Te Rau n te Tataro

“Karietaa riki, Tamau!” E takarua Mary.

E ngare Tamau ao n katiemwakaa te tie. E bae te tie naon te kai ae bubura are e rara nako aon te Karaanga ae te Mississippi. E tangira ukin te ang i aon ubuna Mary ao te mwarane i biritona ngke e tienako aon te ran ao n oki.

“Ngai i mwiina!” E taetae Elizabeth.

E kibanako mai aon te tie Mary ao ni katoka tarina bwa ana tai n tie.

A maeka ana utu Mary i Nauvoo. A kaain te Ekaretia ana utu tabeua te ririki n nako, ao a kabonakoi aia bwai ni kabane ni mwaing n raoniia Aomata aika Itiaki ake tabeman.

Nauvoo bon te tabo ae bati te kakamwakuri iai irouia aomata. A roroko iai aomata aika a boou ni katoa bong. Bon te mwakuri ae matoatoa katean te kaawa ae boou, ao a ibuobuoki naba ataei. Te ibuobuoki e buoka Mary n namakinna bwa e ikawai ao ni kakaawaki. N tabetai ao e buoka Tamara i mwiin te katawanou ngke e mwakuria te tembora ae boou.

N te Tabati, e karina ana kunikai ae te kabanea n tamaroa Mary ao e buokiia mwanena ao tarina bwa a na tauraoi nakon te taromauri. A bootaki ni kabane aomata i aan taian aroka ao n ongora nakon te Burabeti Iotebwa Timiti ae reireia taekan Iesu Kristo. E tatangira reiakinan taekan aroia Mary bwa a na kanga ni maeka ma Tamaia are i Karawa n te bong teuana. E a tia n noora te Burabeti ao n ongo taekan bwaai aika a tamaroa.

Tabeman aki tangira te Burabeti. E a tia n ongongo Mary karakinan taekaia aomata ake a tangiria n iowaawa nakoina.

N te tairiki teuana, E buoka tinana Mary ni kaitiaki i mwiin te katairiki. Imwiina e roko Tamana nakon mweengaia. E waanako ranin matana.

“Tera ae riki?” E titiraki Tinau.

“E tiringaki te Burabeti Iotebwa,”E taku Tamau.

E a manga tang naba tinara. “E na kanga te Ekaretia n waaki nako n akeana?” e titiraki tinana.

E nanokawaki ao ni maku Mary. E ataia bwa te Burabeti bon ana toro te Atua are e a tia n rineia. E kanga ni kariaia Tamara are i Karawa bwa e na riki aei?

E moana tangina ao e biri n otinako man te auti nakon te onaroka. Imwiin bwakana i aon bubuaniwaena irarikin tabeua aroka aika a uarereke, E moana ana tataro Mary. “O Tamara are i Karawa, tera ae ti na karaoia? E a tiringaki ara burabeti.” A waanako ranin matana i aon ubuna.

Imwiina e a roko te bwanaa n ana iango Mary. N na kateirakea temanna te burabeti ae na kaira au botanaomata.

E kaona nanona te rau ao te kimwareirei. E kaoa matana ao n biri rikaaki ni kabirimwaaka nakon te auti.

“Tinau! Tamau!” E taku Mary. “I tataro, ao e kaekai Tamara are i Karawa.” E tuangiia taekan te bwanaa ao namakinan te rau are e roko i rouna.

Ngke a konna Tinana ao Tamana, e ataia Mary bwa e na bon nakoraoi te waaki. E bon nanokawaki, ao e ataia bwa a na mwaiti taai ni kanganga aika a na riki. Ma e na reitinako Tamara are i Karawa ni kairiia ao ni buokiia.

Korotamneiaki iroun Kristin Sorra