Tutoki Unsay Inyong Mahimong Buhaton

Mao kadto nga misyon nga wala nako damha, apan ganahan ko sa matag minuto.

Sa dihang didto pa ko sa missionary training center nga nag-andam sa pag-adto sa Norway, si Presidente Dallin H. Oaks sa Unang Kapangulohan miabot ug namulong kanamo. Mitudlo siya og yanong butang nga nagpabilin nako sa akong tibuok misyon: “Tutoki unsay inyong mahimong buhaton.”

Unsa ang Pangserbisyo nga Misyon?

Pipila ka semana human sa pakigpulong ni Presidente Oaks, gipadala ko ngadto sa California tungod sa medikal nga mga rason. Nahugno ko. Sa kataposan mibati ko nga nakat-on sa pinulongan ug naghinamhinam nga mosulod na sa misyon.

Nakigkita ko sa akong presidente sa stake, ug nangutana siya nako kon gusto ba ko nga moserbisyo og pangserbisyo nga misyon.

Pangserbisyo nga misyon? Wala gani koy ideya unsa kana.

Nahibaloan nako nga ang pangserbisyo nga misyon makapili gikan sa nagkadaiya nga mga opsiyon kon asa, kanus-a, ug unsaon nila sa pagserbisyo. Ang pangserbisyo nga mga misyon nagtutok sa pagtabang sa misyonaryo nga mogamit sa ilang mga abilidad sa paagi nga moserbisyo sa uban.

Usa ka Maayo nga Opsiyon alang Nako

Nakahukom ko nga ang pangserbisyo nga misyon mao ang maayong opsiyon alang nako aron matutokan ang akong kahimsog ug moserbisyo sa Ginoo sa samang higayon. Ang pipila sa akong mga buluhaton naglakip sa:

• Paggiya og mga pag-tour isip usa ka giya sa museyo.

• Pagserbisyo isip usa ka receptionist sa opisina sa misyon.

• Pag-abag sa sentro sa pagkaon ug sa kampo sa Simbahan.

• Pagtabang sa katalagman sa dakong sunog.

• Pagserbisyo sa templo.

Ang akong pangserbisyo nga misyon nakapahimo nako nga magpuyo sa balay ug makapaarang-arang sa akong kahimsog samtang nagserbisyo. Mao kadto nga misyon nga wala nako damha, apan ganahan ko sa matag minuto. Nakatabang kini kanako nga matutokan ang unsay akong mahimong buhaton ug mapalambo ang akong mga abilidad aron makahatag og kaayohan ngadto sa kalibotan.

Tibuok Kinabuhi nga mga Leksiyon gikan sa Akong Misyon

Ang yano apan gamhanan nga pagtudlo gikan ni Presidente Oaks adunay epekto dili lang sa akong misyon apan usab sa akong kinabuhi. Nakapausab kini sa akong panglantaw. Imbes motutok sa mga butang nga dili nako makontrol, gitutokan na nako karon ang pagdala og kaayohan ngadto sa kalibotan gamit ang akong mga kapanguhaan ug mga talento. Pinaagi sa pagtutok sa atong matag usa nga mga abilidad, makausab kita sa kalibotan ug niadtong anaa sa atong palibot alang sa kaayohan.