Joseph and Emma Smith Home

Ang Joseph and Emma Smith Home sa Harmony, Pennsylvania, ay isang lugar ng paghahayag. Dito ipinagpatuloy ni Joseph ang pagsasalin ng Aklat ni Mormon sa pamamagitan ng kapangyarihan ng Diyos, sa tulong ng mga tagasulat na tulad ni Emma, kapatid ni Emma na si Reuben, Martin Harris, at Oliver Cowdery.

Matapos lumipat sa tahanang ito noong Disyembre 1827, dalawang buwan lamang matapos matanggap ang mga laminang ginto, sandaling nanirahan sina Joseph at Emma sa mga magulang ni Emma bago lumipat sa 5.46 na ektaryang bukid na ito noong Enero o unang bahagi ng Pebrero ng 1828. Kalaunan ay binili nina Joseph at Emma ang bahay mula sa ama at kapatid ni Emma. Ang makitid na piraso ng lupain ay umaabot mula sa Susquehanna River hanggang sa paanan ng Oquago Mountain. Kasama rito ang kamalig at bahay na itinayo ng kapatid ni Emma na si Jesse. Ang Joseph and Emma Smith Home ay isang gusaling muling itinayo sa orihinal na lokasyon.

Pagdating sa Harmony, marami ang nagawa ni Joseph sa pagsasalin ng mga laminang ginto sa loob ng mga apat na buwan. Si Emma ay naglingkod bilang kanyang unang tagasulat bago tumanggap ng tulong mula sa kapatid ni Emma na si Reuben Hale at kalaunan, mula kay Martin Harris.

Noong unang bahagi ng Hunyo 1828, nagmakaawa si Martin Harris kay Joseph Smith na dalhin ang manuskrito sa Palmyra upang maipakita ang mga ito sa kanyang asawang si Lucy Harris at sa iba pang mga kapamilya na hindi nasiyahan sa suporta na ibinibigay ni Martin kay Joseph. Matapos ang tatlong pagtatangka na makuha ang pahintulot ng Panginoon na kunin ang manuskrito, sa wakas ay pumayag ang Panginoon at nagtungo si Martin sa Harmony na dala ang manuskrito noong Hunyo 14, 1828. Kinabukasan, isinilang ni Emma ang kanyang panganay, isang lalaki na nabuhay lamang ng ilang oras. Matapos ilibing ang sanggol sa kalapit na McKune Cemetery, inalagaan ni Joseph ang kanyang asawa na may sakit mula sa mahirap na panganganak at lubos na nagdadalamhati sa pagkawala ng kanyang anak. Pagkalipas ng halos dalawang linggo, nang unti-unti niyang nababawi ang kanyang lakas, napansin ni Emma ang pag-aalala ni Joseph sa manuskrito. Wala silang balita kay Martin, at napansin ni Emma na tumitindi ang pagkabalisa ng kanyang asawa.

“Nababahala ako,” sabi niya kay Joseph isang araw, “at hindi ako mapapanatag hangga’t hindi ko alam kung ano ang ginagawa ni G. Harris.” Matapos ang ilang karagdagang paghihikayat, sumakay si Joseph sa karwahe mula Harmony papuntang Manchester, kung saan nalaman niya na nawala ni Martin ang manuskrito. “Nawala na ang lahat,” ang pagtangis ni Joseph. “Ipinahamak ko ang aking kaluluwa.” Umalis si Joseph sa araw ding iyon para bumalik sa Harmony para ibahagi ang nakapanlulumong balita kay Emma. Hindi nagtagal matapos siyang makabalik sa Harmony, muling nagpakita si Moroni at kinuha ang mga lamina at ang mga pansalin at sinabi kay Joseph na kung siya ay “lubos na magpapakumbaba” ay ibabalik ang mga ito sa Setyembre. Matapos ang isang panahon ng pagsisisi, nakatanggap si Joseph Smith ng isang paghahayag—na ngayon ay Doktrina at mga Tipan 3—kung saan ipinahayag ng Panginoon na ang Kanyang mga layunin ay “hindi mabibigo” at sinabi kay Joseph na hindi niya dapat “kinatakutan ang tao nang higit sa Diyos” (Doktrina at mga Tipan 3:1, 7). Ipinahayag din ng Panginoon na si Joseph ay “muling tinatawag sa gawain.” Ibinalik ang mga lamina, at muling naglingkod si Emma bilang tagasulat sa pakonti-konting pagsisikap si Joseph na magsalin.

Noong Abril 5, 1829, dumating sa Harmony si Oliver Cowdery, isang guro na nanirahan kina Joseph Sr. at Lucy Smith sa Manchester. Matapos malaman ang mga paghahayag ni Joseph Jr., nag-aral at nanalangin si Oliver para malaman kung ang mga ito ay mula sa Diyos. Matapos makumbinsi na ang mga ito ay mula sa Diyos, nakumbinsi rin siya na may papel siyang gagampanan sa pagtulong kay Joseph. Dalawang araw matapos unang makilala si Joseph Smith, nagsimulang maglingkod si Oliver bilang kanyang tagasulat. Magkasamang isinalin nina Joseph at Oliver ang Aklat ni Mormon sa loob lamang ng mahigit tatlong buwan, at sa panahon ding iyon ay natanggap nila ang Aaronic at Melchizedek Priesthood, inayos ang paglalathala ng Aklat ni Mormon, at naghanda na i-organisa ang Simbahan ni Jesucristo.

Basahin ang iba pa tungkol sa mga naganap sa Joseph and Emma Smith Home sa Mga Banal Tomo 1, Kabanata 5.

Ano ang Aasahan

Ang Joseph and Emma Smith Home ay bahagi ng guided tour sa Priesthood Restoration Site. Ang tour ay tatagal nang mga 30 minuto at dadalhin kayo nito sa dalawang pangunahing silid ng bahay. Ang mga tour ay magsisimula sa Visitors’ Center.

360° Walkthrough