Kunea na Kaukauwa kei na Vakacegu vei Jisu Karisito: Hannah Miller

E a qiriti au mai o taciqu meu laki raici tamaqu rawa e vale ni bera ni vakacegu. Keitou a lolo vakavuvale me yaco na cakamana, ia ni oti ga na neitou lolo, keitou a vakamoce vei tamaqu, ka qai takali yani. Ena gauna qori, au kila ni cakamana oya ni sa vakacegu kina na nona tauvimate vakayago kei na nona ibolebole. Kau vakasamataka na mavoa keitou vakila vakamatavuvale. Ia a totolo sara na nona a vakacegui keitou na Turaga. E na vuqa na gauna dredre keitou sotava, o ira na itokani kei na matavuvale era kauta mai na veivakacegui levu kei na veitokoni.

Niu vakasamataka na ka sa yaco oqo, au vulica—niu sa vulica tiko na ivolanikalou na iVola i Momani. Ena Vosa i Momani, ena tikina e 17 kei na 18, e tukuni kina na cakacaka levu nei Tui Penijamini, me tauyavutaka nodra tiko vakacegu na tamata. Kau taleitaka na veika a tukuna. E kaya, "Sa tamata yalosavasava ko Tui Penijamini, ka liutaki ira na nona tamata ena ivalavala dodonu; ka sa lewevuqa na tamata yalosavasava ena vanua." Ka sa qai tukuni e muri, "Ena nodra veivuke ko ira oqo, sa cakacaka kina o tui Penijamini, ena nona igu taucoko [kei na] yalona taucoko, kei ira talega na parofita, sa vakataudeitaka tale na tiko sautu ena vanua."

Kau vakasamataka na malanivosa oqo "ena nodra veivuke ko ira oqo" kei na wasoma ni noqu sotava na bolebole oqo ena noqu bula au a sega ni rawa ni cakava ke sega na nodra veivuke na turaga kei na marama savasava e kea me ra dabe tikivi au, tagi vata kei au, ka vakacegui au me keimami vakadinadinataka na Kalou. So na gauna e vaka me tawarogoci na noda masu. E vakilai ni sega ni saumi mai, ka rairai sega ni rogoca na Turaga. Ia au vinakata meu vakadinadinataka ni ra sa rogoci na masu oqori ka saumi mai ena sala sa uasivi sara. Baleta ni kauwaitaki iko na Turaga, e kauwaitaka na nomu masu, e kauwaitaka na veika e vakabibitaka tu na nomu vakasama kei na yalomu, e kauwaitaka na vuna o sega tu kina ni moce. Ena yaco mai na kena isau. Ena yaco.