“Karōk eo Eaiboojoj,” Jera, M̧aaj. 2026, 4–7.

Karōk eo Eaiboojoj

Kōmeļeļe eo an juon mejatoto eo eobrak kōn iju ko ilan̄

M̧okta jān ad kar itok n̄an laļ in, Jemādwōj Ilan̄ ekar wōr juon an karōk eaiboojoj n̄an kōj. Jenaaj maron̄ ļotak im katak im eddōkļo̧k ioon laļ in. Jemaron̄ ļoor iaļ in bujen eo An im kōm̧m̧ani kāālet ko rem̧m̧an.

Jemādwōj Ilan̄ ekar jeļā bwe jenaaj aikuj jipan̄. E ekar jeļā bwe jenaaj kōm̧m̧ani kāālet ko rebōd im jet iien jerawiwi. Jeban kar maron̄ ro̧o̧l n̄an Ippān eļan̄n̄e jeban erreo.

Jej aikuji juon armej ejenolo̧k n̄an jipan̄ kōj bwe jen maron̄ erreo jān jerawiwi ko ad. Jisōs Kraist ekar m̧aanje in Jetōb M̧aan eo Nejin Jemādwōj Ilan̄. E ekar kajjitōk bwe en itok n̄an laļ in im lo̧mo̧o̧ren kōj jen jerawiwi ko ad.

Pija in Rikanpil ro rej ļoorļo̧k iju in Kūrijm̧ōj eo ioon kamōļ ko

Ium̧win bukwi iiō ko, armej ro rekar kōttar an Jisōs ļotak. Āliktata, juon iju kāāl ekar rom̧aak ilo mejatoto n̄an kwaļo̧k n̄an laļ in bwe Rilo̧mo̧o̧r em̧ōj an itok.

Ke Jisōs ekar rūttoļo̧k, E ekar katakin armej ro gospel eo. E ekar jouj im iakwe. E ekar kōjeram̧m̧an ajri ro.

Pija in Rilo̧mo̧o̧r an kōmour juon leddik enan̄inmej ilo jikin eo ej babu ie.

E ekar katakin bwe jej aikuj in ļoor E im kōm̧m̧an n̄an ro jet āinwōt E enaaj kar. E ekar kōmour armej ro rekar nan̄inmej. E ekar kōro̧o̧ltok armej ro rekar mej n̄an mour.

Pija in an Jisōs Kraist jar ilo Getsemane

Jisōs ekar jeļā ekar iien n̄an kabwilōn̄lōn̄ eo An eļaptata. E ekar etal n̄an Jikin Kallib Gethsemane im jar. E ekar en̄jake metak kōn aolep jerawiwi ko ad im būrom̧ōj im nan̄inmej.

Jet armej rekar illu ippān Jisōs Rekar jab kōņaan ta eo E ekar katakin im kar jab tōmak bwe E ekar Nejin Anij. Jisōs ekar kalbuuj im kar dilaiki n̄an juon debwāāl, ijo E ekar mej ie.

Juon kūrub in ribūrom̧ōj ro rej kōpooje ānbwinnin Jisōs ilo lōb eo

Ro m̧ōttan Jisōs rekar lukkuun būrom̧ōj. Rekar kōbabuik Ānbwinnin ilo juon lōb im kōdābwili juon dekā kileplep n̄an m̧aan kōjem̧ eo an.

Jilu raan ko tokālik, jet kōrā rekar etal n̄an lōb eo. Ejm̧aan eo em̧ōj kajbwilļo̧k, im lōb eo ekar ejjeļo̧k kobban! Meri Magdalene ekar jino jan̄ kōnke ānbwiinin Jisōs ekar jako. Juon em̧m̧aan ejouj ekar pād epaak ekar kajjitōk ippān liin etke ekar jan̄. Ke liin ekar jiron̄ ļein, ekar an̄inn̄ini liin kōn etan. Liin ekar reilo̧k n̄an E im kar loe bwe E ekar Jisōs! E ekar bar mour!

Pija in jerkakpeje Rilo̧mo̧o̧r ej waļo̧ktok n̄an Meri Magdelene

Ilo Ijtō jej keememe ta eo Jisōs Kraist ekar kōm̧m̧ane n̄an kōj. Kōnke kōn E ekar en̄taan kōn kōj, jemaron̄ ukweļo̧k im maron̄ erreeo. Kōnke kōn E ekar jerkakpeje, jenaaj barāinwōt mour! Kōnke kōn E, jemaron̄ bar ro̧o̧lļo̧k n̄an ippān Jemādwōj Ilan̄ im pād ippān baam̧le ko ad n̄an indeeo.