Qaravi ni Veika me Vakaliuci: Sharlene Miner

Na veika au vakaliuca e levu duadua sai koya na lomana na Kalou ka lomani ira na tani. A kaya o Peresitedi Benson ni gauna eda vakaliuca kina na Kalou, ena tau ena kena itutu dodonu na veika kece tale eso. Na dina ni ka oqo sai koya ni da duidui kece ena noda ituvaki. Eso vei keda eda tokona na noda matavuvale, eso vei keda eda sega tu ni vakawati, eso vei keda era vakaluveni, eso vei keda eda bula duadua tiko, ka so era qaravi ira na matavuvale ena taudaku ni luvedra. Na ka au sa vulica oya kevaka eda vakaliuca na Kalou, na veika kece ena tau ena kena vanua dodonu. A kaya o Peresitedi Oaks, "E laurai levu na veika eda vakaliuca ena ivakarau ni noda vakayagataka na noda gauna." Au sa qai raica ni’u vakadeuca tikoga na noqu vakayagataka na noqu gauna, au na rawa ni raica vakamatata sara kevaka na veisotari na noqu bula kei na veika au vakaliuca.

O au e dua na vuniwai ni leqa tubukoso, kau vukei ira era lako mai ki valenibula ni ra tauvimate se mosi se dua e paralase se sa mai takali wale ga e dua na nona daulomani ena dua na vakacalaka. Na noqu inaki taumada sai koya meu lomana na Kalou ka lomani ira na tani. Ena dua na gauna lekaleka, me’u na tauyavutaka e dua na isema ni veivakabauti ka me’u vukei ira na tamata me ra vakila na loloma ni Kalou. Niu dau cakacaka, au sega ni vakasamataka, "Meu na tosoya vakacava noqu cakacaka niu cakacaka tiko nikua?" Na noqu masu ena veisiga ni bera ni’u laki cakacaka o ya, "Meu vukei ira vakacava na tauvimate au dau qarava mera vakila na loloma i Jisu Karisito?" E bibi talega ni gauna era biuta kina na tamata na tabana ni leqa tubukoso ni oti na nodra veitaratara kei au, mera vakila na loloma i Jisu Karisito. Au sega ni vinaka sara kina, ia au tukuna vei kemuni ni veigauna kece au dau lai cakacaka kina, ena veigauna kece au yadra ena mataka, ena veigauna kece au na dau veimaliwai kina kei ira na luvequ, oqori na noqu masu, sai koya mera na vakila na loloma nei Tamada Vakalomalagi mai vei au.

Au vakadinadinataka ni lomani kemuni na Tamada Vakalomalagi. E lomani ira yadua na Luvena. Au vakadinadinataka talega ni gauna eda segata kina me da wasea na loloma i Jisu Karisito vei ira tale eso, ena vakasinaiti na yaloda. Eda na vakasinaiti ena rarama i Jisu Karisito, ka ra na rawa ni vakila na Nona loloma mai vei keda.