Jar kōn Alejandro

Gerardo ear jikeetļo̧k n̄an tum̧aanin jikin etetal eo ilo m̧weo im̧ōn. Wa eo waan m̧am̧a ear pād ilo ijo jikin wa. Meļeļein bwe e im laddik eo erūtto jein, Alejadro, em̧ōj aer ro̧o̧ltok jān taktō eo. Gerardo ear tim̧we kein jikeet ko an im buuļ ļo̧k n̄an lowaan m̧weo.

“Gerardo?” M̧am̧a ear ikkūr. “Kem e !”

Gerardo ear etetal ļo̧k n̄an lowaan ettōņaak eo. Alejandro ear babu ioon jea eo. M̧am̧a ekar jijōt iturin. Ereitok in inepata.

Gerardo ear bar inepata. Wiik eo ļo̧k, rekar jeļā bwe Alejandro ewōr an cancer. Ekar kanooj nan̄inmej.

Ak Alejandro ear jijōt lōn̄tak im ettōn̄dikdik ke Gerardo ear deļon̄ļok. “Iakwe! Em̧m̧an ke kar jabdewōt ippam rainin?”

“Aeet, ak ejet taktō eo?” Gerardo ear kajjitōk.

“Ej ba ij aikuij surgery,” Alejandro ear ba.

Mama ekar emajidjid. “Ak taktō ro rem̧m̧antata im remaron̄ jipan̄e repād ilo aujpitōl eņ an ajiri. Jen ke Alejandro ear 14 an iiō, ear rūtto n̄an bōk jipan̄ jān ijo. Jej aikuij bar pukot juon jikin.”

Gerardo Eaar kankan lojeen Gerardo. Eļan̄e rejjab maron̄ jipan̄ Alejandro, ta eo enaaj waļok? Enaj ke ļapļo̧k cancer eo an?

Gerardo ekar etal n̄an ruum̧ eo an. Ekar aikuij in ļōm̧ņak.

Ilo Būraimere, Gerardo ear katak bwe Jemedwōj Ilan̄ ej ron̄jake aolep iien. Gerardo ear jeļā bwe emaron̄ kajjitōk jipan̄ Ippān iien otemjej.

Kōn menin ear bukwelōlō iturin jikin kiki eo an im bok pā. “Jemedwōj Ilan̄, jouj jipan̄ Alejandro,” ear jar. “Jouj im jipan̄ kem pukot taktō ro remaron̄ kōm̧m̧ane surgery eo.”

Ejjab to m̧am̧a ear kūri bwe en tin kōjota. Ekar kōm̧m̧an pupusas, m̧ōn̄ā eo enno ippen Gerardo. Ekar kakilep an kūji, tortila eo em̧ōj kūriiļi p im kanne kōn cheese im bean ko. Ak ear inepata wōt kōn ladrik eo jein.

Alejandro ear kij wōt jidikin pupusa eo kijen. Ekar inepata turin mejān im raaļo̧k an m̧akitkit.

M̧am̧a ear bolen loe. “Etke jejjab alooj juon pija in Kabun̄ in?” ear kajjitōk. Em̧m̧an ippaerr alooj pijain Jisōs Kraist n̄e rej burom̧ōj.

“Em̧m̧an.” Gerardo ear kwaļ kenno ko aer ke M̧am̧a ej kepooj pija eo. Innem aolep rekar jijet im alooj.

Ilo pija eo, Jisōs Kraist ear jar ilo juon jikin kallib iturin juon wōjke. Gerardo ear jeļā bwebwenato in. Ekar ilo iien eo Jisōs ear en̄taan m̧okta jān an kar mej ioon debwāāl.

Ke ekar jem̧ļo̧k pija eo, Gerardo ekar melak im anōm̧m̧an. Ak ear wōr juon an kajjitōk. “Etke Jisōs ear aikuij lukkun metak ?” ear kajjitōk.

M̧am̧a ear jibur erro Alejandro tok n̄an ippen. “Jisōs ear kālet bwe en en̄jaake metak kōnke Ej iakwe kōj. Ekar en̄jaake aolep metak ko jej deploki.”

Gerardo ear kalimjōk Alejandro. “Jisōs ejeļā ke kōn en̄jake eo ilo ad bōk nan̄inmej in cancer?”

“Aeet, Ejeļā,” M̧am̧a ear ba. “Ejeļā ewi jon̄an an pen. Im kōnke Ejeļā ewi wāween en̄jaake eo, Ejeļā wāween jipan̄ kōj.

Gerardo ear en̄jake okmāņāān itulowa, āinwōt n̄e ear lipopo kōn juon būļan̄kōj. Jemedwōj Ilan̄ im Jisōs Kraist rejeļā im rej iakwe baam̧le eo an. Rejeļā kilen jipan̄ Alejandro.

Ke Alejandro ear ro̧o̧ļ jān jikuul raan eo juon, ear loe M̧am̧a ej kanne juon pāāk.

“Juon ennan em̧m̧an!” eaar ba. “Iar kōnaan ippan taktō eo ilo aujpitōl eo an ajiri ro. Rej tin jipan̄ Alejandro. Enaaj surgery ilju.”

Gerardo eaar atbakwoj M̧am̧a. “Jemedwōj Ilan̄ ej jipan̄ kōj! Jemaron̄ ke jar im kam̧m̧oolol E?”

“Eļap an em̧m̧an pepe in,” M̧am̧a eaar ba. “Jen kūrtok Alejandro.”

Ke rekar jar ippen doon, Gerardo ear en̄jake aenōm̧m̧an. Jemedwōj Ilan̄ ekar eron̄ jar eo an! Kiō Alejandro enaaj bōk surgery eo aikuiji. Gerardo ear jeļā bwe Jisōs Kraist ear meļeļe ta eo rej ioone. Im Enaaj jipan̄ er ilo aolep aer mālijjon̄.

Kōmeļeļe ko jān Ricardo Guerrero