Ang Limang Tahanan nina Joseph at Emma Smith sa Ohio

Sa mismong araw ng unang pagdating nina Joseph at Emma Smith sa Kirtland, nakatanggap si Joseph ng isang paghahayag kung saan iniutos ng Panginoon sa Simbahan na bigyan siya at ang kanyang pamilya ng isang bahay na matitirhan at patuloy na gawin ang inspiradong pagsasalin ng Biblia (tingnan sa Doktrina at mga Tipan 41:7).

Sa kabila nito, ilang taong umasa sina Joseph at Emma sa kabaitan at mabuting pakikitungo ng mga miyembro ng Simbahan sa pagbibigay sa kanila ng matitirhan.

Narito ang limang lugar kung saan nanirahan sina Joseph at Emma sa loob ng pitong taon na nasa hilagang-silangang Ohio ang punong-tanggapan ng Simbahan.

Nang dumating sina Joseph at Emma Smith sa Newel K. Whitney Store sa Kirtland noong ika-4 ng Pebrero 1831, si Newel at ang kanyang asawa, si Elizabeth Ann, ay kaagad silang inanyayahan na manirahan sa kanilang tahanan hanggang sa makahanap sila ng mas permanenteng tirahan. “Masaya kami na tanggapin sila at ibahagi sa kanila ang lahat ng kaginhawahan at pagpapala na tinatamasa namin,” paggunita ni Elizabeth Ann.¹

Mula noong nakaraang Oktubre, sa unang pagdating ng mga misyonero sa Ohio, maraming pulong ang idinaos ng mga Whitney sa sala ng kanilang tahanan. Sa loob ng apat na linggo na nanirahan sina Joseph at Emma sa Whitney Home, patuloy na nagsilbing sentro ang tahanan para sa mga aktibidad sa Simbahan.

Maraming Banal ang pumunta sa tahanan ng mga Whitney para dumalo sa mga pulong at bisitahin ang Propeta. Habang naninirahan dito, natanggap ni Joseph Smith ang ilang paghahayag na matatagpuan ngayon sa Doktrina at mga Tipan.²

Ang ilan sa pinakamahalaga ay Doktrina at mga Tipan 41. Natanggap sa unang araw na nanirahan sina Joseph at Emma sa mga Whitney, ang paghahayag na ito ay nagpakilala sa katungkulan ng bishop at tinawag si Edward Partridge na maglingkod sa posisyong ito. Matapos ipadala si Partridge sa Missouri upang maglingkod bilang bishop doon, si Newel K. Whitney ay tinawag na maglingkod bilang bishop sa Ohio.³

Ang paninirahan nina Joseph at Emma sa Whitney Home ay pansamantalang lamang. Sa mismong araw na dumating sina Joseph at Emma at natanggap ni Joseph ang paghahayag na dapat magtayo ng isang bahay para sa kanila, pumayag si Isaac Morley, isang mayamang magsasaka sa lugar, na magpatayo ng bahay sa kalapit na bukid na pag-aari niya.

Pinamahalaan ni Morley ang pagtatayo ng maliit na bahay para kina Joseph at Emma Smith, na natapos kaagad sa loob lamang ng apat na linggo. Lumipat sina Joseph at Emma sa kanilang bahay sa Morley Farm noong unang bahagi ng Marso 1831.

Si Isaac at ang kanyang asawang si Lucy ay masigasig na tumulong sa pagpapatatag ng ipinanumbalik na Simbahan mula nang mabinyagan sila noong Nobyembre 1830. Habang nagbibinyag ng mga bagong convert sa Ohio at nagdatingan ang mga Banal mula sa New York, marami ang nakahanap ng pansamantalang tirahan sa Morley Farm.

Habang naninirahan sina Joseph at Emma sa sakahan, si Joseph ay patuloy na nagdaos ng mga pulong sa mga Banal at tumanggap ng mga paghahayag. Makikita sa mga talaan na si Joseph ay nagdikta ng maraming paghahayag, kabilang ang 13 na isinama ngayon sa Doktrina at mga Tipan.⁴

Ang mga paghahayag sa panahong ito ay nagbigay kay Joseph at sa mga Banal ng makabuluhang kaalaman tungkol sa tungkulin ni Jesucristo bilang ating tagapagtanggol, kung paano magsagawa ng mga pulong, kung paano ituro sa isa’t isa ang ebanghelyo, at ang mga layunin ng mga kaloob ng Espiritu.

Sa mga pulong at kumperensya na ginanap sa Morley Farm, tinawag ang mga elder na magmisyon at nagpropesiya tungkol sa pandaigdigang tadhana ng ipinanumbalik na ebanghelyo.

Mahirap na panahon din ito para kina Joseph at Emma. Noong ika-30 ng Abril 1831, nagsilang si Emma ng kambal na nabuhay lamang ng ilang oras. Ito ang pangalawa at pangatlong sanggol na anak nina Joseph at Emma na pumanaw sa loob lamang ng tatlong taon.

Sa araw ring iyon, si Julia Murdock, isang Banal sa mga Huling Araw na nakatira sa Morley Farm, ay pumanaw habang nagsisilang ng kambal. Medyo nabawasan ang kalungkutan nina Joseph at Emma sa pagpanaw ng kanilang kambal nang hilingin ng asawa ni Julia, si John, kina Joseph at Emma na ampunin ang kanyang kambal na anak na sina Joseph at Julia.

Matapos lamang ang anim na buwang paninirahan sa Morley Farm, lumipat muli sina Joseph at Emma. Noong Setyembre 1831, lumipat sila sa Hiram, Ohio, sa tahanan nina John at Elsa Johnson. Sa dalawang paghahayag na natanggap noong Agosto at Setyembre 1831, iniutos kay Isaac Morley na ibenta ang kanyang sakahan (tingnan sa Doktrina at mga Tipan 63:38–39; 64:20). Matapos ibenta ang malaking bahagi ng sakahan noong Oktubre 1831, inilipat nina Isaac at Lucy ang kanilang pamilya sa Missouri.⁵

Nang malaman na di-magtatagal ay walang matitirhan sina Joseph at Emma, inanyayahan sila ni John Johnson, isang mayamang convert, na lumipat sa kanyang tahanan sa Hiram, Ohio, 44 milya (71 km) timog ng Kirtland. Noong Setyembre 1831, bago ibenta ang Morley Farm, lumipat sina Joseph at Emma Smith kasama ang kanilang apat na buwang gulang na kambal sa tahanan nina John at Elsa Johnson.

Ang mga Johnson, na lumipat sa Ohio noong 1818, ay nagmamay-ari ng isang masagang sakahan at pagawaan ng mga produktong mula sa gatas at kabilang sa pinakamayayamang residente sa Portage County. Sa tahanan ng mga Johnson, malugod na tinanggap ni Joseph ang patuloy na pagdagsa ng mga bisita, na karamihan sa kanila ay kailangang pakainin at patuluyin para may matulugan sa gabi.

Ang mga Johnson ay hindi lamang naglaan ng isang silid-tulugan sa unang palapag kung saan maaaring manirahan sina Joseph, Emma, at ang kanilang mga anak, kundi binigyan din nila si Joseph ng isang malaking silid sa ikalawang palapag na nagsilbing opisina nito. Sa silid na ito sa itaas, nakipagpulong si Joseph sa mga miyembro at lider ng Simbahan, patuloy na gumawa kasama ang tagasulat sa inspiradong pagsasalin ng Biblia, at nagdikta ng malalalim na paghahayag, kabilang ang 16 na matatagpuan ngayon sa Doktrina at mga Tipan.⁶

Sa kumperensya ng mga elder na idinaos dito noong unang bahagi ng Nobyembre 1831, ipinasiya na ilathala ang mga natipong paghahayag ni Joseph Smith.⁷ Kalaunan, noong ika-16 ng Pebrero 1832, habang ginagawa nina Joseph at Sidney Rigdon ang pagsasalin ng Bagong Tipan, isang pangitain ang natanggap nila kung saan nakita nila si Jesucristo at tinuruan sila ng higit pa tungkol sa pagkabuhay na mag-uli ng mga patay.

Hindi nagtagal matapos ang pangitaing ito, pwersahang pumasok ang mga kaaway ng Simbahan sa bahay ng mga Johnson, hinila si Joseph mula sa kanyang kama, at kinaladkad siya sa kalapit na parang. Ang kanyang mga damit ay pinunit, at binuhusan siya ng mainit na alkitran at mga balahibo. Matapos ang masakit na pagtanggal ng alkitran mula sa kanyang katawan sa buong magdamag, nangaral si Joseph ng isang sermon sa araw ng Linggo sa mga nagtipong Banal, na dinaluhan din ng mga miyembro ng mga mandurumog.

Sa kasamaang-palad, ang sanggol na anak na lalaki ng mga Smith, si Joseph—isa sa kambal na inampon—ay namatay pagkaraan ng ilang sandali dahil sa pagkalantad sa lamig. Sa sumunod na ilang buwan, patuloy na nakaamba ang mga aktibidad at pagbabanta ng mga mandurumog kay Joseph Smith sa Hiram at sa mga kalapit na komunidad.

Nang tumitindi ang tensyon sa Hiram, binago ni Newel K. Whitney ang ilang silid sa loob ng kanyang tindahan sa Kirtland para mabigyan sina Joseph at Emma ng bagong tirahan. Noong Setyembre 1832, lumipat sina Joseph, Emma, at kanilang anak, si Julia, sa mga silid sa itaas na palapag ng tindahan.

Sa loob ng halos dalawang taon, nanirahan sina Joseph at Emma sa Whitney Store, na hindi lamang naging tahanan ng kanilang bata at lumalaking pamilya kundi naging sentro din ng aktibidad sa Simbahan. Habang naninirahan dito, patuloy na nakatanggap si Joseph Smith ng mga paghahayag, kabilang ang 16 na kasama ngayon sa Doktrina at mga Tipan.⁸ Noong ika-6 ng Nobyembre 1832, si Joseph Smith III ay isinilang sa N. K. Whitney & Co. Store.

Nagtayo si Joseph Smith ng opisina sa gusali, kung saan ipinagpatuloy niya ang inspiradong pagsasalin ng Biblia at nakipagpulong sa mga lider ng Simbahan. Sa loob ng 18 buwan na nanirahan sina Joseph at Emma sa Whitney Store, ito ay naging punong-tanggapan ng Simbahan at dito nangyari ang maraming mahahalagang kaganapan sa Kirtland.

Bukod sa maraming iba pang mga bagay, ang mga paghahayag na natanggap dito ay nagbigay ng mga bagong kaalaman tungkol sa priesthood, nag-utos sa mga Banal na magtayo ng isang bahay ng Diyos, at nagturo sa atin kung paano maging mas katulad ni Cristo.

Noong ika-8 ng Marso 1833, matapos ang ilang buwang talakayan at paghahayag, ang Unang Panguluhan ng Simbahan ay lubos na naorganisa sa Whitney Store, at ang mga tagapayo ni Joseph Smith, sina Sidney Rigdon at Frederick G. Williams, ay na-set apart.⁹

Sa isang silid sa likuran ng tindahan, sinimulan ni Joseph Smith ang pagdaraos ng mga klase para sa Paaralan ng mga Propeta, isang training program para sa mga lider ng Simbahan at mga misyonero upang ihanda sila sa paglilingkod. Sa tagpong ito unang inihayag ang Word of Wisdom, ang batas ng Panginoon para sa kalusugan.

Noong huling bahagi ng 1833, isang bahay ang natapos para kina Joseph at Emma at kanilang mga anak. Ang maliit na bahay na ito ay matatagpuan sa timog ng tindahan ng pamilya Whitney, sa itaas ng burol malapit sa itinatayong bahay ng Panginoon.¹⁰ Ito ang kauna-unahang bahay na pagmamay-ari nina Joseph at Emma mula nang lisanin nila ang kanilang tahanan sa Harmony, Pennsylvania. Mula sa bintana ng kanilang kusina, nakikita ni Emma Smith ang pagtatayo sa ipinangakong templo.

Sa tahanang ito, si Emma ay nagpatakbo ng isang pagawaan ng gatas, umupa ng mga babaeng manggagawa, at nag-asikaso ng pamilya. Dito, sa tulong ni William W. Phelps, natipon ni Emma ang unang himnaryo ng Simbahan. Isa pang anak, si Frederick Granger Williams Smith, ang isinilang noong Hunyo 1836, at sa loob ng mahigit tatlong taon ang pamilya Smith ay nanatili sa tahanang iyon. Habang naninirahan dito, natanggap ni Joseph Smith ang lahat o bahagi ng 5 paghahayag.¹¹

Sa panahong nakatira sina Joseph at Emma sa tahanang ito, patuloy na lumago ang Simbahan. Bilang tugon sa lumalaking pangangailangan sa pamumuno, inihayag ng Panginoon ang mga bagong katungkulan sa priesthood, mga pagbabago sa mga istruktura sa pamamahala, at iba pang walang-hanggang katotohanan sa mga miyembro ng Simbahan. Noong ika-17 ng Pebrero 1834, si Joseph Smith ay nag-organisa ng unang stake sa Simbahan kasama ang pagtawag ng isang high council.

Sa iba pang mga pulong na idinaos sa panahong ito—at posibleng sa tahanan—ang mga paghahayag ni Joseph Smith ay nagpalawak ng pang-unawa tungkol sa priesthood, nag-organisa ng Kampo ng Sion, pormal na inorganisa ang Korum ng Labindalawang Apostol, at inihanda ang mga Banal para sa pangakong pagkakaloob ng kapangyarihan sa templo. Mula sa kanyang kinaroroonan malapit sa lugar ng templo, nagawang pamahalaan ni Joseph ang pagtatayo ng karagdagang mga pasilidad ng Simbahan, kabilang na ang isang palimbagan, isang paaralan, at ang Kirtland Safety Society.

Ang Pamilya Smith ay nanirahan sa tahanang ito hanggang sa unang bahagi ng 1838, nang ang hindi pagkakaunawaan sa Simbahan at ang pagtindi ng aktibidad ng mga mandurumog ay nagtulak sa kanila na umalis. Noong ika-12 ng Enero 1838, nilisan nina Joseph Smith at Sidney Rigdon ang Kirtland patungo sa mga pamayanan ng mga Banal sa mga Huling Araw sa Northwest Missouri. Si Emma, na nagdadalang-tao, ay sumunod kaagad kalaunan.¹²