Kunea na Kaukauwa kei na Vakacegu vei Jisu Karisito: Dana Earl

Vica na yabaki sa oti, au a tekivu vola eso na italanoa ni noqu bula, tekivu noqu a vakila na Yalotabu se vakila na veivakauqeti ni iVakabula ena noqu bula se vakila Nona vakacegu ena gauna niu gadreva meu vakilai Koya. Kau sa tekivu vola na italanoa oqo baleta niu vinakata meu solia vei iratou na luvequ. Ia na ka a yaco ena cakacaka oqo sai koya niu sa tekivu raica na liga ni Kalou ena noqu bula. Au sa tekivu raica ena noqu vola na veikayaco eso oqo ni Kalou a tu vata kei au, kau a raica na Ligana, kau sotava na veika totoka eso oqo, ka tu vei au na ivakadinadina ni a kauwaitaki au o Koya kau a kila ni a tiko kei au o Koya. Kau a raitayalotaka nira sa yaco mera iloloma lalai kau rawa ni raica niu tawani ira ena noqu taga, ka rawa meu kauti ira wavoki tu. Ena gauna au sotava kina edua na siga se dua na vula ca, au na dreta mai na veikasotavi oya ka kaya, "Au kila. Baleta ni a yaco dina vei au, au sega ni vakatitiqa baleta niu a sotava dina oya. Ka sa tiko vei au, ka sa noqu.”

Kau nanuma, au kila, au vakadeitaka ni Tamada Vakalomalagi e vinakata meda sotava vata kei Koya eso na ka. Au vakabauta ni oqori na vuna e tiko kina na ivolanikalou—me da sotava vata kei Koya eso na ka. Io, au raica vakaiyaloyalo na ka, ni noqu taga lailai ni veika au sotava au dau kauta tu. Kivei ira vakayadua sara, au rawa ni kauti ira mai niu gadrevi ira. Na noqu volai ira a vukei au meu nanuma lesu na ka a yaco. Ena veigauna au gadrevi ira kina, era a tiko.

Na vuna au via tauri ira kina na italanoa oqo ka maroroi ira me sa noqu me ivakadinadina ni veika au a sotava oti mera kila na luvequ kei ira noqu kawa ka vakadinadinataka talega vei Tamaqu Vakalomalagi niu a raici koya, niu a raica ka kila. Au vakila ni so vei ira era vaka edua na iregu ena yadreda. Niu a vakila, ka kila. Kau vinakata meu tusanaka oqo. Kau sa tomana tiko na noqu volai ira meu rawa ni tusanaka niu a raici ira se vakilai ira.