Na Loloma kei na Rarama ni Kalou e Tudei, Sega ni Veisau, ka sega ni Yavalati Rawa

Kemuni na taciqu lomani, se vanua cava ga oni vakaitikotiko kina e vuravura, yalovinaka moni kila ni keitou lomani kemuni ka lomani kemuni talega na Tamamuni Vakalomalagi kei na nomuni iVakabula. Au kila ni so na gauna ena dredre beka me vakilai na Nodrau loloma. Sa dau yaco vei au e so na gauna vaka oqori. Ia au vakadinadinataka vei kemuni ni Nodrau lomani iko ena sega vakadua ni veisau. Ena dau tiko ena veigauna mada ga ni butobuto ena nomu bula ena gauna ka dau dredre kina me vakilai.

E vuqa vei keda e taleitaka na veisiga e totoka kina na cila ni matanisiga, se vacava! E ramase cake na roka ni veikabuli ni cila tiko na matanisiga. Ena veisiga batabata, eda taleitaka meda vakila na matanisiga me cilava na matada. E vakasinaiti keda ena katakata kei na rarama. Ia e dina, e na yaco mai na siga rugurugua, ucauca, ka butobuto ka da sega ni raica rawa na matanisiga se vakila na kena katakata ka ra yali na roka ka siyawa yani. Ena veisiga rugurugua se ena cava oqori se ena buto ni bogi, eda dau vakatitiqataka beka ni tiko na matanisiga? Eda ririkotaka beka ni na sega ni cila tale na matanisiga? E sega ni vakakina! Eda kila ni sa oti ga na cava se na bogi, ni tawase na o, eda na raica tale na iserau ni matanisiga ka vakila na kena katakata. E dau tu ga na matanisiga, sega ni veisau ka sega ni yavalati rawa. E dei tu ga.

Oqo edua na vosa vakatautauvata yaga me baleta na rarama ni noda iVakabula kei na Nona loloma vei keda. Na Nona rarama e solia na bula ka vakaibalebale na veika kece ena noda bula. Na Nona loloma e vakatakata na yaloda ka solia vei keda na inuinui me baleta na veisiga ni mataka. Ia me vaka ga ni tiko na veisiga rugurugua, na cava, kei na siga butobuto eda sega ni raica rawa kina na matanisiga ena noda ilakolako ni bula oqo, ena tiko talega na veisiga rugurugua, na cava, kei na veisiga butobuto ena dredre kina meda vakila na loloma ni iVakabula se raica na Nona rarama. Ena tiko beka eso na gauna ena vaka me Rau yali kina na Tamada mai Lomalagi kei na noda iVakabula ena noda bula, ka da rere vakalevu ni Rau sa biuti keda tu, ka Rau sega ni lomani keda, ka da sa galili tu. O Josefa Simici kei na iVakabula vakataki Koya erau a vakila na nodrau sa biu tani mai vua na Kalou.

Ia, kemuni na taciqu, au vakadinadinataka vei kemuni ni sega ni dua na ka e rawa ni tawasei keda tani mai na loloma nei Tamada Vakalomalagi kei Jisu Karisito! Na Nodrau rarama kei na Nodrau lomani keda e tudei, sega ni veisau, ka sega ni yavalati rawa, me vaka ga na rarama kei na katakata ni matanisiga. E sega ni gadrevi meda rere ni Rau sa biuti keda, baleta ni Rau na sega vakadua ni cakava. E sega ni Nodrau ivakarau me Rau vakayacora vakakina.

Au nanuma sara na noqu a vakila na galili ena neirau a toki ki Mexico ni oti na neirau vakamau kei watiqu. E imatai ni gauna ena noqu bula, meu bula vakayawa mai na noqu itikotiko kei na matavuvale au a susu kina. Au a se bera ni vosataka rawa se kila vakavinaka na ivosavosa, au sa namaka tiko na imatai ni luvei keirau, ka sa dau yali vakalevu o watiqu me lai cakacaka ka lai vuli. Au nanuma lesu na noqu a vakila na galili vakaitamera, kau yali, ka rere. E a dredre vei au meu vakila ni Tamaqu mai Lomalagi e kilai au tu. Au a sega ni vakila rawa na katakata kei na rarama ni Nona loloma na noqu iVakabula. Au sa tekivu vakila na butobuto, yalolailai, kei na yaluma.

Ia eso vei ira na marama taciqu ena iSoqosoqo ni Veivukei era a gole mai mera mai veivueti. Era mokoti au ka vukei au meu vakila niu a sega ni tiko duadua. Era solia vei au na veivakayaloqaqataki kei na veitokoni ena nodra matadredredre, irairai vakayalovinaka, kei na loloma, dina ga niu a sega ni kila na nodra vosa ka ra sega ni kila rawa talega na noqu. Ia baleta niu a rawa ni vakila na nodra loloma kei na veiciqomi vei au, a tawasei kina na o loaloa kau a vakila tu, kau sa tekivu vakila tale na loloma kei na veitokoni nei Tamaqu mai Lomalagi vei au.

Kemuni na taciqu, eda rawa ni kitaka oya vei keda vakai keda. Eda luvena yalewa kece na itubutubu vakalomalagi, ka da veigadrevi vakai keda. Veitalia na vanua eda tiko kina, veitalia na noda ituvaki yadua, e dodonu meda kakua sara ni vakila nida tiko duadua se galili. Eda vakavolivoliti tu mai vei ira na tacida kei na ganeda vakayalo. Eda sa tadu kece vata mai ki vuravura ena gauna oqo, ka da veigadrevi vakalevu sara vakai keda. Na veitemaki ni veidutaitaki kei na veivakalewai vakai keda e lako mai vua na meca. E vinakata o koya me wasei keda baleta ni kila tu o Koya na kaukaua levu ena yaco mai nida vakila na duavata, na loloma, kei na veitokoni vakai keda. Sa rawa meda veivukei meda vakila na loloma ni noda iVakabula nida saga meda duavata me vaka eda sa luvena yalewa na Kalou. Meda veitauri liga, veilaveti cake, ka lako vata ki vale.

Au vakabauta ni Tamada Vakalomalagi kei na noda iVakabula e Rau dau vakau itukutuku ni loloma kei na veitokoni vakawasoma mai vei keda, ia ena vuqa na gauna eda sega ni kila na itukutuku oqori baleta ni da sega beka ni vaqarai ira tiko. Niu raica edua na manumanu vuka lailai e taudaku ni noqu katubaleka, niu vakasarava tiko na dromu ni matanisiga, se raica wale tikoga na totoka kei na kedra qoroi na veika buli edau vukei au vakavuqa meu vakila na Nodrau loloma. Ni sa dredre mai na veika eso kau vakila niu yalolailai, ena so na gauna au dau siqema rawa na Nodrau itukutuku ni loloma kei na veitokoni ena vuku ni dua na tiki ni ivolanikalou ka tara na yaloqu niu wiliwili tiko, se ena dua na veitalanoa veivakauqeti vata kei na dua tale, se dua na ka au vakila niu vakarorogo tiko kina veiqaqa ni dua na sere totoka se sere e veilaveti.

Au taleitaka na veiqaqa ni dua na noda serenilotu vou: "His Eye Is on the Sparrow" [Sa dau Wanonova na Separo]. Na imatai ni qaqana kina e kaya:

Au vakadinadinataka vei kemuni ni Matana e sega walega ni wanonova na separo ia sa wanonovi kemuni yadudua sara ga. O iko edua na luvena yalewa lomani na Kalou, kau vakadinadinataka nio na sega vakadua ni guilecavi. Oni kilai, oni lomani, ka bibi na domomuni, vakabibi vua na Tamamuni mai Lomalagi kei na Luvena e Duabau Ga. E rau kila vakamatata na mosi ni yalomu, wainimatamu, nomu rarawa, kei na nomu mosi. Na nomu masu edau rogoci mai vua na Tamamu Vakalomalagi dauloloma.

Na ilakolako vakayago oqo e sinai tu ena bolebole kei na veidredre eso, oka kina na yali ni veika duidui eso—nodra yali na itokani se daulomani, yali ni bulabula vakayago se vakasama, na yali ni veika vakailavo, kei na yali ni kaukauwa kei na nuidei. Au taleitaka na veika a tukuna o Elder Joseph B. Wirthlin me baleta na yali: "Sa sauma lesu na Turaga vei ira na yalodina na veika sa yali. Na veika e kau tani mai vei ira era lomana na Turaga ena vakaikuritaki vei ira ena Nona sala ga. Me vaka ni na sega beka ni yaco mai ena gauna eda gadreva kina, era na kila o ira na yalodina nira na vakalesui mai na wainimata nikua ena drau vaka drau na wainimata ni reki kei na vakavinavinaka."

A kaya na Parofita o Josefa Simici, "Raica ena soli vei iko na veika kece o sa vakayalia ena tucaketale, vakavo kevaka mo talairawarawa tiko ga. Ena raivotu ni Kalou sa Cecere Sara, au sa raica kina."

Au vakadinadinataka ena vuku ga ni noda iVakabula lomani kei na Nona isoro ni veivakaduavatataki, era sa dina kina na veiyalayala oqori. Kevaka o yalodina tikoga vua na Kalou, ena yaco na veika keceo vakayalia, ena vakalesui mai vei iko, ona qai tagi ena reki kei na vakavinavinaka vua na Tamamu Vakalomalagi ena Nona veivakalougatataki vakaikuritaki.

Na tikina oqo ena ivola ni Vakatakila e dau kauta mai vakawasoma vei au na vakacegu ka vukei au meu vakila na loloma ni Kalou, "Ia ena tavoya tani kecega na Kalou na wainimata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa." Nanuma talega na yalayala oqo: "Sa veivuke na ka kecega mera vinaka kina era sa lomana na Kalou." Sa dua na vosa totoka ka veivakacegui! O Jisu Karisito na rarama kei na vunibula kei vuravura, ka sa yalataka o Koya nida muri Koya, eda na sega ni lako ena butobuto.

Au vakadinadinataka vei kemuni ni na sega vakadua ni guilecavi iko na Tamamu mai Lomalagi kei na nomu iVakabula, se o cei ga o iko, veitalia na vanua o tiko kina, se cava ga na ituvaki o sotava tiko oqo, se cava ga na nomu veigauna sa oti. Na Nodrau rarama kei na Nodrau loloma vei iko e tudei, sega ni veisau, ka sega ni yavalati rawa. Ia ni yaco mai na o kei na cava ena nomu bula, ko na kila Nirau a dau tiko vata ga kei iko, ena gauna mada ga ni nomu veisiga butobuto. Ena yaca i Jisu Karisito, emeni.