“Tauraoi n Rikirake,” Te Rao, Nobembwa 2025, 36–37.
Tauraoi n Rikirake
E aki tangiria Jewel ni kitaniia raoraona n te Moanrinan!
Te karaki ae koaua mai Palau.
E tekateka Jewel i aon te benti n te bootaki n toa ma ana karo ao mwaanena. E korei tamnein karaki man koroboki aika tabu. E kataia n ongora nakon te tia taetae, ma titebo ma e a bon rangi n nakonnano!
N te bong aei ao bon ana moan bong Jewel n kaea te kiraati n te Bootaki n Ataeinnaine ao ai tiaaki te Moanrinan. E aki tangiria ni kitaniia raoraona n te Moanrinan. E tatangiria n anene ao n wareware man koroboki aika tabu ma ngaiia.
Ma e a koro 12 ana ririki Jewel n te ririki aei. Ai tain te mwaing nakon te burokuraem n te Bootaki n Ataeinnaine.
E kamakiia matana Jewel ao n tataro i nanona. Tamau are i Karawa, taiaoka buokai bwa e na nakoraoi au kiraaki n te Bootaki n Ataeinnaine.
Imwiin kainakin te tataro n te bootaki n toa, e ikerake Jewel ao n nakonako nakon te umwanreirei. A kaman roko ikekei ataeinaine ake a ikawai riki. Bon aman ngaiia ikekei. A taetae ao a ngarenare.
“Mauri,” e taetae Jewel.
A wingare. “Mauri.”
E roko te tia reirei ao e kamaura Jewel. Imwiina e a moana ana reirei.
I nanon tain angiin te reirei, e namakina Jewel bwa kanga e tiku n okoro. E nako nanona n taetae ibukina bwa e tuai kinaia ataeinaine ake tabeman. E na tiku n te Bootaki n Ataeinnaine n te tai ae maan. E namakinna bwa e tikunako ikekei n rangi ni maan! E na teimatoa n namakina te kanaokoro iai?
Imwiina ao e roko te bwanaa ae uarereke n ana iango. Kona aki tiku ni maan n te Bootaki n Ataeinnaine. Ko a bon tau ni waaki nako ao n reiakina riki taekan arom bwa a na reirei Iesu Kristo ngkoe.
E rau nanona man taeka akanne. E kinaiia man ana ibuobuoki te Tamnei ae Raoiroi. E ngae ngke e aki bati raoraona n te Bootaki n Ataeinnaine ma, e aki maroaa. Iai raona te Tamnei ae Raoiroi.
Imwiin bwaran te reirei, e nooria ana utu Jewel.
“E uara te kiraati n te Bootaki n Ataeinnaine?” E titiraki Tinana.
E rabwatia Jewel. “E rang n raoiroi. I mitina te Moanrinan, ao I tuai moa kinaiia ataeinaine. Ma I namakina te Tamnei ae Raoiroi bwa e anganai te rau.”
E wiingare tinana. “E rangi tikiraoi ongoraean anne! Ao tao e na nakoraoi riki are i mwiina.”
E katoua atuuna Jewel. E kantaningaia bwa e na eti are e taku Tinana.
N te tai ni kiraati are imwiina n Bootaki n Ataeinnaine, e a manga kamauriia naba ataeinaine Jewel.
“Mauri, Jewel” e taetae temanna mai irouiia. “Ko riai n tekateka i rarikiu!”
E wingare Jewel ao n tekateka irarikin te ataeinaine. Aran neiei bon Ellie. A reitaki ni marooro i mwain waakinan te reirei. E rangi n akoi Ellie ao e buokia n namakina te butimwaeaki.
N tain te reirei, e titirakina temanna te tia reirei ngkana iai ae iai ana taneiai ma te Tamnei ae Raoiroi.
E katea baina Jewel. “I namakina te Tamnei ae Raoiroi bwa e buokai ngke I nakonnano n kaain te Bootaki n Ataeinnaine,” e taku. “E buokai te Tamnei ae Raoiroi ngkana i kaitara ma te kangaanga.”
E iangoia Jewel bwa e na kanga te Tamnei ae Raoiroi n karaua nanona ngkai e ataia bwa akaea raoraona. E tikiraoi te namakin n tibwaan ana taneiai ma ataeinaine i nanon te Bootaki n Ataeinnaine.
Imwiin ana tibwatibwa, a manga tibwatibwa ataeinaine ake tabeman naba. E tatangiria n ongo ake a na taekinna ataeinaine.
E bon mitina naba te Moanrinan Jewel. Ma ibukin te Tamnei ae Raoiroi, e tauraoi n waaki rake.
Kamataata n te tamnei iroun Liz Brizzi