē-hia).