Ij Ke Aikuj Bwe In Wānōk?

Henry ear jorjor dikdikļo̧k n̄an lowaan ruum̧ in Būraimere eo. Neen ekar kanooj eddo ke ear tōparļo̧k jea eo an.

Rikaki eo an, Brother Rass, ear ettōn̄ļo̧k n̄ane. “Kopojak ke in kenaan kōn tampeļ ko?” ear kajjitōk.

“Aeet,” Henry ear uwaak.

Etke iar tin ba men eo? Henry ear ļōm̧ņak ilo an jijōtļo̧k. Eaar jab en̄jake an pojak. N̄an jidik.

Būraimere eo an Henry rekar ekkatak al eo “I Love to See the Temple.” Kar kajjitōk bwe kilaj eo an ren kinaan kōn etal n̄an tampeļ.

Ak Henry ear nana an mour. Ekar kōņaan etal n̄an tampeļ n̄e erūttoļo̧k, bōtaab ear en̄jake ke ear kōm̧m̧an elōn̄ bwōd.

Juon ilo̧k juon, ro m̧ōttan rekar jutak. Rekar m̧ōņōņō im kijooro ke rekar kenono kake aer etal n̄an tampeļ juon raan. Henry ear en̄jaake an nanaļo̧k an mour.

Innem ekar iien n̄an jino al. Henry ear al ipen aolepen Būraimere ro jet: “I’ll prepare myself while I am young; this is my sacred duty.”

Ewi wāween aō kepopo n̄an etal n̄an tampeļ n̄e elōn̄ bwōd ko aō.d Henry ear ļōm̧ņak. Ekar walaļļo̧k ilo jea eo an.

Ke ear jem̧ļo̧k al eo, Brother Rass ear m̧al laļļo̧k. “Emman ke am Mour?” ear kajjitōk ippen Hernry.

Henry ear kalimjek lalļo̧k pā ko pein. Ineem ear unoojdikdik im ba, “Ikōņaan etal n̄an tampeļ, ak imijak n̄e ijjab erreo.” Ekar bōk kūtwōn. “Ejjab aolep iien ij karejar ippen baam̧le eo aō. Ij meļo̧kļo̧k in kōm̧m̧ane jerbal ko aō. Elukkun lōn̄ aō bwōd. Ij ke lukkun aikuij e in wānōk?”

Brother Rass ear ettōn̄ dikdik. “Ilo am̧ erreo n̄an etal n̄an tampeļ ejjab meļeļein bwe kwoj aikuij wānōk. Jemaron̄ erreo ilo ad lōke Jisōs Kraist im m̧ool ilo ad kajion̄ kejparok kien ko. Aolep rej kōm̧m̧an bōd, ak jemaron̄ ukweļo̧k im bar erreo.”

Henry ear jijōt lōn̄tak im kajim̧we.

“Ijeļā ke Jemedwōj Ilan̄ ej m̧ōņōņō kake am̧ kajion̄ kōm̧m̧an em̧m̧an,” Brother Rass ear ba.

Henry ear ļōm̧ņake jet iaan jerbal ko rem̧m̧an ear kōm̧m̧ani wiik eo. Ear kōmat kejota ippen M̧am̧a, jipan̄ ledrik eo jatin katak ko an, im ear ba iakwe n̄an juon ladrik ekāāl ilo jikin jikuuļ.

Inepata ko an Henry rekar jino aer makwuņļo̧k. Ekar jeļā bwe Jetōb Kwojarjar ekar jipan̄ e.

Ke ear iien an Henry baj kwaļok, ear ettōn̄dikdik im jutak. “Ikōņaan wōnm̧aanļo̧k im ukweļo̧k im erom̧ āinwōt Jisōs Kraist bwe juon raan in maron̄ dreļo̧n̄e tampeļ eo,” eaar ba.

Henry ear en̄jake an m̧ōņōņō ilo an jijōtļok. . Juon raan, enaaj maron̄ kōm̧m̧an bujen ko rekwojarjar ippen Anij ilowaan tampeļ eo. Ekōņaan kajeon̄ jon̄an wōt an maron̄ n̄an kepopo.

Kōmeļeļe ko jān Gail Armstrong