“E Aoga Ia te A’u,” Uo, Fepuari 2026, 22–23.
“E Aoga ia te A’u”
Sa le mautinoa e Max le tala e fai atu, ae sa ia iloa ona lagona.
O se tala moni mai le ISA.
Sa lue le ulu o Max i le fati ma le pese o loo taina i luga o le leitio o le taavale. Sa le mafai ona ia faatali! O le asō sa ave ai o ia e Tina e taaalo ma lona tausoga, o Preston. Ae na oo mai loa le vaega e sili ona fiafia i ai o le pese, sa ki i lalo e Tina le musika. O le a ia fai atu ia te ia e toe ki i luga ae ia vaaia ona foliga i le faaata i tua. Sa lagona e ia sina faanoanoa laitiiti.
“O le a le mea ua tupu?” O le fesili lea a Max.
“E i ai se mea ou te talanoa atu ai ia te oe ae tatou te lei oo atu i le fale o Preston,” o le tala lea a Tina. “Ua filifili le aiga o Preston e le toe o i le lotu.”
Sa papatisoina Max ma Preston i le aso lava e tasi. Sa mafaufau o ia i taimi uma sa la o faatasi ai i le lotu. Sa faanoanoa ai o ia i le mafaufau atonu e le toe tupu lena mea.
“Aisea?” O le fesili lea a Max.
Sa mapuea Tina. “Ia, e le toe talitonu ona matua o toe moni le Ekalesia. Sa fai si le fiafia o Aunt Abby ia te au i le isi aso ina ua ma talanoa e uiga i le lotu.”
Sa lagona e Max se faapona i lona manava. “Ae faapefea pe afai e le fiafia foi Preston ia te au?” sa musumusu atu ai Max.
Sa toe tilotilo atu Tina ia Max i le faata. “Afai e te le o mautinoa po o le a se tala e fai atu, tau lava o le faalogo. O le a fesoasoani le Agaga Paia ia te oe ia iloa le mea e fai. Po o le a lava, o i latou o o tatou aiga, ma o le a tatou alolofa pea ia i latou.”
Sa fai si popole o Max ina ua ia taunuu atu i le fale o Preston, ae sa vave lava ona amata ona la talanoa ma taaalo e pei ona masani ai. Ina ua maea le la tauvaga tafiti i le tapoleni, sa la o i totonu mo se vaiinu. Na iloa e Max ua toeitiiti lava oo i le taimi e piki ai o ia e Tina.
“E tatau ona ou alu vave,” o le tala lea a Max. “Maimau pe ana mafai ona ou nofo umi.”
“E tatau ona e nofo i le po!” Sa tuu atu e Preston ia Max se ipu vai.
Sa inu e Max se meainu. “Ou te le mafaia. E tatau ona ou alapo taeao.”
“Mo le lotu?” Sa ata Preston. Sa le o se ata faauo. Sa le’i fiafia Max i le auala na foliga mai ai.
“E tatau ona e faamisi le lotu,” o le tala lea a Preston. “Nofo ii. O le a ta momoe ona taaalo lea i le aso atoa. Afai e te alu i le lotu, e tatau ona e selu lou lauulu ma nofo filemu a o talanoa tagata e uiga i mea e le manaia.” Sa moeiini ona mata ma faafoliga ua moe. Ona pupula lea o ona mata ma toe ata. “Pe aoga moni ea?”
Sa popole Max. O a mea e tatau ona ou fai atu? Sa ia mitiina lana vai, manava loloa i totonu, ma tatalo leoleoa ia iloa le tala e fai. Ona ataata lea o Max ma fai mai faigofie, “Ia … e aoga ia te au.”
Sa luelue lemu le ulu a Preston. “Ua Lelei!” o lana tala lea. “Manaia lena. Ou te faamoemoe lava e mafai ona ta toe taaalo
vave.”
“O a’u foi,” o le ataata lea a Max.
A o agai atu i le fale, sa ta’u atu e Max ia Tina le mea na tupu.
Sa faalogo filemu tina ma ataata. “Vaai laia? Sa e faalogo i le Agaga Paia, ma sa e iloa le mea tonu e te fai atu ai.”
Sa ia lagona le fiafia. Sa fiafia o ia ona sa fesoasoani le Agaga Paia ia te ia ia lototele ma tu atu mo le mea sa ia iloa e sa’o.
Ata na tusia e Kavel Rafferty