Tinago nga mga Bahandi

Ang bulawan nga mga palid nagsugod sa minubo nga asoy ni Mormon sa basahon ni Lehi. Gihubad ni Joseph Smith ang 116 ka gidaghanon nga pahina—apan nawala ni Martin Harris ang mga pahina.

Dili ba mahimo nga hubaron nalang kini pag-usab ni Joseph? Oo, apan ang mga kaaway ni Joseph naghupot sa nawala nga mga pahina ug mangita og mga kalainan tali sa duha ka hubad (o mag-imbento og uban) aron atakehon siya (tan-awa sa Doktrina ug mga Pakigsaad 10:29–32).

Swerte lang, adunay plano ang Ginoo. Sa sayo pa nga mga siglo, Iyang gisugo si Nephi sa paghimo og ikaduhang hugpong sa mga palid nga naglangkob og daghan nianang sama nga materyal apan mas nakatutok sa espirituhanong mga butang (tan-awa sa 2 Nephi 5:29–33). Dayon ang Ginoo midasig ni Mormon sa paglakip niining mas gagmay nga mga palid uban sa iyang minubo nga asoy sa tanang butang (tan-awa Mga Pulong ni Mormon 1:3–7).

Giseguro sa Ginoo nga aduna pa kitay rekord sa mga butang sama sa panan-awon ni Lehi sa Kahoy sa Kinabuhi ug sa pagpanaw sa iyang pamilya ngadto sa gisaad nga yuta. Sa umaabot nga panahon ang nawala nga bahin mapasig-uli. Sa pagkakaron, kita adunay mas daghang rason sa pagtuon ug paghigugma sa unsay anaa kanato, sa pagkonsiderar sa tanang paningkamot nga gihimo sa Ginoo aron maseguro nga anaa kini kanato.

Handurawa nga ikaw si Oliver Cowdery, usa ka 22 anyos nga magtutudlo nga nakahimamat sa pamilya ni Joseph Smith Sr. ug nakakat-on sa talagsaong mga butang nga gibuhat sa ilang anak nga si Joseph—ug dayon miapil ka!

Sunod nga butang nga imong nahibal-an, ikaw na ang nagsulat sa gidiktar nga hubad ni Joseph sa Basahon ni Mormon. Pagkatalagsaon nga kasinatian! Sa dihang si Oliver miingon, “Kini ang mga adlaw nga dili gayod makalimtan” (Joseph Smith—Kasaysayan 1:71, footnote), tingali dili kadto igo nga pamahayag.

Samtang sila si Joseph ug Oliver naghubad ug nagsulat sa Basahon ni Mormon, may mga pangutana sila mahitungod sa bunyag. Inyong makat-onan kon unsay nahitabo sa dihang ilang gidala ang ilang mga pangutana ngadto sa Ginoo, nga miresulta sa mas sagrado nga mga kasinatian nga dili gayod makalimtan sa tawo.

Ania ang usa ka bililhon nga kamatuoran: Ang pagkahimong malamposon sa kasagaran nanginahanglan og tabang gikan sa ubang mga tawo.

Ang Langitnong Amahan mobutang og mga tawo sa atong mga dalan kinsa makapanalangin sa atong mga kinabuhi (ug kansang mga kinabuhi atong mapanalanginan). Mahitabo kini sa espirituwal ug temporal nga mga butang. Nahimamat ni Joseph Smith si Oliver Cowdery tungod kay si Oliver, usa ka magtutudlo, nakahimamat sa mga ginikanan ni Joseph tungod sa iyang trabaho. Si Oliver higala nang daan sa pamilyang Whitmer, kinsa sa wala madugay nakabig ug misugod sa pagbuhat sa trabaho nga dili mahimo ni Joseph nga siya ra.

Daghan kaayong dagkong mga butang ang nahimo tungod kay kining mga tawhana “nahitabo” nga miabot sa kinabuhi sa usag usa. Nagtuo ba mo nga sulagma lang nga nagkita sila? Dili!

Kon mangayo mo og tabang sa Langitnong Amahan, ablihi ang inyong hunahuna sa posibilidad nga ang Espiritu Santo mohunghong sa ngalan sa usa ka tawo sa inyong kinabuhi nga makahatag sa tabang nga inyong gikinahanglan.

Ug ayaw kalimti ang pikas nga habig sa maong sensilyo: Kang kinsang dalan ikaw gibutang? Kang kinsang mga pag-ampo ikaw mamahimong tubag?