“Lima Gau a Lenkana,” Uo, Fepuari 2026, 38–39.

Lima Gau a Lenkana

Saunia e Kelvin Njenga

E faapefea ona ou taalo i taaloga? O le a faapefea ona ou maua le fiafia?

O se tala moni mai Kenya.

“Alu pea, Lenkana!” Sa ee atu ai Gideon.

Sa ataata Lenkana ma tamoe saoasaoa atu, ma taulai atu ona mata i le polo soka.

Sa fiafia Lenkana i taaloga. Pe sa taalo o ia i fafo ma ana uo ina ua tuua le aoga po o lana komepiuta i le fale, sa le mafai ona ia le ataata ma ata. Ia Lenkana, o taaloga o le auala sili lea e lagona ai le fiafia. Aua, e mafai faapefea ona ia lagonaina le fiafia pe afai e le faia mea malie?

Sa tamoe Lenkana i le vave na te mafaia ia oo atu ai le polo. Ae na faafuasei lava—PA! Sa sulu ma pau malosi i luga o le malae. Na oo le tiga i lona lima.

“Auoi!” sa ia tagi ai. Sa faapotopoto ana uo e siomia o ia.

Ata tusi o se tamaitiiti faanoanoa o loo nofo ma faalagolago atu i lona lima ma se polo soka e lata ane

Sa valaau atu Gideon mo le tina o Lenkana ma fesoasoani ia te ia e nofo i luga. Sa tiga tele le lima o Lenkana ma sa le mafai ai ona ia taofia le maligi ifo o ona loimata. Sa faanatinati atu lona tina ma vave ona ave o ia i le falemai.

I le falemai, sa siaki ai e le fomai lona lima. “E i ai se tamai gau,” o lana tala lea. “O le a matou fasimaina lou lima, ma o le a vave ona manuia.”

Sa lagona e Lenkana le faanoanoa. “O le a faapefea ona ou taalo i taaloga? O le a faapefea ona ou maua le fiafia?”

Sa uu e Tina lona lima lelei ma ataata. “O le a e manuia. Ae mo le taimi nei, sei o tatou sailia se isi mea e te fiafia ai. ”

I lena afiafi sa saofai ai Lenkana i luga o lona moega, ma lagona o le le fiafia. Sa tiga lona lima, ma sa le mafai foi ona ia faaaogaina le komepiuta e taalo ai i ana taaloga e sili ona fiafia i ai.

Ona oso ane lea o se manatu i lona mafaufau. Pe a ou lagona le faanoanoa, e mafai ona ou faitau e uiga ia Iesu.

Sa ia pikiina i luga ana tusitusiga paia ma sue i le tusi a Mataio. Sa ia faitau e uiga i le soifua mai o Iesu Keriso. Ona ia liliu atu lea i le tala ia Ioane le Papatiso o loo papatisoina Iesu. O ana tala nei e sili ona fiafia i ai i le Tusi Paia. I lona faitauina na ia lagonaina ai le mafanafana i totonu.

Atatusi o se tamaitiiti o loo faitauina tusitusiga paia ma lona lima i se fusi

O le taimi lava lena, na savali atu ai lona uso laitiiti i totonu o le potu.

“Ei, Lenkana!” na ia fai atu ai. “Mate mai po o ai a’u!”

Sa faia e lona uso ni foliga malie. E lei umi, ae ata Lenkana a o la taaalo i se taaloga taumatemate. Sa lagona le fiafia o lona loto.

O le Aso Sa na sosoo ai, na vaai ai Lenkana ia Gideon i le lotu.

“O a mai lou lima?” Sa fesili atu ai Gideon.

“O loo tiga laitiiti pea,” o le tala lea a Lenkana. “Ae o loo ou fiafia i totonu.”

Sa faapio e Gideon lona ulu. “O le a le mea na e fiafia ai?”

Sa ataata Lenkana. “Lo’u aiga, lo’u uso, ma Iesu!”

Sa ata Gideon. “O se tali lelei lena.”

A o latou saofafai i le Peraimeri, sa faalogologo Lenkana i le lesona e uiga i le Togiola a Iesu Keriso. Sa faamatala e ona faiaoga le ala na puapuagatia ai Iesu ina ia mafai ona toe faatasi tagata uma ma le Tama Faalelagi i se aso. Sa latou fai mai e malamalama Iesu i o tatou lagona uma—lagona faanoanoa ma fiafia foi.

Sa fiafia atili le loto o Lenkana a o ia faalogo. Sa ia iloa e tusa lava pe le malie tele le olaga, e mafai lava ona ia agai pea i luma. O le a fesoasoani lona aiga e faafiafia o ia, ma o le a fesoasoani Iesu Keriso ia te ia ia malosi. Sa le tuua lava na o ia.