O Lima Fesoasoani Fiafia

Sa fiafia Yu-Qian ma Yu-He. Ua oo i le taimi e faamanatu ai le Tausaga Fou Lunar! Sa latou faatalitali i le tausaga atoa mo lenei aso faapitoa.

I lena po, o le a faapotopoto ai lo latou aiga atoa mo se pati tele. O le a i ai meaai mananaia ma faapapa matagofie i le lagi. Ma o le a maua uma e Yu-Qian ma Yu-He se teutusi lanumumu ma se tupe laki.

Ae e le o tagata uma o le a faamanatuina i le po nei e pei ona latou faia. Sa toatele tagata e lei i ai se fale po o se aiga foi. O lenei mea na faanoanoa ai Yu-Qian ma Yu-He Sa mananao e fesoasoani. O lea sa latou filifili ai e fai ni meaai mo tagata o e sa manaomiaina. Sa latou vaavaai atu ma le naunautai mo Mama e sau i le fale ma sapalai.

Mulimuli ane, na taunuu Mama ma lana uo o Mavis ma meaai. Sa tamoe Yu-Qian e fesoasoani ia i laua e ave ia ato.

“Ua e toe foi mai!” o le tala lea a Yu-He. “Na e mauaina mea uma?”

“Ioe!” o le tala lea a Mama. “O le a tatou kukaina le tele o polesi talo ma pai fuamoa e faasoa atu.”

Mo nai itula na sosoo ai, sa galulue malosi ai Yu-Qian, Yu-He, Mama, ma Mavis e fai meaai. Ina ua maea, sa i ai ni a latou koneteina e 20 o polesi talo ma pai fuamoa e 30! Sa tele foi a latou pusa e i ai solo pepa, fusi, solo lima, ma totini.

“E mafai ona ma fesoasoani e tiliva mea uma?” o le fesili lea a Yu-He.

“Ua na ona tatou momoliina lava i le nofoaga o nofoaafi,” o le tala lea a Mavis. “O le a tuuina atu e se vaega o le alofa mama mea uma i tagata e manaomia.”

“E le afaina,” o le tala lea a Yu-Qian. “O loo ma mananao pea e o!”

Sa ataata Mama. “Ou te mitamita ia te oulua teineiti mo le tuuina mai o lua taimi i le aso malolo e fai ai lenei mea.”

Ina ua uma ona latou tuuina atu sapalai, sa faatofa atu Mavis ma alu loa i le fale.

“O le taimi mo i tatou e o ai foi i le fale,” o le tala lea a Mama.

“Faatali,” o le tala lea a Yu-He. “E mafai ona tatou faatali ma matamata atu ia i latou o tufa meaai?”

Sa mafaufau ia Mama. “Ua lelei, o loo i ai lava sina taimi. Sei o tatou matamata atu iinei.”

Sa faatalitali teineiti ma Mama i fafo o le nofoaga o nofoaafi. Sa latou matamata a o tuuina atu e tagata o le alofa mama ni meaai ma ni pusa i tagata o e na faapotopoto i fafo. Sa foliga matuai fiafia lava tagata!

Na tusi atu Yu-Qian. “Vaai! O a tatou pai fuamoa na!”

“Ma a tatou pusa o sapalai!” sa fai mai ai Yu-He.

Sa amata ona filemu teineiti. Sa i o la luga se lagona masani, ma lagona ai e o la loto le mafanafana i totonu. Sa la iloa e mai le Agaga Paia.

A o agai atu i le fale, sa lei mafaufau Yu-Qian ma Yu-He i meaai, meaalofa, faapapa, ma taaloga sa faatalitali mo i laua. Sa la mafaufau e uiga i tagata sa latou fesoasoani i ai.

“Mama, o le a le mau e te tautala soo ai lava?” Na fesili ai Yu-Qian. “O le tasi lea na fetalai i ai Iesu, ‘o se e aupito itiiti o i latou nei’?”

“‘E moni, ou te fai atu ia te outou, auā na faia e outou i le tasi e aupito itiiti o o’u uso nei, o a’u lea na outou faia i ai,’” sa tauloto e Mama.

Sa ataata Yu-Qian ma Yu-He o le tasi i le isi. Sa la fiafia ua mafai ona latou faia se mea faapitoa mo Iesu Keriso i lenei po faapitoa.

Tatala le PDF

Ata na tusia e Valentina Fontana