Vaqaqacotaki ni Yalodei: Mitzi Semo

Niu se tina gone, a yabaki dua na luvei keirau tagane qase, au a ciqoma e dua na qiri niu cakacaka tiko mai na nona cakacaka na watiqu. Ka ratou tukuna mai, "Sa mavoa sara vakaca na watiqu. E gadrevi mo gole sara yani vakatotolo ki valenibula." Au nanuma ena noqu vodo ena motoka ka tovolea meu yavalata kau qai vakila niu sautanini vakalevu. Au lomaleqa sara vakalevu. Au dabe toka e kea, kau cabora e dua na masu. Au vakila na vakacegu, kau kila ni na vinaka na veika kece. Okoya, niu yaco yani ki valenibula ka tukuna vei au na vuniwai, "Keitou sega ni kila kevaka ena lako curuma rawa na watimu na ka oqo." Au nanuma na yalo au vakila niu a tiko ena motoka, ka sega ni vaka me tukuna tiko vei au na Turaga, "Kua ni lomaleqa, ena bulabula vinaka na watimu me vaka e liu," ia au se kila tikoga ni na maucokona ka na vinaka vei keitou se cava ga ena yaco.

Niu vakasamataka niu sa lomakasa ka yalodei, au vakasamataka na vakacegu e solia vei iko na iVakabula ka vukei iko mo vakila. Se cava ga ena yaco kei na veika e sotavi tiko, o kila ni tiko o Koya ka na vukei iko kina. Oqori na ka au vakila ena loma ni veika kece oya. E sega ni rawarawa. Keirau lako curuma e vuqa na yabaki ni veika dredre, vakayago ka vakayalo, ia keirau lako curuma rawa ka keirau vulica e levu na ka.

Au na kaya ni sega ni o keda kece, eda na sotava tale tikoga na veika vata oqori ena bula oqo. Ia au kila vei au, ena gauna o ya, au gadreva meu gole vua na Turaga ka semati Vua. Niu cakava oqori, au vakila ni vaka me ‘u rawa ni curuma sara ga na ka oqo. Ka qai tarai cake na noqu yalodei ena yavu ni kosipeli kei na yavu i Jisu Karisito. Ia, ena dua na gauna mai muri ni yaco e dua tale na ka, au nanuma tiko oqori.

Ka sa dodonu meu na kaya talega ni vei Sigatabu niu dau vakayagataka na sakaramede, ni tukuni vei au meu dau nanuma na iVakabula, au nanuma na veika au a sotava kei Koya. Ka sa tara cake talega na noqu yalodei, baleta na vakanananu oya e vukea meu kila se o cei o au vaka luve ni Kalou kau sa tiko eke ka ni’u mai tiko eke meu vukei Koya ena kena tarai cake na Nona matanitu. Ia, se vakacava na vinaka se ca ni noda veisiga ni mataka, o kila, ni yaco mai, au kila niu na dau gole ka gole tikoga vua na iVakabula. Kau sa vakararavi kina isema oqori, oqori na vanua e lako mai kina na noqu yalodei.