Ամրացրեք տները և վկայությունները

Մի տարի՝ ամառվա ընթացքում Սառան առաջին անգամ մի տուն վերանորոգեց: Նա այնքան շատ սիրեց այդ աշխատանքը, որ հաջորդ տարի սկսեց աշխատել մեկ այլ վերանորոգման նախագծի վրա: Ի վերջո, նա որոշեց զբաղվել ավելի մեծ նախագծով՝ «վաճառքի համար նախատեսված» տան կառուցմամբ կամ մի տան, որը նա և իր ենթակապալառուների թիմը կկառուցեին հիմքից մինչև վերջ՝ հույս ունենալով, որ շահույթով կվաճառեն այն:

Բիզնես սկսելը հեշտ նախագիծ չէր, հատկապես այն պատճառով, որ Սառան դեռ սովորում էր ավագ դպրոցում և զբաղվում էր կոշտ տեղանքով վազքի սպորտաձևով:

«Ես այնքան շատ բան սովորեցի»,- ասում է նա: «Ես ստիպված էի չեկերի գրքույկ օգտագործել՝ մարդկանց վճարելու համար, ինչը նախկինում երբեք չէի արել: Ես պետք է սովորեի անծանոթ մարդկանց հետ շփվել, որոնք իմ ենթակապալառուներն էին: Ես նաև սովորեցի, թե ինչպես կառավարել ընկերության ղեկավարման հետ կապված սթրեսը, ինչը միշտ չէ, որ հետաքրքիր զբաղմունք էր: Միշտ անհանգստություն կա, որ դուք չեք կարող աշխատել անհրաժեշտ գումարն առանց վնասներ կրելու, նույնիսկ տունը վաճառելիս»:

Չնայած անհանգստություններին և սթրեսներին, որոնք կապված են բիզնեսի հետ, Սառան երբեք ստիպված չի եղել միայնակ գնալ իր մեծ երազանքների հետևից:

«Դա միշտ ստացվել է, և ես գիտեմ, որ դա Տիրոջ շնորհիվ է», - ասում է նա: «Այս բիզնեսը հնարավոր չէր առանց Նրա։ Նա օգնեց ինձ հաղթահարել վատ օրերը, ծանր աշխատանքը, ամեն ինչ»:

Սառայի ընտանիքը նույնպես աջակցում էր նրան իր կատարած յուրաքանչյուր քայլափոխին, ինչը մեզ վերադարձնում է դեպի այն միսիան, որը խանգարում էր նրա ծրագրերին:

Նրա ավագ եղբայրը՝ Թայլերը, ծրագրում էր օգնել Սառային տուն կառուցել՝ իր միսիայից տուն վերադառնալուց հետո: Բայց մի օր նա զանգահարեց Սառային՝ տեղեկացնելով, որ իրեն խնդրել են երկարացնել իր միսիոներական ծառայությունը:

«Ես այնքան բարկացա նրա վրա»,- խոստովանում է Սառան: «Ես ասում էի՝ «Թայլեր, դու չես կարող կատարել այդ խնդրանքը»: Ես ծրագրեր ունեմ»: Նա ասաց. «Տիրոջ գործն ավելի կարևոր է, քան քո գործը»։ Դա հարված էր ինձ համար: Ես գիտեի, որ նա ճիշտ էր, և որ ես պետք է վստահեմ Աստծո ծրագրին»:

Լուսանկարը տրամադրվել է Սառա Քրիստենսենի կողմից

Թայլերի օրինակը ոգեշնչեց Սառային սկսել մտածել միսիայում ծառայելու մասին: «Ես հասկացա, թե եղբայրս քանի մարդու է օգնել գալ դեպի Քրիստոսը, ես նաև տեսա, թե որքան է նա մոտեցել Քրիստոսին: Ես ցանկացա նմանատիպ փորձառություններ ունենալ»,- ասում է Հերմանա Քրիստենսենը: «Ես սկսեցի լրջորեն ուսումնասիրել ավետարանը և հասկացա, որ որքան աճում էին իմ վկայությունն ու իմ հարաբերություններն իմ Փրկչի հետ, այնքան ավելի շատ էի ցանկանում կիսվել իմ ունեցածով»:

Սառան ընտրեց դադարեցնել իր շինարարական բիզնեսը և ծառայել Տիրոջը: Այդ որոշումը նրան նոր հզոր գաղափարներ տվեց:

«Ամենակարևոր բանը, որն ուսուցանել է ինձ իմ միսիան, այն է, որ ավետարանը լիովին փոխում է կյանքը»,- ասում է Հերմանա Քրիստենսենը: «Քանի որ ես մեծանում էի եկեղեցում, ինձ համար դժվար էր տեսնել, թե որքան կարևոր է ավետարանն իմ կյանքում:

«Այստեղ՝ իմ միսիայում, ես շրջապատված եմ մարդկանցով, որոնք չգիտեն Երկնային Հոր և Հիսուս Քրիստոսի մասին: Երբ նրանք իմանում են, որ իրենք Աստծո զավակներն են, և Նա ծրագիր ունի իրենց համար, դա փոխում է իրենց կյանքը: Տպավորիչ է, երբ կարող ես տեսնել դա ու դրա մի մասը լինել: Ես դա հասկացել էի իմ միսիայից առաջ, բայց հիմա գիտեմ, որ Հիսուս Քրիստոսի ավետարանը կարևոր է ուրախության համար՝ այս և գալիք աշխարհում»:

Այն երիտասարդներին, որոնք մտածում են միսիայում ծառայելու մասին, Հերմանա Քրիստենսենն ասում է. «Հավատք ունեցեք և մի վախեցեք: Միսիայում ծառայելը հեշտ չէ, բայց արժե ապրել այդ փորձառությունը: Աստված կօրհնի ձեզ աներևակայելի ուղիներով, երբ դուք որոշում կայացնեք լինել Նրա ծառաներից մեկը»:

Չնայած Հերմանա Քրիստենսենը միսիա ծառայելու ընթացքում կարոտում է տներ կառուցելը, նա չի զղջում իր կատարած ընտրության համար: «Իհարկե, իմ բիզնեսը կարող էր պոտենցիալ աճ ունենալ, քանի դեռ ես լիաժամկետ միսիոներ եմ»,- ասում է նա: «Բայց ես գիտեմ, որ Տերը կօրհնի իմ զոհաբերությունը, եթե ես այն որոշ ժամանակով մի կողմ դնեմ: Իմ գործը կարող է սպասել, բայց Տիրոջ աշխատանքը՝ ոչ»։