Tuʻu maʻu ʻi he Fehangahangai mo e Loto-mamahí, Mamahí, pe Ngaahi ʻAhiʻahí: Elaine Thornton

ʻOku tau fiemaʻu ʻi he taimi ʻe niʻihi hotau kau takí ke nau haohaoa, pea taimi ʻe niʻihi ʻoku tau fiemaʻu ke tau haohaoa. Pea ko ha meʻa faingataʻa ia ke te kole ʻi he taimi ʻoku tuʻu fehangahangai ai mo e palani ʻa e ongoongoleleí. Pea ʻoku ou tui ʻoku fuʻu mahuʻinga ke manatuʻi ʻoku totonu ko e ʻamanakí ko e tupulaki mo e mahino mo e feʻofaʻaki.

Hangē ko ʻení, naʻe tuʻo taha haʻaku aʻusia ha meʻa faingataʻa moʻoni mo ha taki, pea naʻe fakamamahi moʻoni ki homau fāmilí. Pea naʻá ku faifeinga ʻaupito pea pau ke u sio kiate au mo fakakaukau, “ʻOkú ne fuʻu fakamamahi ʻaupito. Kae mahalo kuó u fakamamahiʻi foki mo e kakaí. Mahalo kuó u fai ia pea ʻoku ou fiemaʻu ʻa e ʻaloʻofá.” Ko ia naʻe pau ke u foki ki he meʻa ʻoku ou ʻiló. Pea ʻoku fuʻu mahuʻinga ke manatuʻi ʻa e meʻa ʻoku tau ʻiló. Kapau naʻe ʻikai hoko [ʻa e meʻa fakamamahí ni], naʻe ʻikai ke u mei foki ki hoku fakavaʻé. Kapau naʻe ʻikai hoko ia, he ʻikai ke u tafoki ki he ʻEikí ʻi ha founga loloto mo mahuʻingamālie pehē. Ko ia ʻoku ou kei tupulaki pē ʻi he fakalakalaka ko ia ʻo hono ʻiloʻi ʻeku Tamai Hēvaní, mo hoku Fakamoʻuí. Pea ko hono moʻoní, ko e hā ʻoku ou fie ʻilo ai kiate Iá? ʻOku ou fie ʻiloʻi moʻoni Ia koeʻuhí ke u lava ʻo hangē ko Iá.

ʻI hoʻomou fakataha mai ʻi he Fineʻofá pea ʻi hoʻomou fealēleaʻaki fakatahá, ʻoku ou fakaafeʻi kimoutolu ke mou ʻunuʻunu mai. ʻUnuʻunu ki ha taha ʻoku ʻikai fakakaukau tatau mo koe pe ko ha taha ʻoku fefaʻuhi mo ʻene fakamoʻoní. Ko ha taha naʻe toki vete-mali. Ko ha taha ʻoku fifili pe ʻoku kei ʻaonga [ke feinga pē]. ʻOku fēfē kapau te tau ʻunuʻunu atu? ʻOku ou tui te tau ʻaonga ki he Fakamoʻuí kapau te tau ako—kapau te tau ako ʻa e founga ke fai ha meʻa ʻi he founga ʻokú Ne ʻafioʻí. Pea ʻi heʻetau hoko ko e kau fafiné, te tau lava ʻo fevahevaheʻaki ʻa e faʻahinga ʻaloʻofa mo e uouangataha fakaʻofoʻofa ko ʻení, ʻi heʻetau ʻiloʻi ʻoku tau maʻu kotoa ha meʻa ʻoku tau faingataʻaʻia fakalongolongo ai. Pea mahalo ʻi heʻetau ngāue fakatahá pea hoko ia ko ha feituʻu malu ange ke ʻi aí, te tau lava foki ʻo vahevahe ha niʻihi ʻo hotau ngaahi faingataʻaʻiá, ʻa ia mahalo he ʻikai ke tau faʻa vahevahé, koeʻuhí ke lava ʻe ha fefine ʻo ʻiloʻi ʻoku tau faingataʻaʻia foki mo kitautolu. Pea kuo pau ke tau vahevahe mo kiʻi liliu ʻa e ʻulungaanga ʻo e fakangalingali ʻoku tau haohaoá pea fetokoniʻaki ke tupulaki. ʻOku ou saiʻia ʻi he taimi ʻe lava ke vahevahe mai ai ha taha kiate au, koeʻuhí he te u lava ʻo ʻalu kiate kinautolu ʻo pehē, “ʻOi, naʻe anga fēfē hoʻo lavaʻi ʻení? Naʻá ke fehangahangai fēfē mo iá? Fakamālō atu ʻi hoʻo vahevahé.” Pea ʻoku hoko ia ko ha feohi fakatokoua fakaʻofoʻofa ʻa ha kau fafine ʻoku nau ʻofa mo ʻiloʻi ʻenau Tamai Hēvaní.