Digital Lamang: Pangserbisyo nga mga Misyon
Walay Duha ka Misyon nga Magkaparehas
Mao kini ang buhat sa Ginoo—ang tanan adunay talagsaon nga tahas niini.
Nagserbisyo ko og walo ka bulan isip misyonaryo nga nagtudlo sa ebanghelyo sa Los Angeles, California, sa wala pa mobalhin sa panimalay ngadto sa usa ka pangserbisyo nga misyon sa Utah. Bisan pa sa lahi nga buluhaton, nasayod ko nga ang calling sa pagserbisyo og misyon ug ang pagtabang sa uban nga moduol ngadto ni Kristo parehas ra.
Unsay Gipasabot Niini alang Kanako
Ang matag misyonaryo nagserbisyo sa talagsaong mga buluhaton, mao nga walay duha ka eskedyul nga eksaktong magkaparehas. Nagserbisyo ko sa upat ka lainlaing mga dapit nga serbisyohan matag semana.
Nagserbisyo ko sa balay-tipiganan sa bishop kausa sa usa ka semana. Motabang ko sa pagputos og mga order sa pagkaon alang sa mga pamilya nga nanginahanglan, ug motanyag ko og kahupayan ngadto sa tanan nga moduol. Moboluntaryo usab ako sa libreng klinika isip usa ka tighubad ug teknisyan sa pasyente. Motabang ko sa pagrehistro sa mga pasyente, mohubad alang niadtong mosulti og Kinatsila, ug magkat-on og mga pamaagi gikan sa talagsaong mga doktor.
Kon wala ko sa klinika, motrabaho ko sa grupo sa Alang sa Kalig-on sa Kabatan-onan nga magasin. Ganahan ko nga maminaw sa kabatan-onan. Ang ilang mga pagpamatuod naglig-on sa akong pagpamatuod! Sa kataposan sa mga semana, moserbisyo ko isip usa ka temple worker.
Ang kanindot mahitungod sa pangserbisyo nga mga misyon mao nga sila motugot nimo sa paggamit sa imong libreng panahon bisan asa ka gikinahanglan sa Ginoo. Alang nako, sa pipila ka adlaw nagpasabot kana nga mouban sa misyonaryo nga nagtudlo sa usa ka leksiyon, o mobulontaryo sa usa ka lokal nga puy-anan sa mga hayop. Sa ubang adlaw, nagpasabot kini sa paggahin og panahon sa akong pamilya o pagbisita og usa ka tawo nga nagkinahanglan og suporta.
Mga Panalangin sa Misyonaryo nga Pagserbisyo
Ang akong misyon importante ug makahuloganon kanako. Wala gayod ko maghunahuna nga ako adunay oportunidad sa pagserbisyo sa daghan kaayong paagi—wala magtuo nga magserbisyo labi na sa kada adlaw. Ang matag usa sa akong mga buluhaton nakahatag sa akong pamilya ug nako og daghang panalangin. Mapasalamaton ko nga makapadayon ko sa paghimamat og bag-ong mga tawo ug makahimo og bag-ong mga higala.
Nasayod ko nga ibutang kita sa Dios sa mga dapit diin kita gikinahanglan. Nakaila Siya sa matag usa nato sa talagsaong paagi ug naghatag nato og mga oportunidad nga motubo sa paagi nga kita Iyang gikinahanglan. Iya kini nga buhat—ang tanan adunay talagsaong paagi sa paghimo niini.