Kitang Tanan Mahimong Mahisakop pinaagi ni Jesukristo

Magbantay Kanunay, ni Yongsung Kim, hulagway sa maayong kabubut-on sa Havenlight

Isip usa ka komunidad sa mga Santos, atong gihigugma ug gihangop ang usag usa. Makatabang kini sa pagmugna og dapit diin ang tanan mobati nga may labot sa Simbahan.

Normal lang nga usahay mobati ka nga walay apil. Kon mahitabo kini, ang ebanghelyo ni Jesukristo naghatag og solusyon: serbisyo.

“Ang pagkasakop dili moabot kon kita magpaabot lang niini apan kon kita motabang sa usag usa,” ingon ni Elder D. Todd Christofferson sa Korum sa Napulog Duha ka Apostoles. Kabahin kini sa unsay andam natong buhaton samtang mosulod kita sa pakigsaad sa bunyag, sa paghupay ug paghigugma sa usag usa ug pagpas-an sa mga palas-anon sa usag usa (tan-awa sa Mosiah 18:8–9).

Si Jesukristo mao labing maayong panig-ingnan niini. Iyang giantos ang mga kasakit, mga sala, ug mga kaguol sa tanang tawo (tan-awa sa Alma 7:11–13). Pinaagi sa pagpakigsaad sa pagsunod Kaniya ug sa pagtuman sa Iyang mga sugo, makapuyo kita og usab uban ni Jesukristo ug sa Langitnong Amahan sa mahangtorong mga pamilya.

“Busa, ang doktrina sa pagkasakop masumada sa ingon niini—matag usa kanato makapamatuod nga: si Jesukristo namatay alang kanako; Siya nagtuo nga ako takos sa Iyang dugo. Siya nahigugma kanako ug makahimo sa tanang kalainan sa akong kinabuhi. Kon ako maghinulsol, ang Iyang grasya mousab kanako. Ako nahiusa Kaniya diha sa pakigsaad sa ebanghelyo; ako nahisakop sa Iyang Simbahan ug gingharian; ug ako nahisakop sa Iyang kawsa sa pagdala og katubsanan ngadto sa tanang anak sa Dios.”

Isip mga Santos, makatabang kita sa usag usa nga mobati nga kita nahisakop pinaagi sa gugma, pagserbisyo, ug pagsunod ni Jesukristo.