Juon Ijjino Kāāl

Alexandre eaar erom ruwalitōk an iiō ilo jejjo wōt raan ko! Ear lukkun m̧ōņōņō kōnke e im jemān raar karōke juon iien kōm̧ao lal n̄an kōļo̧k eo aurōk n̄an e bwe en m̧ōn̄ā ālkin jikuuļ. Ke mijenede ro kar jāde tok n̄an kejota, Alexendre ear jiron̄ er kōn pilawā jokoleej ko renno ear kāāleti.

“Jenaaj pād ruwalitōk iaer ippān juon kāāntōļ n̄an kajjojo, ijelo̧kin juon cake ippān ruwalitōk kāāntōļ!”

Elder Lauener ear ettōn̄. “Em̧m̧an wōt n̄il itok in. Kakoņ jidik n̄an n̄a!”

Ālkin kejota, mijenede ro raar katakin juon katak kōn peptaij. Elder Doyon ear jitļo̧k n̄an Alexandre. “N̄e kwoj peptaij, kwoj kallim̧ur n̄an ļoor Jisōs Kraist.” Ear jiron̄ Alexandre kōn peptaij eo an make im kar kwaļo̧k an naan in kam̧ool. “Jetōb Kwojarjar ekar jipan̄ eō n̄an en̄jake m̧ōņōņō kōnke raan eo iaar kāālet n̄an ļoor Jisōs Kraist.”

Alexandre ejjab maron̄ kōttar n̄an raan in peptaij eo an!

Ak ke ear tōn kiki bon̄en eo, ear ļoe an kar pen n̄an kiki. E ear em̧m̧an ippān lōm̧ņak eo n̄an wōt erreo im kāāl. Ak ekōjkan an maron̄ erreo wōt ālkin peptaij?

Jibbon̄ eo tok juon Alexandre ear etetal n̄an jikuuļ ippān jemān. “Kwaar lukkun ejjeļo̧k am̧ naan kiiō jibbon̄,” jemān ar ba. “Ewōr ta aban̄?”

Alexandre ear bōk kitwōn. “Ikōņaan bwe in maron̄ kar peptaij elōn̄ļo̧k jān juon alen.”

“Etke?” Baba ekar kajjitōk.

“Enaaj bar elmen aō pād wōt ilo erreeo ālkin aō kar peptaij?” Alexandre ear kajjitōk. “Ij meļo̧kļo̧k men aolep iien—āinwōt ba iakwe im kom̧m̧ool n̄an rūtto ro im kijenmej wōt ippān ļaddik eo jatū. Ijeļā ke inaaj baj kōm̧m̧an wōt elōn̄ bōd. Kwoj wōtbōk juon kattōn peptaij, kin menin ijamin bar erreo rōt in.”

Jemān ar bōjrak im kalimjōk lowaan mejen Alexandre. “Uwo̧k. Jon̄ane bōlen menin eddo jidik. Kwoj ke keememej ke jaar kōnono kōn kōm̧m̧an kallim̧ur ilo peptaij?

Alexandre ar emajidjid. “Ij ļōmņak āindein.”

“Tōre ņe kwar bpeptaij, kwoj kōm̧m̧ane juon bujen ippān Jemedwōj Ilan̄. Kwoj kallim̧ur n̄an kōjparok kien ko An im ļoor Jisōs Kraist. Ālkin menin, aolep iien kwoj bōk kwojkwoj eo, komaron̄ keememej im wāween An maron̄ jipan̄ eok ukweļo̧k.”

Mejān Alexandre ear kilepļo̧k. “Innām imaron̄ en̄jake erreo āinwōt iien eo iar peptaij?”

“Elukkun jejjet,” jemān ear ba. “Jemedwōj Ilan̄ ejeļā ke kojjab weeppān, im jet iien konaaj kōm̧m̧ani kāālet ko rebōd. Ak n̄e kwoj jerawiwi, komaron̄ ukweļo̧k im kajjieon̄ n̄an ļoor Jisōs. Ej ke juon men komaron̄ kōm̧m̧ane?”

Alexandre ear ettōn̄ dikdik. “Aaet! Ij ļōmņak imaron̄ kōm̧m̧ane men ņe.”

Ke ejejjōt raan in kōļo̧k eo an Alexandre, baam̧le eo an raar m̧ōn̄ā kōm̧aolaļ in kōļo̧k eo an ālkin m̧ōj jikuuļ. Ekar enno! Im ilo peptaij eo an, Alexandre ear en̄jaake eļapļo̧k an em̧m̧an ilowa tōre eo ear waļo̧ktok jān dān eo. Ear kallim̧ur in ļoor Jisōs Kraist, im menin ekar juon en̄jaake ekabulōn̄lōn̄!

Wiik eo Alexandre ear kajjieon̄ jon̄an wōt an maron̄ n̄an kōjparok bujen ko an rekāāl im jouj wōt n̄an ļaddik eo jatūn. Ak ke Jabōt eo juon ear itok, e ear inepata wōt jidik. Ear en̄jake einwōt emaron̄ kar kōm̧m̧an jet kāālet ko rem̧m̧anļo̧k wiik eo.

Ilo iien eo kwojkwoj eo ekar ajeej, Alexandre ear po̧kpā im kar jillo̧k. Ear unoojdikdik im kajjitōk ippān Jemedwōj Ilan̄ n̄an jipan̄e kōm̧m̧an em̧m̧an elapļo̧k wiik eo tok āļik. Ear ļōmņak kōn jon̄an an Jisōs kar iakwe e im wāween an kar kōņaan bwe en āinwōt E.

Ke ej bōk m̧ōttan pilawā eo jān pilaij in kwojkwoj eo, Alexandre ear en̄jake okm̧āņāān im aenōm̧m̧an itulowa. Ear en̄jake ejja einwōt an kar en̄jake ilo raan in peptaij eo an! Jemān ear likūt pein jepooļe iaeran Alexandre im leļo̧k juon ettōn̄dikdik.

Rainin ej jinoin juon wiik ekāāl, im Alexandre enaaj etal in kōm̧m̧ane jon̄an wōt an maron̄—kōn jipan̄ eo an Jemedwōj Ilan̄.

Kōmeļeļe ko jān Toby Newsome