Juon iien Bwebwenato ippān Emily kōn Peptaij

Em̧m̧an ippa uno, pija, kōmat kōm̧aolaļ, kōm̧ani kapeel ko ao, im eb im al ippān ro jeiū im jatū. Ebar em̧m̧an ippa etal n̄an jikin lale menin mour eo an jim̧m̧a im uwe ioon kidia ko.

ilo iien nokon in jota, jinō im jema raar katakin eō kōn tōmak, ukweļo̧k, peptaij, im mennin letok eo an Jetōb Kwōjarjar. Iar bar kōppopo jān riit jeje ko rekwojarjar, jar, im alooj pija ko kōn Jisōs Kraist. Em̧m̧antata ippa pija eo me kōn peptaij eo an Rilo̧mo̧o̧r ilo Reba Jordan. Em̧m̧an ippa paat eo ijo me m̧uļe mouj eo ej jāde, eo ekar kakōļļein Jetōb Kwojarjar.

Komro jema kar bar kamālmele kilen amro naaj jutak ilo lowaan dān eo. Iar mijak in rumlo̧k ium̧in dān eo, ak jema ear katakin eō ālkwōj aolepen bukiō, pinej botū, kiil meja, im jidik wōt aō okjakļo̧k ioon pein. Eļap am kijon̄ kamālmel aolep iien, im ilo raan in peptaij eo aō, ear maron̄ in pidodo aō kōm̧m̧ane.

Ekar juon raan eo iban meļo̧kļo̧ke. Jet iaan ro uwaan baam̧le eo aō kar leļo̧k iien aer kōnono, jar, im jutak n̄an kam̧ool. Iar bar al “When I Am Baptized” kōn jipan̄ eo an ri piano eo an Būraimere. Ālkin aō kar peptaij, Iar en̄jake an Jema Ilan̄ im Nejin, Jisōs Kraist, lukkuun pād ituru. Ikar jan̄ ilo kōmjaaļaļ kōn m̧ōņōņō.

Ekar bareinwōt jenolo̧k kinke ear wōr juon aō ļōmņak n̄an kūrtok jet iaan ro m̧ōtta ro im rejjab membōr in Kabun eo n̄an itok n̄an peptaij eo aō, im raar errā n̄an itok. Juon iaan ro m̧ōtta eo im ear pād ej itok wōt n̄an m̧akutkut ko an kabun̄ ippān jinen im jemān.

N̄aij kate eō kakeememej bujen ko aō ilo etal n̄an im̧ōn jar, bōk kwojkwoj eo, im keememeje Rilo̧mo̧o̧r eo. Jeļā ke E ear leļo̧k mour eo An n̄an n̄a ekōm̧m̧an aō kam̧m̧oolol. Ij bareinwōt jar aolep raan, riit jeje ko rekwojarjar, jerbal n̄an ro jet, im kate eō bwe in juon armej em̧m̧an.

N̄an ro m̧ōtta im rej pojak in peptaij, ij kōjatdikdik bwe konaaj eddōkļo̧k epaakeļo̧k Jemedwōj Ilan̄ im en̄jake iakwe eo an eweeppān!