Ang Akong Pangserbisyo nga Misyon: Pagkahimong mga Kamot sa Ginoo

Sa dihang nag-edad ko og 18, ang akong bishop misulti nako nga ang pagserbisyo og misyon mao ang usa sa labing lisod nga mga butang nga akong mahimo, apan usa usab sa labing maayong mga butang nga akong masinati. Human sa paghunahuna og maayo ug pag-ampo, nakahukom ko nga magmisyon.

Gidestino ko nga moserbisyo sa California, USA. Sa dihang didto nako, bisan sa tanan nakong mga paningkamot, maglisod ko sa pagsulti og usa ka pulong sa bisan unsa nga leksiyon. Ang akong presidente sa misyon misulti nako sa pagsugod pinaagi sa pagpahiyom ngadto sa uban. Morag yano ra kaayo kini, apan butang kini nga wala pa nako mabuhat. Sa dihang gisugdan nako sa pagsulay, nindot ang gibati nga mopahiyom ug modapit sa Espiritu nga malipayon.

Human sa unom ka bulan, nakigbisog gihapon ko. Aduna koy tinguha sa pagbuhat sa buhat sa Ginoo, apan ang pagpakigsulti sa uban sa tibuok adlaw ingon og imposible alang nako.

Human makigsulti sa akong mga lider, nakahukom kami nga wala ko sa labing maayong dapit alang nako. Ang akong presidente sa misyon dayon mitanyag nako og usa ka oportunidad nga dili nako kabalibaran: ang opsiyon sa pagserbisyo og pangserbisyo nga misyon. Sa walay paglangay, miingon dayon ko og oo.

Bisan wala makahibalo sa tanan nga umaabot nako, nasayod ko nga makahimo gihapon ko sa pagserbisyo sa akong Dios.

Karon, isip usa ka pangserbisyo nga misyonaryo, nagtabang gihapon ko sa uban nga moduol ngadto kang Kristo pinaagi sa pagserbisyo inubanan sa mahigugmaong pagkamabination sama sa gibuhat sa Manluluwas. Nagserbisyo ko sa humanitarian center, sa balay-tipiganan sa bishop, sa templo, ug gani motabang ko sa pagtudlo sa banda sa high school.

Kon motudlo kamo sa ebanghelyo, nagpakigbahin kamo sa mga pulong sa Ginoo, ug kon moserbisyo kamo sa uban, kamo ang mga kamot sa Ginoo. Bisan asa nga paagi, nagdapit gihapon kamo sa uban nga moduol ngadto ni Kristo ug mangalagad pinaagi sa gahom sa Espiritu Santo.