Juon Kweilo̧k Aorōk

“Aminah, aō to̧ļļe ņe!” Indira eaar lam̧ōj. Eaar kanōke to̧ļļe eo jān ippān leddik eo jatin.

“Leddik raņ, ij em̧m̧akūt,” Jineer ear ikkūrļo̧k. “Jouj im pokake baba.”

Indira ekar reilōn̄tok. “Kwoj etal n̄an ia?”

“N̄an jikin kaikujkuj eņ. Ij wia m̧ōn̄ā n̄an kammatte juon m̧ōn̄ā enno n̄an ilju.” M̧am̧a ekar jeaļ e pein im mootļok.

Juon m̧ōn̄ā enno? Ak etke? Indira ekar etal im pukot baba. “Etke aorōk ilju?” ekar kajjitōk.

Jemān ekar ettōn̄dikdik. “Ilju jenaaj alooje kweilo̧k eo eļap! Eaorōk kōnke jenaaj ron̄ jān rikanaan eo im ritōl ro jet an Kabun̄ in im renaaj kōnono. Renaaj ba ta eo Jemedwōj Ilan̄ ej kōņaan bwe jen ron̄.“

Ke m̧am̧a eaar tōpar tok m̧weo, eaar karōk m̧ōn̄ā ko. Baba eaar pook būļoor eo.

“Indira, komaron̄ ke jipan̄ Aminah kepooj nuknuk ko an n̄an ilju?” M̧am̧a eaar kajjitōk.

Indira ear kajememe. “Etke ij aikuj jipan̄e?”

“Jouj im kōm̧m̧an āinwōt aō ba,” M̧am̧a eaar ba.

Indira ekar kōjan̄ lon̄iin. Eaar ipper neen ijoļo̧k ilo an etal in jipan̄ Aminah.

Jibbon̄en raan eo juon, Indira ekar rujtok n̄an juon bwiin men enno. Ekar jerkak jān ioon kineen im ettōrļo̧k n̄an jikin kamat eo. M̧am̧a ear kōm̧m̧an beef rendang im satay n̄an m̧ōn̄ā in rālep. Elukkun nej kanooj enno.

Ejjab to, ekar iien alooje kweilo̧k eo eļap. Indira ekar jijet ippen baam̧le eo an n̄an alooj ilo TV eo. Ekar ron̄jake an kuwaer eo al. Ekar ron̄jake an armej ro kōnono kōn tampeļ ko, im jeje ko rekwojarjar im Jisōs Kraist.

Rikōnono eo āliktata ekar rikanaan eo, Būreejtōn Russell M. Nelson. Ekar kōnono kōn wāween an Kabun̄ in jipan̄ armej ro wōj ilpeļakin laļin.

“Em̧ool lan̄lōn̄ eo eļaptata ad ej itok n̄e jej jipan̄ brother im sister ro ad,” ear ba.

Indira eaar ļōmņak kake men in. Jipan̄ ekar kōmm̧an bwe en m̧ōņōņō? Ekar ron̄jake wōt. Būreejtōn Nelson ear ba bwe ilo ad mour kōn kien eo eļap kein karuo emaron̄ jipan̄ kōj āinwōt Jisōs Kraist.

Ke ekar jem̧ļo̧k, rekar m̧ōn̄ā in rālep m̧ōn̄ā ko m̧am̧a ear kepooji. Indira ellakkar ļōmņak kōn kenono eo an rikanaan eo.

“Ta kien eo eļap kein karuo?” ear kajitōk.

“Kwōn yokwe ri turuṃ im āinwōt kwe ,” Baba ear ba.

Indira ear ļōmņak kake armej ro Kabun̄ in ear jipan̄ er ilo aolepen laļin. “Ewi wāween aō jipan̄ eļan̄e ro rituru rej pād etoļo̧k?”

“Ro riturum̧ rej aolep ro ipeļaakim̧,” M̧am̧a ekar ba. “Āinwōt ro uwaan baam̧le eo am̧.”

Indira ekar reilaļļo̧k. Ejjab kijor em̧m̧an n̄an baam̧le eo an jet iien.

Bōtaab bōlen ilo an jipan̄ er enaaj kōm̧m̧an an em̧ōņōņō, āinwōt an Būreejtōn Nelson ba. Ekar juon wāween eo emaron̄ kar ļoore Jisōs . Ekar kōņaan kajeon̄!

Ilo aolepān wiik eo, Indira ekar kajeon̄ bwe en lukkuun em̧m̧ann̄an baam̧le eo an. Ekar ikkure ippān Amirah. Ekar ajije kein ikkure ko an. Ekkar kōm̧m̧ane ta ko m̧am̧a im baba rekar ba ilo ejeļo̧k abņōņō. Ke Indira ekar jipan̄ baam̧le eo an, rekar m̧ōņōņō. Im menin ekar kōm̧m̧an an m̧ōņōņō barāinwōt.

Rikanaan eo ekar m̧ool. Jipan̄ ro jet ej boktok n̄ane lan̄lōn̄!

Kameļeļe ko jān Judi Abbot