“O Le Pepelo i le Suega Cheetah,” Uo, Fepuari 2026, 34–35.
O Le Pepelo i le Seuga Cheetah
E leai se tasi o le a iloa pe na faaauau pea ia ona alu. Sa le o se mea tele, a ea?
O se tala moni mai le ISA.
Sa uu mau e Emma lana penitala a o tufa atu e lana faiaoga ia pepa.
“Ua oo i le taimi mo la tatou Suega Cheetah,” o le tala lea a Ms. Malcolm. “E lima minute e te taliina ai fesili e 93 o le matematika. O tagata uma e faamaeaina i le taimi sao e mafai ona faaopoopo se sitika cheetah i la latou siata.”
Sa matuai manao lava Emma i se sitika cheetah. Afai e lima ou sitika, o le a e manumalo i se taui! Ae sa matua faigata lava fesili matematika o le Suega Cheetah.
“Ua sauni tagata uma?” Na faimai ai Ms. Malcolm. “Amata!”
Sa susue e Emma lana pepa ma amata ona tali fesili. Sa tatau ona ia mafaufau ma le totoa i mea taitasi. Sa faigata!
B ZZZZZZZ! Sa uma le taimi, ma oso ai i luga Emma.
“Penitala i lalo!” Sa valaau mai ai Ms. Malcolm.
Sa nana e Ema lana pepa i lona lima ma faaauau pea ona tusi tali. E le o se mea telē pe afai na te faaauau pea, a ea? Sa ia faia muamua, ma e leai se tasi na matauina.
“Pasi atu lau pepa i le tagata o loo i ou autafa mo le togiina,” Na fai mai ai Ms.Malcolm.
Sa faauma e Emma le tali mulimuli a o lei pasia lana pepa.
Ina ua toe maua mai e Emma lana pepa, sa ia vaaia le 100% lanumumu i le pito i luga. Ae na te lei maua se lagona lelei tele i totonu.
“O mai tagata uma e faaali mai ia te a’u tou pepa e auvatu ai tou sitika,” Na fai mai ai Ms. Malcolm.
Sa savali atu Emma i le kesi a Ms. Malcolm ma lana pepa.
“Emma, e mafai ona e nofo iinei mo se minute, faamolemole?” O le fesili lea a Ms. Malcolm.
A o talanoa isi tagata uma, sa faliu atu Ms. Malcolm ia Emma. “Na e taliina pea fesili e ui lava ina ua uma le taimi?”
Sa matuai vevela lava foliga o Emma. Sa lue lona ulu ma tilotilo ifo i lalo. “Ioe.”
“Na e faia muamua lena mea?”
Na lūlū le ulu o Ema. “Leai.” Ae sa ia lagonaina le mumu atili o ona foliga. Sa ia faimamago muamua. Ao lenei ua pepelo o ia.
“E le mafai ona ou tuuina atu ia te oe se sitika cheetah sei vagana ua e mulimuli i tulafono. Ua e malamalama?”
Sa lue le ulu o Emma. Ona ia savali atu lea i lona nofoa ma ona mata i lalo.
Mo le vaega na totoe o le aso aoga, sa lagona e Emma se faapona leaga tele o lo o femilosai i lona manava. Sa ia lagona le faanoanoa mo le faimamago. Sa ia lagona le faanoanoa mo le pepelo. Sa le fiafia o ia i lenei lagona!
Ina ua tuua le aoga, sa talanoa atu Emma i lona Tina. “Ou te le o maua se lagona lelei tele,” o lana tala lea.
“O le a le mea ua tupu?” O le fesili lea a Tina.
Sa faafuasei ona popole Emma. Pe tatau ona ia ta’u atu ia Tina le mea sa ia faia?
Sa manava loloa o ia. “Sa ou faimamago ananei i le aoga.” O le taimi muamua lea sa ia tautino leotele ai. Sa lagona e pei o le faapona i totonu o lona manava ua matalatala. “Ma sa ou faia muamua foi. E le lelei la’u faalogona. ”
Sa fusi e Tina Emma. “Faafetai mo le ta’uina mai ia te a‘u. E te iloa e sese le faimamago. Aisea na e faia ai?”
“Ona sa ou matuai manao lava i se sitika cheetah, ae ou te lei faamaeaina ia fesili o le matematika i le taimi e tatau ai.”
Sa lue atu le ulu o Tinā. “O le a sou manatu i le mea e tatau ona e faia i le taimi nei?”
Sa mafaufau i ai Emma. “E tatau ona ou faia se tatalo i le Tama Faalelagi e faamalie atu ai mo le le faamaoni. Ona ta’u atu lea i lo’u faiaoga.”
“E manaia tele lena mea.” Na ataata Tinā. “Ma e mafai ona ou fesoasoani ia te oe e faataitai atili le matematika ina ia e saunia ai mo le isi Suega Cheetah.”
“Faafetai, Tina,” o le tala lea a Emma. Ona la tootutuli lea ma Tina e fai se tatalo. Sa lagona e Ema le mafanafana. Sa fiafia o ia ona sa ia filifili e salamo.
Ina ua uma ona ia tatalo, sa tusi atu e Emma se imeli i lona faiaoga. Sa ia ta’u atu le mea moni ma faamalie atu mo le faimamago. Sa ia folafola atu o le a ia le toe faia.
Ina ua uma ona kiliki le auina atu, sa lagona e Ema le sili atu ona lelei. Sa ia iloaina atonu o le a oosi e Ms. Malcolm ana sitika cheetah mai lana siata. Ae sa le afaina lena. Mai le taimi nei o le a ia mauaina i latou i le ala sao.
Ata na saunia e Anny Chen