Fiemālie ʻia Sīsū Kalaisi

Talitali lelei kimoutolu siʻi ngaahi tokoua, ki hono fakamanatua ko ʻeni ʻo e fokotuʻu mo e ngāue ʻa e Fineʻofá.

ʻOku fakatātaaʻi lelei ʻe he tā valivali fisifisimuʻa ko ʻeni ʻa Michael Malm ʻa e houʻeiki fafine mo tangata, fānau mo e kakai kei talavou—ʻo e matakali, faʻahinga, mo e kuonga kehekehe—ʻoku ʻomi ki hotau Fakamoʻui ko Sīsū Kalaisí. Ko e ngāue ʻeni ʻa e Fineʻofá: ke fakamālohia ʻa e tuʻunga fakaākonga ʻia Sīsū Kalaisí mo teuteu ke foki ki he ʻao ʻo ʻetau ongomātuʻa fakalangí.

Ko homau ngaahi tokoua ʻa kimoutolu. Pea mo kimautolu kiate kimoutolu.

ʻI he kamataʻanga ʻo e fakataha lotu ko ʻení, naʻe fakafeʻiloaki atu kiate kimoutolu ʻa e Fakataha Alēlea Faifaleʻi Lahi ʻa e Fineʻofá. ʻOku uiuiʻi mo vaheʻi kinautolu ke nau faleʻi mo talatalaifale mo kimautolu ʻi hono tataki e houʻeiki fafine ʻo e Fineʻofá. Hangē pē ko kimoutolú, ko ha houʻeiki fafine tui lahi kinautolu—tautautefito ʻi heʻenau fehangahangai mo e ngaahi faingataʻa mo e ngaahi pole ʻo e moʻui fakamatelié ni. ʻI he taʻu ní, ʻoku mou maʻu ʻa e faingamālie ke nau fakalotoa fakalaumālie kimoutolu ʻi he ngaahi vitiō fealēleaʻaki ne ʻoatu fakataha mo e fakamafola ko ʻení.

ʻI he funga ʻo e māmaní kotoa, ʻoku ʻi ai ha houʻeiki fafine ʻe toko valu miliona tupu ʻoku nau kau ki he Fineʻofá. ʻI heʻetau foaki mo maʻu ʻa e fakafiemālié, fakatuʻasino mo fakalaumālie fakatouʻosi, ʻoku tau ʻunu ai ke ofi ange kia Sīsū Kalaisi pea hoko ʻo hangē ange ko Iá.

ʻOku mau lotua ke ʻiate kimoutolu ʻa e Laumālié ʻi hoʻomou fakafanongo ki heʻemau pōpoakí. Naʻa mau teuteuʻi ia mo fakakaukau atu kiate kimoutolu. Hili iá, te tau fiefia leva ke fanongo meia ʻEletā Quentin L. Cook, ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻOku mau ʻofa atu kiate kimoutolu ko e houʻeiki fafine ʻofeina ʻi he ongoongolelei ʻo Sīsū Kalaisí. Ko homau ngaahi tokoua ʻa kimoutolu.