“Te Kabanea n Irikonibooro,” Rao, Nobembwa 2025, 18–19.
Te Kabanea ni Irikonibooro
E aki booraoi! Akea ae tibwatibwa ma Alex!
Te karaki ae koaua man te USA.
E waekoa n ruorikaaki n te kaintamwarake Alex ao n takarua.
E taraia tinana man ana boki. “Tera ae riki?”
“Akea ae kan tibwatibwa ma ngai!” E taku Alex. “I ribaa arou ae te karinuuka ngai.” Tarin Alex a teimatoa n kakarekea te bwai are a tangiria. E aki booraoi anne.
“I ataia bwa ngkana ko bon bubuti raoi, ao a na tibwai aia bwai tarim ma ngke,” e taku Tinana.
E mata n un Alex. “I bon bubuti raoi!”
“E uara ngkana ko katea te tai? Te aro anne ngkami n tatabemani ngkami kam karekea te tai ae ti te arona n takakaro.”
“I karaoa taina!” E taku Alex. “Ma tao N na karaoa uoua te tai bwa e aonga koaua raoi.” E anaa te tai are teuana man te tabo taiboran te ruu ni kuuka ao ni waerake n te kaintamwarake. E takakaro n ana takakaro i aon te TV tarina ae uarereke riki, David.
“E taku Mom bwa ko na riai n tibwatibwa,” e taku Alex. E karaoa taina ibukin nimaua te miniti. “Ngkana e toki taina, bon au tai n toka ngkanne.”
N te bong are i mwiina, a takakaro Alex ao tarina are e ikawai, a karao ataina ibukin kaka 30 te miniti. Ngke a kaai n takakaro David ao Alex ma bwaai ni kateitei, a wareka te numbwa ae titebo ibukiia ni kauoman. Ao ngkana David ao Alex a kaai n tangira te kabanea n tiaokureti, a bwenauaia ma te taratara raoi bwa e na bon iteranaki raoi. A moanna ni booraoi karaoan bwaai.
Ma n te tai ni katairiki …
N te tairiki anne, aia katairiki te spaghetti ao te irikonibooro! E moana kaitaotaoan te pasta n ana raurau Jake i mwain ae kona n reke ana buun Alex.
“Eei, e aki titeboo anne,” e taku Alex. “I baki naba ngai!”
E katoka baina Tamana i aon angana. “Alex, e rangi ni mwaiti te amwarake ibukira ni kabane. Taraia, N na anganiko ae bon mwaitin are iroun Jake.” E katoka pasta i aon ana raurau Alex Tamana.
I mwiin kakabwaiakin te amwarake, a bane n amwarake. Ngke e a bane kanan Alex, e bon teimatoa naba ni baki. E kaninganinga nanon te bwaata are i nuukan te taibora. Ai bon ti teuana te irokonibooro i aon te pasta. E buniia nako aon ana raurau.
“E aki booraoi aron anne!” E taku David. “Ai bon ti anne te kabanea.”
E kotea te irikonibooro are n ana waiteke. “I tangiria naba. Ti a bwenauaia.”
“Bwenauaia?” E taku Alex. “Ibukira ngaira teniman? Ma e rangi ni uarereke.”
A katoutou atuia Jake ao David. “E na bon booraoi iai.”
E anaa ana raurau Alex Jake ao n moana bwenauaan te irikonibooro arei i nanon teniua te tibwa. E matakuakinna Alex ngke e a moanna ni uarereke ao n uarereeke riki te irikonibooro.
E ngare Tinaia. “A bon rangi ni uarereke mwakorokoro akanne!”
E ngare naba Tamaia. “E na bon aki kona n taainako ae na titebo raoi,” e taku. “Tao ti na kataia n katamaroaira riki n tibwaakin ara bwai nakon kamaenakoan bwaai ni kabane.”
E baraaki Alex n taraa mwakorokoron te irikonibooro ake a rangi ni uarereke. E bon taraa ni kamanga. E koaua bwa e bon rangi n tabeakina te irikonibooro? Tao e kainnanoia bwa e na reiakinna n tibwatibwa riki.
N te bong are i mwiina, ngke a takakaro Jake ao Alex, a uaia n tangiria n takakaro ma buraoki, a iangoia bwa a na uaia ni katea te bwai teuana. Ngke a mena i tinaniku David ao Jake, e anganiia aia tai Alex bwa a na ikaruoruo n kabuta ana bwatika. Ao ngkana a tangiria n takakaro ni kabane ma te TV, E aki taua taina Alex. Te tibwatibwa ao te nimamanei e karekea te namakin ae tamaroa riki nakon te kabooraoi ni katitebooi aron bwaai.
N te tairiki anne, ngkana a kaai n tangira te nikira ni katairiki, e tuanga Jake Alex bwa e kona n anaia ni kabane.
“Ko rabwa!” E kakeea matana Jake. “Ko bon koaua bwa ko aki tangiria n bwenauaia i nanon teniua te tibwa?”
A ngare David ao Alex. “Eng I bon aki.”
Kamataata n te tamnei iroun Alyssa Petersen