Lisod nga mga Panahon sa Imong Pamilya?
Ania ang unom ka kamatuoran nga hinumdoman kon gibati ninyo nga ang inyong kinabuhi sa pamilya dili maayo.
Mga paghulagway pinaagi ni Emily Davis
Nasulayan na ba ninyo nga anaa sa lisod nga kahimtang sa pamilya?
Pananglitan, tingali nakasinati kamo og:
-
Mga ginikanan nga nagdiborsyo.
-
Kagubot o panaglalis sa panimalay.
-
Kalisod sa pakigsabot sa mga igsoon o mga ginikanan.
-
Giabusaran o gipasagdan.*
-
Usa ka sakop sa pamilya nga naghimo og dili maayo nga mga pagpili, mibiya sa Simbahan, o namatay.
Bisag unsa pa ang malisod nga mga panahon sa inyong pamilya alang kaninyo, ingon ana gayod kana—lisod. Ania ang unom ka butang nga kinahanglan ninyong mahibaloan.
1. Gihigugma kamo
Gibati man ninyo ang gugma gikan sa inyong yutan-ong pamilya o wala, hibaloi nga sakop kamo sa pamilya sa Langitnong Amahan, ug gihigugma kamo Niya labaw pa sa inyong mahunahuna. Bisan ang Diyos ug si Jesukristo naglalang ug mga kalibotan nga dili maihap, ang Diyos nakaila ug nahigugma kaninyo.
“Bisan kita dili perpekto, perpekto ang gugma sa [Dios]. Bisan og gibati nato ingon og nawala ug walay kompas, ang gugma sa Dios hingpit nga naglibot kanato.”
2. Wala kamo mag-inusara
Kon gibati ninyo nga nag-inusara, ayaw—anaa sa inyong kiliran ang tulo ka Binuhat nga adunay mahangtorong gahom. Makaampo kamo sa inyong Langitnong Amahan, kinsa makadungog ug motubag kaninyo. Makasalig mo sa Manluluwas, nga kanunayng makasabot, bisan kon ang ubang tawo dili makasabot (tan-awa sa Alma 7:11–12). Ug mabatonan ninyo ang Espiritu Santo sa kanunay, aron mohupay ug mogiya ninyo, samtang maningkamot kamo sa pagtuman sa inyong mga pakigsaad.
Gawas sa labing gamhanang mga binuhat sa uniberso, daghan pang mga tawo ang modapig ninyo—sa duha ka habig sa tabil. Ang “kasundalohan sa langit” nagadasig kaninyo sa pagpadayon. Gikinahanglan kamo. Nahisakop kamo. Kamo wala gayod mag-inusara.
“Usa ka adlaw kamo molingi ug motan-aw sa inyong kalisdanan, ug inyong mahibaloan nga [ang Dios] anaa kanunay uban kaninyo.”
3. Mahinungdanon ang inyong mga ehemplo
Depende sa inyong sitwasyon, mahimong daghan o dili daghan ang inyong mahimo aron masulbad ang mga problema sa inyong pamilya o mabag-o kon unsa gawi ug pagtuo sa usa ka sakop sa pamilya. Apan samtang pilion ninyo ang pagsunod sa Manluluwas, ang inyong maayong ehemplo makahimo og mas daghang kalainan kay sa inyong maamgohan.
“Ang atong Kristohanon nga ehemplo sa kamabination, katarong, kalipay, ug tiunay nga gugma alang sa tanang katawhan makamugna og … makagiya nga kahayag alang kanila.”
4. Ang Ginoo makatabang ninyo sa paghigugma ug pagpasaylo
Sa daghang mga sitwasyon, ang usa sa labing maayong butang nga inyong mahimo para sa inyong mga sakop sa pamilya mao ang pagpaningkamot sa paghigugma ug pagpasaylo kanila. Kon daw lisod kana, salig sa Ginoo nga tabangan mo.
“Pinaagi sa Iyang walay kinutoban nga Pag-ula, makapasaylo kamo niadtong nakapasakit kaninyo ug kinsa dili gayod modawat sa responsibilidad sa ilang pagkabangis nganha kaninyo.”
5. Ang mahangtorong plano sa paghan-ay sa pamilya mahimong maanindot kaayo
Tingali nabalaka mo sa kaugmaon sa inyong pamilya—bisan diha sa kahangtoran. Apan makasalig kamo nga ang atong mahigugmaong Langitnong Amahan makahusto sa tanan.
“Kinahanglan lang nga magpuyo [kamo] nga takos sa celestial nga gingharian, ug mas monindot pa ang mga han-ay sa pamilya kay sa imong mahunahunaan.”
6. Ang inyong mga pagsulay posibleng mahimong mga panalangin
Samtang modangop kamo sa Langitnong Amahan, motabang Siya kaninyo sa inyong mga pagsulay. Mahimo pa gani Niyang kuhaon ang lisod nga mga butang ug himoon kini nga makaayo kaninyo (tan-awa sa Doktrina ug mga Pakigsaad 98:3).
“Dili ba kini makapainteres kon, human sa atong kinabuhi, atong makita nga kadtong mga relasyon sa [pamilya], bisan kadtong mahagiton nga mga higayon, mao ang mga butang nga nakatabang kanato nga mahimong mas sama sa atong Manluluwas? Ang matag lisod nga pakigsuod usa ka oportunidad nga makat-on unsaon sa paghigugma sa mas lawom nga lebel—usa ka sama sa dios nga lebel.”