“O le Galuega Faapitoa a Bristol,” Uo, Fepuari 2026, 26–27.

O Bristol le Molimau o le Papatisoga

Saunia e Amberleigh Broker

O se tala moni mai le ISA.

Talofa! O a’u o Bristol. O le avea ma se molimau i le papatisoga o lo’u tuagane o le mea SILI LEA!

Ina ua ou papatiso, sa i ai ni a’u molimau se toalua: o lo’u uso ma lo’u tuagane matua. O se molimau o se tasi e tu i tafatafa o le faatanoa ina ia mautinoa o loo faia le papatisoga i le ala na aoao mai ai Iesu Keriso.

Afai e te le lilo atoa i lalo o le vai pe sese le tatalo, e tatau ona toe faia le papatisoga. I lo’u papatisoga, sa toetoe lava a oso ae lo’u vae mai le vai.

Sa matuai o’u popole lava, ae sa vaavaai toto’a molimau, ma sa iloa ai e le’i aliali lava lo’u vae mai fafo o le vai.

Sa matuai ou FIAFIA lava ina ua ou iloa e mafai foi ona avea au ma se molimau pe a uma ona ou papatiso. Sa papatisoina lo’u tuagane laitiiti o Ryland i le tausaga na sosoo ma a’u. Sa ia fai mai ia te a’u e avea ma se molimau!

Sa ou fai atu ioe (o lea lava), ae i le taele o lou loto, sa fai si ou popole. Sa tele au fesili! O fea e tatau ona ou tu ai? Oa mea e tatau ona ou fai atu?

Ae, e le tatau ona e popole! Sa ou fesili atu i a’u fesili uma, ma e i ai sa’u fautuaga mo outou:

Atonu e i ai se faaata e fesoasoani e vaai ai i totonu o le faatanoa. Ae e tatau ona e matamata i le papatisoga, ae le o le faaata. Tu latalata ina ia mafai ona e vaai i mea uma!
Pe a sa’o le faatinoina o le papatisoga, ataata ma luelue lou ulu. Afai e te matauina e tatau ona toe faia le papatisoga, ta’u lemu atu i le tagata o loo faatinoina le papatisoga.
Aua le fefe e fesili atu! Ina ua ou popole, sa ou talanoa i lo’u tama. Sa ia faamatala mai le mea atoa ia te a’u.

Ua ou matua fiafia lava ona sa avea a’u ma se molimau mo lo’u tuagane. Atonu e i ai se aso e mafai ai foi ona avea oe ma se molimau!