Mga Sagot tungkol sa Templo

Ang templo ang bahay ng Panginoon. Malinis at maganda sa loob nito. Lahat ay nagsusuot ng puti at sinisikap na maging mapitagan. Ito ay isang payapang lugar para sambahin ang Diyos, matuto, at madama ang pagmamahal ng Tagapagligtas sa pamamagitan ng Espiritu Santo.

Sa templo, natututuhan natin ang tungkol sa plano ng Diyos at nakikipagtipan sa Kanya. Ginagawa natin ito sa pamamagitan ng pakikibahagi sa mga ordenansa tulad ng mga binyag, kumpirmasyon, at pagbubuklod sa ating pamilya.

Dapat mong isuot ang pinakamagandang damit mo sa templo. Kapag nasa loob ka na, magpapalit ka ng espesyal na damit para magsagawa ng mga ordenansa. Para sa mga binyag, bibigyan ka ng mga temple worker ng puting jumpsuit na isusuot mo.

Ang temple recommend ay isang maliit na piraso ng papel na magtutulot sa iyo na makapasok sa templo. Maaari kang makakuha nito mula sa isang miyembro ng inyong bishopric o branch presidency. Tatanungin ka niya kung sinusunod mo ang mga kautusan at kung may patotoo ka. Kung ikaw ay karapat-dapat at handang pumasok sa templo, bibigyan ka niya ng temple recommend.

Sa templo, maaari kang binyagan para sa mga taong namatay nang hindi nabinyagan. Magsusuot ka ng puti at ilulubog nang buong-buo sa tubig.