Ko hono Fakatupulaki ʻo e Ivi Matuʻuaki Fakaelotó: Mitzi Semo

ʻI heʻeku kei hoko ko ha faʻē kei siʻí, naʻe taʻu taha homa foha lahí, pea naʻá ku maʻu ha telefoni mei he ngāue hoku husepānití lolotonga ʻeku kei ʻi he ngāué. Naʻa nau pehē mai, “Kuo lavea lahi ho husepānití. ʻOku fiemaʻu ke ke ʻalu ki falemahaki ʻi he taimí ni.” ʻOku ou manatuʻi ʻeku heka ki he meʻalelé pea feinga ke fakamoʻui ka naʻá ku tetetete lahi ʻaupito. Naʻe lahi ange ʻeku hohaʻá ʻi he meʻa naʻá ku fakakaukau ki aí. Peá u tangutu ai, pea naʻe pau ke fai ʻeku lotu. Naʻá ku maʻu ha ongoʻi nonga mo e māfana, peá u ʻiloʻi ʻe lelei pē ʻa e meʻa kotoa. ʻI heʻeku aʻu ki falemahakí pea talamai ʻe he toketaá, “ʻOku ʻikai ke mau ʻilo pe ʻe moʻui ho husepānití.” ʻOku ou manatuʻi ʻa e ongo naʻá ku maʻu ʻi he meʻalelé, pea naʻe ʻikai ko e talamai ʻe he ʻEikí, “ʻOua te ke hohaʻa, ʻe moʻui lelei pē ho husepānití ʻo hangē ko ia kimuʻá,” ka naʻá ku ʻiloʻi te u sai pē pea te mau sai pē ʻo tatau ai pē pe ko e hā ʻa e olá.

Pea ʻi heʻeku fakakaukau ki he ivi matuʻuaki fakaelotó, ʻoku ou fakakaukau ki he nonga ʻoku foaki mai ʻe he Fakamoʻuí mo tokoni ke te ongoʻí. Tatau ai pē pe ko e hā ʻa e olá mo e tūkunga ʻoku hokó, ka ʻokú ke ʻiloʻi ʻokú Ne ʻi ai pea te Ne tokoniʻi koe ʻi he meʻa kotoa pē. Pea ko e ongo ia naʻá ku maʻu ʻi he faingataʻa kotoa ko iá. Naʻe ʻikai faingofua. Naʻá ma foua ha ngaahi meʻa faingataʻa lahi ʻi ha taʻu ʻe taha, fakatuʻasino mo fakalaumālie fakatouʻosi, ka naʻá ma lavaʻi ia peá ma ako ha meʻa lahi.

Te u pehē he ʻikai ke tau aʻusia kotoa ʻa e ngaahi meʻa tatau ʻi he moʻuí. Ka ʻoku ou ʻiloʻi kiate au, ʻi he taimi ko iá, naʻe fiemaʻu ke u tafoki ki he ʻEikí pea maʻu ha vā fetuʻutaki mo Ia. Pea ʻi heʻeku fai iá, naʻá ku ongoʻi hangē te u lavaʻi iá. Pea naʻe toki tupulaki hoku ivi matuʻuaki fakaelotó ʻi he fakavaʻe ʻo e ongoongoleleí pea mo e fakavaʻe ʻo Sīsū Kalaisí. Ko ia, ʻi ha faʻahinga taimi pē ʻi he kahaʻú ne hoko ai ha faʻahinga meʻa, naʻá ku manatuʻi ia.

Pea te u pehē foki ko e Sāpate kotoa pē ʻoku ou maʻu ai ʻa e sākalamēnití, ʻi he taimi ʻoku pehē ai ke manatu ki he Fakamoʻuí, ʻoku ou manatuʻi ʻa e ngaahi aʻusia naʻá ku maʻu mo Iá. Kuó ne langaki foki hoku ivi matuʻuaki fakaelotó, he ʻoku tokoni ʻa e manatu ko iá ke mahino kiate au ko e fānau au ʻa e ʻOtuá pea ʻoku ʻi ai haʻaku taumuʻa pea ʻoku ou ʻi hení ke tokoni kiate Ia ʻi hono langa Hono puleʻangá. Pea neongo pe ʻe lelei pe kovi fēfē hotau kahaʻú, ka ʻoku ou ʻiloʻi te u maʻu pea te u tafoki maʻu pē ki he Fakamoʻuí. Kuó u falala ki he vā fetuʻutaki ko iá, pea ʻoku maʻu mei ai hoku ivi matuʻuaki fakaelotó.