Eoon eo an Maja kōn Meram in Aļ

Maja ear jijet ioon jikin iuwe ko ilo m̧weo im̧ōn im likūt jūbwin n̄iin ioonpein. Aļ ear lukkun meram, okmeņeen in an meram kar itok bwilon wōjke ko. Mejatoto ear bwiin wōt bōlōkōn wōjkepine .

M̧am̧a ekar diwōjtok im jijōt tūrin Maja. “Ta ņe kwoj lōm̧ņak kake?”

“In kar kwaļok eoon eo em̧m̧antata ippa ilo būraimere,“ Maja ear ba. “Ak ejjan̄in wor juon en em̧m̧antata ippa.” “Im ijjab jeļā ewi wōt in n̄an kelete.”

M̧am̧a ekar emajidjid. Kelete juon eoon eo em̧m̧antata ipped epen. Ekar ereilo̧k n̄an wōjke ko nabōj, innem kar jutak lōn̄tak. “Ewōr juon aō ļōmņak.”

M̧am̧a ekar bar dreļo̧n̄. Ke eaar ro̧o̧ltok, ekar jibwe jeje ko rekwojarjar. “Jen jino kōn juon bwebwenato.” Ta bwebwenato eo em̧m̧antata ippam̧ ilo jeje ko rekwojarjar?

Maja eaar ļōmņak kake. “Em̧m̧an ippa an kar Jisōs loļo̧k RiNipai ro.”

M̧am̧a ekar āllekipeij ko ilo Bok in Mormon eo. “Bwebwenato eo ekar ijjino ilo 3 Nipai.” Ekar jitōn̄ peij eo. “Jen kajojo riit im kelet eoon ko rem̧m̧an ipped.”

Maja ekar m̧ajjid bōran im ron̄jake an M̧am̧a riit. Ekar riit kōn an Jisōs Kraist kūr rijjilōk ro An. Ekar riit kōn rikōm̧m̧an ainem̧m̧an ro im jar.

Innām ekar baj iien eo an Maja. Ke ekar kadedeļo̧k juon iaan eoon ko, ekar bōjrak. Ekar en̄jake an aļ meram im ka obrak buruōn.

Ekar reilōn̄ļo̧k M̧am̧a. “Em̧m̧an ippa eoon ņe.”

“Bar n̄a. Ta eo em̧m̧an ippam kake?” M̧am̧a ekar kajjitōk.

Maja ear nukuj aeran ilo an etōn̄dikdik turin mejān. “Ej kōn Jisōs. Im ekōm̧m̧an aō en̄jake m̧ōņōņō.”

M̧am̧a ekar barettōn̄ dikdik tok. “Ej juon wāwein eo em̧m̧an n̄an jeļā ke em̧ōj am̧ lo juon eoon eo em̧m̧an ippam̧. Kokōņaan ke kwaļo̧k eoon ņe ilo Būraimere?”

Maja eaar em̧ajidjid ilo an m̧ōņōņō. “Komaron̄ ke jipan̄ eō ekkatak?”

“Aaet!” M̧am̧a ekar ba.

M̧am̧a im Maja rekar kōmmālmel juon naan ilo juon iien. Ke rekar katak, bao ko rej al ilo wōjke ko, āinwōt n̄e rej bar ekkatak.

Aolepen wiik eo, Maja ear ekkatak eoon kāāl eo em̧m̧an ippen. Ilo jibon̄ōn Jabōt eo, ekar ikum̧kum̧ jidik. Ekar kōmmālemel riiti eoon eo an ilo ial eo aetokn̄an m̧ōn jar eo.

Ekar wōr wōt jejjo ajiri ro ilo Būraimere eo an Maja. Ak ilo an kar dreļo̧n̄e kilaj eo, Maja ear lukkun ikkum̧kum̧.

Ke ekar iien n̄an an kwaļok, Maja eaar jutak im bōk kituwōn. “Lo, N̄a kien eo, im meram eo,” ekar ba. “Kom̧in reitok n̄an Eō, im niknik n̄an jem̧ļo̧kin, im kom̧ naaj mour; bwe n̄an eo ej niknik n̄an jem̧ļo̧kin Inaaj leļo̧k mour indeeo.”

Ke Maja ear dedeļo̧k, ear jijōt ļo̧k im ettōn̄dikdik. Ekar kōm̧m̧ane! Ekar jako an ikkum̧kum̧, im en̄jake in okmeņeeņ eo ear bar jepļaaktok. Ekar jeļā ke eoon eo em̧m̧antata ippen enaaj boktok en̄jake in aolep iien ej aikuiji.

Kōmelele ko jān Chloe Dominique