Na Marama Yalo Savasava e Dei na Nodra Vakanamata vei Jisu Karisito

Dua na veivakalougatataki kamica ni noqu veikacivi oya meu loloma vakabibi, ka vakauqeti kemuni, na marama ni Lotu i Jisu Karisito ni Yalododonu Edaidai. Ena noqu vakasama, au tiko kei kemuni ena nomuni vanua tabu—eda soqoni beka e valenilotu, se ena valelaca, ena vale, se bolabola , se nomu vale—e sa dabe veitarai na duruda meu tukuna niu lomani kemuni, niu sa dina ni ko sa luvena yalewa na Kalou dauloloma, kau sa dei ni rawa mo nuitaki Jisu Karisito.

Sa isolisoli meda dabe kei ira na marama Yalododonu e vuravura era sa vakaraitaka tiko na kaukauwa bibi, rawaka, yalodina, ka vakabauti Jisu Karisito. Na loloma ni Kalou vei ira na marama sa ivakaraitaki ena noda madigi meda vuli ka veivakavulici vakaikeda.

Na cava au kila ena veigauna eso kei ira na marama ena Lotu i Jisu Karisito—na veiqaravi ena veisiko, na gauna ni kele ni motoka, kei na talanoa ni volivoli?

Au kila ni dredre na bula.

E rawa nio caka dredre kei Jisu, se mo caka dredre taudua. Oqori e nomu digidigi. Ia nio cakava eso naka dredre kei Jisu Karisito, e yaco na dredre me vakalou. O sa na yalewa vakalou.

Au a sotava e dua na sisita ena ikele ni motoka. A lako mai vei au ka kaya ni luvena yalewa a mavoa ni tavuki na motoka ka curu sara ki valenibula. A kaya talega ni takali taumada e dua na luvena yalewa ena kenisa. Au nanuma kina ni vinakata o noqu itokani meu lomani koya. Ia oya a sega mada ga ni gadreva o koya. A sega ni lako mai meu vakacegui koya, a lako mai me tukuna na ivakadinadina ni luvena yalewa era wanonovi koya tiko na agilosi dauveiqaravi, ka kila ni luvena yalewa sa mate sa dua vei ira na agilosi oqori, ka vakadeitaka ni nona matavuvale sa tawamudu baleta na nona a vauci ena vale ni Turaga. Sa luvena yalewa veiyalayalati ni Kalou, sa uabaleta na bolebole ni bula ena vakabauta kei na nuidei ena ituvatuva ni marau na Tamana dauloloma, na kaukauwa veivueti i Jisu Karisito, kei na yalayala na agilosi era qaravi koya kei ira nona daulomani. E tiko e dua na luvena yalewa e valenibula. E dredre tikoga na nona bula oqo. Ia e digitaka o noqu itokani me cakavavata kei Jisu Karisito na dredre oya ka sega ni cakava taudua. Na nona dredre sa mai gauna vakalou, sa gauna vakalou.

Au kila e dua na marama kei na va na gone lalai ka susugi iratou taudua ga ka cakacaka me bula nona vuvale ena gauna ni sa kunei vei tinana na bibi ni kenisa. A kaya vei au ni gauna veivakarusai oqo sa tekivu me masu vagumatua cake ka vakawasoma sara—vakakina talega me vukei ena sala me vakani iratou kina na luvena. A rawata kina na veivuke ni Tamada Vakalomalagi kei na iVakabula. Nuitaki Rau, e vakarautaki koya me cakava na veiyalayalati ena vale ni Turaga. Sa bibi cake tikoga na tauvimate nei tinana, ia eratou a lako ga yani vakavuvale kei na itokani ki na valetabu voleka, ka laki vakaedaumeni kina o noqu itokani vou ni oti ga vakalailai a mai mate o tinana. E dredre tikoga na nona bula oqo ia e digitaka me vauci vua na iVakabula ena veiyalayalati, sa rawarawa cake na toso ki liu. E dredre, ia e rawarawa, baleta ni rawata vakalevu nona Veivakabulai, kaukauwa vaqaqacotaki. Au taroga na nona veiwekani kei na iVakabula, buli ena bukawaqa ni veika dredre. A kaya na marama vakalou oqo ni sega ni rawa me kila ka nuitaki Jisu Karisito me titobu sara ena gauna oqo ke sega na dredre oqo.

O na raica, e katakata na bukawaqa ni veivakasavasavataki. Oqo na isau ni bula vakalou. Na iqaqi kei na isavati ni siliva e cakava na bukawaqa me vakama na duka. Ia na iqaqi e sega ni kolotaka na oa ena bukawaqa ka lako tani. Ena raica vakavinaka o iqaqi na katakata kei na gauna me soli kina na okisijini, ka raica na vatuka ni siliva me buli ena dela ni kaukamea dau waicala. Ena uvuca laivi o iqaqi na duka, me yaco na siliva dina, sa ramase ka rarama na delana—me vaka na iloilo, e ilova na irairai kei iqaqi.

“O Koya [e tukuni Jisu Karisito] me vakawaicalataka ka savata na siliva.” Eda sa siliva mareqeti, savasava ka digitaki ena bukawaqa ni veivakararawataki. Me vaka sa qaqiraki na siliva, sa kama laivi na veika duka, eda sa bula vakalou cake, eda sa marama vakalou.

O na kila beka, sotava, ka ciqoma na rai matua nei iQaqi ni o tu ena bukawaqa ni veika dredre?

E vakasalataka o Peresitedi D. Todd Christofferson: “Ena loma ni bukawaqa nei iqaqi, kakua ni cudruva na Kalou, mo voleka ga Vua. Mo vosa vua na Tamada ena yaca ni Luvena. Lako vata kei Rau ena Yalotabu, ena veisiga. Solia na gauna me Ratou vakaraitaka na Nodratou dina vei kemuni. Mo kilai Ratou vakaidina ka kilai iko vakaidina sara.”

Ena dau dredre sara. E rawa nio cakava vata kei Jisu, se mo cakava dredre taudua. Nio cakava vata kei Jisu Karisito, na veika dredre oqori ena vakalou.

Na marama vakalou o Hannah sa ivakaraitaki vakaivolanikalou ni ivakavuvuli oqo.

A lako o Hannah kina vale ni Turaga, ka sa laki tagi kina. Ni masu ena yalo malua a vakaraitaka vua na Kalou na rarawa ni lomana kei na yaluma ni yalona baleta ni sega ni vakaluveni rawa. A sega ni vosakudrukudru. E vosa vakadodonu Vua ni sa rarawa titobu kei na yaluma. A “sova na [yalona] vua na Turaga,” ka sa talaucaka kece, dina ga ni kila o Koya na titobu ni nona rarawa.

A yalataka o Hannah—na ivakaraitaki ni nona lomasoli me vakatabuya na nona kalougata mai vua na Turaga ena Nona inaki. A kaya vakadoudou: “Kemuni na Turaga ni lewevuqa, oni sa vinakata … ka solia vei nomuni vada e dua na gone, kau na qai soli koya me nomuni Turaga.”

Sa kaya o Ilai, na bete, vei Hannah me “lako ena vakacegu” ka vakadeitaki ni gone a kerea vua na

Turaga ena soli ga vua. Na yalomalua nei Hannah sa vakadinati ena nona kaya, “Me kune vinaka o nomuni vada e matamuni.” Sa qai lako yani ka “sega tale ni vakaveveku mata.”

Sa yaco, me kalougata ko Hannah ena dua na luvena tagane, o Samuela. Ni sa kali, a doka na nona yalayala ena nona kauti gone mai ki na vale ni Turaga. Sa qai masu me vakacaucau me vakavinavinaka vua na Turaga. A kaya, "Sa reki na yaloqu vua na Turaga." "Sa sega e dua sa savasava me vaka na Turaga: sa sega e dua me vakataki [kemuni]; sa vatu ga na noda Kalou."

Sa qai biuti Samuela kivei Ilai na bete, ka soli koya taucoko ki na veiqaravi ni Kalou. Sa qai kali na gone. E rawa nio raitayalotaka? Ni sa kune kalougata e muri me lima tale na luvena, na gauna a soli Samuela kina vua na Turaga, a luvena daubau ga. A sega tu ni kila ni ra na lako tale mai na gone eso. A sega ni rekitaka na veigauna talei a gadreva tu e dua na tina—me raici koya me cici ka qito, me vakavulici koya me loloma ka veiwasei, ka vakamoceri koya.

Ena veiyabaki ni rau gole yani kei na watina kina vale ni Turaga me vakacabo isoro ni yabaki, a kauta tiko mai e dua na kote lailai ka vou a cakava me nei Samuela. Na cava a kaya ni a raici koya? Na cava beka a vakila na yaloi tinana ena nona se baci vakamoce tale vakadua?

E sega ni tukuna na ivolanikalou na rarawa ni yalona. Ia au raitayalotaka.

Raica, a yalodina tiko o Hannah, ka se dredre tikoga na bula.

Kemuni na taciqu ena Soqosoqo ni Veivukei kei kemuni na Hannah ena gauna oqo, na marama vakalou, ena gauna dredre era sokalou ena vale ni Turaga, lolo, sovaraka na yalodra taucoko vua na Turaga ena masu, vakatabuya na nodra kalougata mai vua na Turaga, maroroya na nodra yalayala Vua, ka nuitaka na Turaga—na Nona lewa vei ira ena Nona gauna.

Eda sa bula voli tiko vakayago ka na yaco kina me da na qase mai ka tauvimate. O keda, ka so tale, sa noda na madigi lagilagi meda galala ena digidigi, me baleta na vinaka se ca. Sa na dredre ga. Mo caka dredre vata kei Jisu Karisito, se mo caka dredre taudua ga. Au vakadeitaka ni gauna o caka dredre vata kei Jisu Karisito, na dredre sa na vakalou—draki vakalou, gauna vakalou, marama vakalou.

Walega qo, au rogoci ira na gone ni ra lagata na sere oqo:

Kemuni na taciqu, eda gadrevi Jisu Karisito vakalevu. Nona rarama, Nona loloma, Nona inuinui, na Nona veivakabulai, kaukauwa qaqaco.

Na marama vakalou era sa rai matua vei Jisu Karisito. Eda “tukuni Karisito, [eda] rekitaki Karisito, [eda] kana magiti ena vosa i Karisito, ka toso ki liu ka tudei vei Karisito.” Na loloma, sa loloma savasava i Karisito, sa sega ni biuti keda.

Kevaka, mada ga, e sega ni bolei tiko na nomu bula e vuravura, nanuma na ivakasala nei Elder Neal A. Maxwell, “Ena gauna o ya, oi keda eda sa sega ni vakadodo tiko ena dua na kauveilatai, sa dodonu meda na tiko ena yavana e dua tale—e sinai ena yalo ni loloma kei na veivakalomavinakataki vakayalo.”

Oqori na nodra cakacaka na marama vakalou.

Au vakadinadinataka ni o Jisu Karisito sa noda Dauveivueti ka Dauveisavati dauloloma. Ni da nuitaki Koya ena bukawaqa ni rarawa, na veigauna dredre sa laki draki vakalou, ka da sa marama sa vakalou. Au lomani kemuni; ka vakadeitaka ko ni sa luvena yalewa na itubutubu dau loloma vakalomalagi, kauvakadeitaka mo nuitaki Jisu Karisito ga.

Ena yaca i Jisu Karisito, emeni