Digital Lamang: Pangserbisyo nga mga Misyon
Pangserbisyo nga mga Misyon: Takos sa mga Paningkamot
Sa dihang nadawat nako ang akong assignment sa misyon, nagdahom ko nga madestino sa usa ka misyon nga magtudlo sa ebanghelyo. Ang akong dalan lahi man hinuon, alang sa mas maayo.
Sa akong hunahuna kon ang mga tawo motan-aw sa mga misyon, kasagaran ang ilang pagtuo nga ang pangserbisyo nga mga misyon “mas ubos” nga misyon kon itandi sa misyon nga magtudlo sa ebanghelyo. Moangkon ko nga sa dihang miaplay ko sa akong misyon, mao kana ang akong gibati. Ang akong mga lider sa pagkapari, ang Departamento sa Misyonaryo, ug ako mitrabaho sa akong aplikasyon sulod sa sobra sa unom ka bulan. Gusto kong moserbisyo og misyon nga magtudlo sa ebanghelyo. Gibati nako nga kinahanglan ko nga mohimo niana.
Usa ka Mas Personal nga Tawag
Sa kataposan, nakigkita ko sa akong presidente sa stake, ug nahibaloan nako nga gitawag ko sa pangserbisyo nga misyon. Ang akong dalan nagpadulong sa lahi nga direksyon kaysa akong gipaabot sa una, apan makapatingala, gibati nako ang kalinaw. Nasayod ko nga eksakto kini.
Sukad sa pagsugod sa akong misyon, nakahimo ko sa pagpakig-uban sa mga tawo samtang nag-inusara silang naglingkod sa mga kwarto alang sa pagtambal sa kanser ug nagserbisyo sa templo isip usa ka ordinance worker. Aduna usab akoy oportunidad sa pagsulat og mga artikulo alang sa YA nga Sinemana, gamit ang akong gugma sa pagsulat sa pagtabang sa paghatag og kahayag ug paglaom sa uban.
Nagtuo ko nga makaadto ko sa full-time nga misyon nga magtudlo sa ebanghelyo. Hinuon, nasayod ko nga sa dihang nadawat nako ang akong buluhaton sa pagserbisyo isip usa ka pangserbisyo nga misyonaryo, ang buluhaton wala kaayoy kalabotan sa kahimsog sa akong pangisip ug mas labaw ang mahitungod kon asang dapita ako labing gikinahanglan sa Ginoo. Tingali dili kaha unta nako masinati ang nindot kaayong personal nga mga kasinatian nga akong nasinati sa akong pangserbisyo nga misyon.
Dili Mas Ubos apan Parehas
Ang pangserbisyo nga mga misyon dili mas ubos kon itandi sa mga misyon nga magtudlo sa ebanghelyo. Ania ang analohiya nga nadunggan nako: Ang mga misyonaryo nga magtudlo sa ebanghelyo mao ang ba-ba sa Manluluwas; ang pangserbisyo nga mga misyonaryo mao ang Iyang mga kamot. Ang katuyoan sa pangserbisyo nga misyonaryo nag-ingon nga kita moserbisyo “inubanan sa mahigugmaong kamabination sama sa gibuhat sa Manluluwas.”
Motunol kita og makapahupay, maamumahon nga kamot niadtong nanginahanglan. Mao kana ang gibuhat sa Manluluwas, ug kana mao ang gisugo nga atong sundon.
Moadto ug Mobuhat
Nasayod ko nga ang Langitnong Amahan nagtan-aw sa matag usa kanato ug nga Siya nasayod unsay labing maayo kanato. Bisan unsa ang inyong buluhaton sa misyon, kon motawag Siya kaninyo sa pagserbisyo, serbisyohi.
Sa mga pulong sa Mga Panultihon 3:5–6: “Salig sa Ginoo sa bug-os mong kasingkasing. Ayaw gayod pagsalig sa imong kaalam. Hinumdomi Siya sa tanan mong buhaton ug tultolan ka Niya sa matarong nga dalan.”
Kana, akong ikapaneguro ninyo.