Ko Hono Mapuleʻi ʻo e Ngaahi Meʻa Mahuʻinga ʻOku Feʻauʻauhí: Kana Mesia

ʻOku ou fakakaukau kapau te u pehē, “Ko e hā ʻa e meʻa ʻe taha kuó ne tokoniʻi au ke u ikunaʻi ha taimi faingataʻa pe mapuleʻi ʻa e ngaahi meʻa mahuʻinga ʻoku feʻauʻauhí?” Ko e foʻi fakakaukau ia ko ʻeni ʻo e “manatu, manatú.” Ko e hā ʻoku tuʻo lahi ai hono folofola ʻaki ia ʻe he Tamai Hēvaní kiate kitautolú? Ko hono ʻuhingá mahalo ʻoku tau faʻa fakahehema ke fakangaloki? Koeʻuhí nai mahalo te ke aʻusia ʻa e mana fakaʻofoʻofa ko ʻení pea ʻi he hoko atu hoʻo moʻuí ʻoku toe ʻi ai mo ha faingataʻa ʻe taha, pea ʻoku mātuʻaki faingataʻa ke ke falala ʻe lelei pē, ʻe ʻi ai pē ha founga ʻe iku lelei ai ʻa e meʻa kotoa pē? ʻOku ou tui ʻoku kole mai ʻe he Tamai Hēvaní ke tau manatú he ʻokú Ne ʻamanaki te tau ako ke falala kiate Ia. Kapau te tau lava ʻo falala kiate Ia, ko e hā pē ʻa e meʻa ʻe hoko maí— te tau lava ʻo ikunaʻi ia ʻi he fiefia, mo e loto-vilitaki. Naʻe ʻikai ke Ne tuku kitautolu ki he māmaní ke tau mamahi. Neongo kapau naʻe hoko ha ngaahi meʻa fakamamahi kiate kitautolu, ka ʻoku ʻikai ko hotau tuʻunga totonú ia.

ʻI heʻeku fakakaukau ki he ngaahi meʻa ʻoku mahuʻingá, ʻoku ou fakakaukau ki he founga ʻo e fakatupú. ʻI hoʻo fakapapauʻi ʻa e founga ʻokú ke fie fakaʻaongaʻi ai ho taimí, meʻa ʻokú ke fie fakamoleki ki ai ho taimí, ko hoʻo fakakaukauʻi moʻoni ia ʻa e meʻa ʻokú ke loto ke faʻú. Ko e faʻahinga moʻui fēfē ʻokú ke fie faʻu maʻaú? Kuó u ʻiloʻi, ko e taimi ʻoku ou fakamuʻomuʻa ai ʻa e ʻOtuá mo falala te Ne tokoniʻi au ke faʻu ha moʻui ʻoku fakaʻofoʻofá, ʻe hokohoko lelei leva ʻa e toengá. Koeʻuhí ʻoku ou ʻiloʻi, ʻoku muimui ʻa e ngaahi meʻa kotoa ko iá ʻi heʻeku holi ke tauhi ki he ʻOtuá mo ʻofa kiate Ia pea mo fakahaaʻi ʻeku ʻofa ʻiate Iá.

ʻI heʻeku fakakaukau ki he anga ʻeku moʻuí, ʻoku ʻikai ke u fakakaukau ki hoku tuʻunga taukeí. ʻOku ou feinga ke fakakaukau ki he tuʻunga ʻoku ou fie aʻusiá, pea ko hoku Takiekiná ia. Ko e meʻa ia ʻokú ne tataki ʻeku fakaʻaongaʻi ʻa e taimí mo e ngaahi meʻa ʻoku mahuʻinga tahá ko e ʻofa kia Kalaisi mo ʻetau Tamai Hēvaní. Pea ʻoku ou tui ʻoku ʻi ai foki mo ha konga mahuʻinga. Kapau ʻoku tau ofi ki he Laumālié, te Ne tataki kitautolu ʻi hotau hala fonongá. Te Ne tokoniʻi koe ke ke liliu ʻi he taimi totonú. Te Ne tokoniʻi koe ke ke fai ha ngaahi fili ʻoku taʻengata hono ngaahi nunuʻá—hangē ko e malí, fāmilí, poupouʻi mo tokoniʻi ʻa kinautolu ʻokú ke ʻofa aí—koeʻuhí ke ʻoua naʻa nofo taha maʻu pē ʻa e tokangá ʻiate koe pe ko e meʻa ʻokú ke faí ka ko e tuʻunga te ke aʻusiá.