Jera Tūrabōļ

Matt ej bwijjikeļo̧k juon dekā ke ear etetalļok n̄an m̧weo. Ejjab maron̄ bukōt mejlan. Ebajeet ke an en̄jaake ejab em̧m̧an?

Ear kijon̄ ito itak ippān ļaddik eo m̧ōttan, Josep. Ak Josep āinwōt ear jab itok limoon, im Matt ear ilo jemļo̧kin ear m̧ōkaj an rool n̄an m̧weo m̧ōn jen an kar karōke.

Bōlen n̄aij ļōkōm̧ e, M̧att ear ļōm̧ņak. Bōlen Josep ej baj bed bajjok raan eo.

Raan eo juon ke Matt ear tōparļo̧k ilo jikuuļ, ear lo Josep ej bwebwenato ippān bar jet m̧ōttan. Matt ear kūri im kar jopāļe pein. Josep ear reilo̧k ikijeen ijo Matt ej pād ie, ak ear jab jopāļe pein ļo̧k. Ear oktak likļo̧k n̄an ro m̧ōttan.

Josep ear jab lo eō, Matt ear jiron̄ e make.

Ilo iien kūlaaj ke ekar iien jerbal ilo kurub, Matt ear etetal jibadōkļo̧k Josep. “Kwōj kōņaan ke leiaia?” Matt ear kajjitōk.

Āinwōt n̄e Josep ear jab ron̄ an kenaan. “Bōjrak, Mike,,” Josep ar ba n̄an ļaddik eo ej jijōt turin. “Kōjro etal in jerbal ijuweo.”

Ļaddik ro ruo raar etetal ettoļo̧k. Lo̧jeen Matt ear eddo an en̄jaake. Juon men ekar lukkun kakure an Josep ainem̧m̧an. Ak ta?

Matt ejjab maron̄ kar ļōmņake jabdewōt ear kōm̧m̧ane n̄an kōm̧m̧an bwe Josep en illu ippān. Aaet, jet iien rej pād ilo tiim ko rej jelm̧an doon ilo aer ikkure iākiu ilo iien kakije. Ak aolep iien rej kile doon kin high five ālkin. Etke āinwōt ij en̄jaake ke Josep ear kāālet n̄an an pād ilo tiim eo juon ilo aolep men?

Men wōt n̄e in kōnnaan ippān Josep ilo iien kakije, Matt ear ļōmņak.

Ilo iien kakije, Matt ear ettōrļo̧k n̄an kobaļo̧k ippān ajri ro jet ioon jikin ikkure eo.

“A, Josep!” Matt ear ikkūr. “Imaron̄ ke kōnnan ippam ilowaan wōt juon minit?”

“Ikkure eo ej bojak in ijjino,” Josep ear ba.

“Em̧m̧an, ij iwōj im m̧am̧aru iturim̧ im jemaron̄ kōnnan,” Matt ear ba.

“Kolukkun rum̧ij. Ejjeļo̧k pelļo̧k ilo ije ippa,” Josep ear ba ejja iien eo ej ettōr in kobaļo̧k ippān tiim eo an.

Matt ear alooj ke aolep rar jino in ikkure. Kobain elōn̄ armej ejjab kar kijon kakure an Josep ainem̧m̧an jinoun. Aolep rar aolep iien ruwanene.

Ak Matt lukkun m̧ool ear jab en̄jake an ruwanene ippān Josep. Etke Josep ejaam earkōm̧m̧an jekjek rōt in? Etke e ear jab kobaik e? Matt ear jab kōm̧m̧an jabdewōt bōd!

“Josep eo ej kōm̧m̧ane juon men ko ebōd,” Matt ear ba n̄an jinen im jemān ilo aer kejota. “Ejjab maron̄ in kōnnaan tok ippa im jiron̄ eō ta eo ej illu kake!”

“Āinwōt epen men ņe,” M̧am̧a ear ba.

Matt ear en̄jake bwil in kemjaļaaļ ilo mejān. “En̄jaake e āinwōt ear kajju bōjrak jān an juon m̧ōtta, im ijjab jeļā etke.”

“Eļap an utiej buruō kōn am̧ kajjieon̄ kenono n̄an e kake,” Baba ear ba. “Bōlen komaron̄ kajjieon̄ ba n̄an e wāween am̧ en̄jake im bwe koknaan jipan̄.”

Matt ear nokjōk. Jekjek in ialan an Josep m̧akūtkūt, Matt ar jab lukkun jeļā eļan̄n̄e Josep enaaj kar ron̄jake e.

M̧am̧a ear keen̄ pein Matt. “Jenaj bar jar kake eok, im kōn Josep.”

Bon̄en eo ilo an Mattpojak n̄an kiki, ear ļōmņak kōn ta eo M̧am̧a im Baba raar ba. Ear kajoor jar kōn ro m̧ōttan m̧oktaļo̧k elan̄e rej inebata ak ioon men ko reppen. Ak menin aer oktak, m̧ool ke? Josep ear e eo ear nana n̄an e.

Kiiō etke jinen im jemān Matt rej jar kōn Josep? Ej ke aikuj bar jar kōn Josep?

Matt ar bukwelōlō turin peet eo kineen. “Jema llan̄, elukun pen aō jab illu ippān Josep,” Matt ear jar. “Ij maron̄ eļā ke ellu, ak ejan̄in kar ba n̄an eō ta eo ej kabōņōņōik e.”

Matt ear bōjrak. “Ikōņaan kōnaan ippān, ak ijjab lukkun jeļā n̄e en ba ta eo ebōd. Jouj im jipan̄e kōn jabdewōt men eo ej kabōņōņōik e. Im jekdoon ta enaaj waļo̧k, jouj im jipan̄ eō bed wōt im jouj n̄an e.”

Ilo an Matt jar, ear jino en̄jake aenōm̧m̧an itulowa. Ear jeļā ke Jemedwōj Ilan̄ im Jisōs Kraist raar ro m̧ōttan rem̧m̧antata. Remaron̄ jipan̄e iakwe Josep, jekdoon ta eo Josep ear kālet n̄an kōm̧m̧ane. Im remaron̄ pād n̄an e jekdoon n̄e Josep eban kar pād eo m̧ōttan.

Matt ear etōn̄dikdik. Jar kōn Josep ear juon ļōmņak eo em̧m̧an āļkin men otemjej.

Kōmeļeļe ko jān Mark Robison