សាសនាចក្ររបស់ព្រះយេស៊ូវគ្រីស្ទត្រូវបានស្ដារឡើងវិញ

ទោះបីជាមានការខិតខំប្រឹងប្រែង ក្នុងអំឡុងពេលកំណែទម្រង់របស់លទ្ធិប្រូតេស្ដង់ក្តី ក៏ការស្តារឡើងវិញដ៏ពេញលេញដែលត្រូវបានដឹកនាំដោយព្យាការីម្នាក់ដែលព្រះបានជ្រើសរើសគឺជាតម្រូវការចាំបាច់ ។

ពេលវេលាសម្រាប់ការស្តារឡើងវិញបានមកដល់នៅឆ្នាំ១៨២០ នៅពេលដែលក្មេងប្រុសអាយុ១៤ឆ្នាំ ម្នាក់ឈ្មោះ យ៉ូសែប ស្ម៊ីធ បានចាប់ផ្តើមមានអារម្មណ៍បែបនេះនៅក្នុងពាក្យសំដីរបស់គាត់ថា « មានចិត្តខ្វល់ខ្វាយជាខ្លាំង » អំពីសុខុមាលភាពនៃព្រលឹងរបស់គាត់ ហើយថាព្រះវិហារមួយណាដែលគាត់គួរចូលរួម ( យ៉ូសែប ស្ម៊ីធ—ប្រវត្តិ ១:៨ ) ។

ថ្ងៃមួយនៅពេលលោកសិក្សាព្រះគម្ពីរប៊ីប យ៉ូសែបបានអានថា « តែបើអ្នករាល់គ្នាណាមួយខ្វះប្រាជ្ញាមានតែសូមដល់ព្រះ ដែលទ្រង់ប្រទានដល់មនុស្សទាំងអស់ដោយសទ្ធាឥតបន្ទោសផង នោះទ្រង់នឹងប្រទានឲ្យ » ( យ៉ាកុប ១:៥ ) ។

ខគម្ពីរនេះមានឥទ្ធិពលយ៉ាងខ្លាំងទៅលើយ៉ូសែប ដោយជំរុញលោកឲ្យរកឃើញព្រៃស្ងាត់មួយ ដែលលោកបានអធិស្ឋានអស់ពីដួងចិត្តទូលសូមការដឹកនាំរបស់ព្រះ ។ លោកបានសរសេរដំណើររឿងនេះអំពីអ្វីដែលបានកើតឡើងបន្ទាប់ ៖

ព្រះជាព្រះវរបិតា និងព្រះរាជបុត្រាព្រះយេស៊ូវគ្រីស្ទបានយាងមកជួបយ៉ូសែប ហើយបានមានបន្ទូលប្រាប់លោកថា អំពើបាបរបស់លោកត្រូវបានអត់ទោសឲ្យ ហើយថាលោកមិនគួរចូលរួមក្នុងព្រះវិហារណាមួយនោះទេ ។ ផ្ទុយទៅវិញ យ៉ូសែបត្រូវបានជ្រើសរើសឲ្យធ្វើជាព្យាការីរបស់ព្រះ ដែលនឹងត្រូវស្ដារសាសនាចក្រពិតរបស់ព្រះយេស៊ូវគ្រីស្ទនៅលើផែនដីឡើងវិញ ។

តាមរយៈ យ៉ូសែប ស៊្មីធ ព្រះយេស៊ូវគ្រីស្ទបានស្ដារសាសនាចក្រដូចសាសនាចក្រដែលទ្រង់បានបង្កើតកាលពីសម័យបុរាណ ដែលមានន័យថា ៖

សាសនាចក្រនេះត្រូវបានស្ថាបនាឡើងវិញជាមួយនឹង ព្យាការី និងពួកសាវកដប់ពីរនាក់ ។

• ពួកសិស្សរបស់ព្រះគ្រីស្ទអាចទទួលពិធីបុណ្យជ្រមុជទឹកនៅក្នុងសាសនាចក្ររបស់ទ្រង់ ដោយសិទ្ធិអំណាចបព្វជិតភាពត្រឹមត្រូវពីព្រះ ហើយអាចទទួលអំណោយទាននៃព្រះវិញ្ញាណបរិសុទ្ធ ។
• ពិធីសាសនាសំខាន់ៗដែលគេស្គាល់នោះគឺ ពិធីបរិសុទ្ធនៃបព្វជិតភាព ត្រូវបានស្ដារឡើងវិញនៅលើផែនដី រួមទាំងអំណាចក្នុងការបង្រួបបង្រួមក្រុមគ្រួសារជាមួយគ្នាសម្រាប់ពេលនេះ និងសម្រាប់ភាពអស់កល្បជានិច្ច ។

ប្រហែលអ្វីដែលគួរឲ្យកត់សម្គាល់បំផុតនោះគឺសារទូតម្នាក់មកពីស្ថានសួគ៌បានបើកសម្តែងដល់យ៉ូសែបអំពីវត្តមាននៃ ព្រះគម្ពីរមរមន ដែលជាសក្ខីបទមួយទៀតអំពីព្រះយេស៊ូវគ្រីស្ទ ។ ព្រះគម្ពីរនេះត្រូវបានសរសេរដោយពួកព្យាការីនៅទ្វីបអាមេរិកកាលពីបុរាណ ហើយយ៉ូសែបបានបកប្រែព្រះគម្ពីរនេះតាមរយៈការបំផុសគំនិតដ៏ទេវភាព ។

តាមរយៈព្រះគម្ពីរមរមន និង វិវរណៈសម័យទំនើបពីព្រះ នោះសេចក្តីពិតសំខាន់ៗអំពីផែនការរបស់ព្រះសម្រាប់យើង និងគោលបំណងរបស់យើងនៅលើផែនដីត្រូវបានបើកសម្តែង ។ វិវរណៈទាំងនេះរួមមាន ៖

• ការយល់ដឹងកាន់តែស៊ីជម្រៅអំពីតួនាទីរបស់ព្រះយេស៊ូវគ្រីស្ទ ។
• ចំណេះដឹងថាយើងបានរស់នៅជាមួយនឹងព្រះ ពីមុនយើងចុះមកកាន់ផែនដី ។
• ចំណេះដឹងយើងមកទីនេះដើម្បីប្រែក្លាយដូចជាព្រះវរបិតាសួគ៌ ហើយត្រឡប់ទៅរស់នៅជាមួយទ្រង់វិញម្តងទៀត ។
• ការធានាថាយើងអាច រស់នៅជាមួយក្រុមគ្រួសារជារៀងរហូត ។

សព្វថ្ងៃនេះ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយត្រូវបានបន្តដឹកនាំដោយព្យាការី និងពួកសាវកដែលនៅរស់ ។ ការបង្រៀនរបស់ពួកលោកសម្រាប់ « ថ្ងៃចុងក្រោយ » ទាំងនេះរួមមានការបង្កើនការផ្តោតអារម្មណ៍របស់យើងទៅលើព្រះអង្គសង្គ្រោះ ការមើលថែដល់ជនក្រីក្រ ការបញ្ចប់ជម្លោះផ្ទាល់ខ្លួននៅក្នុងជីវិតរបស់យើង និងការពង្រឹងក្រុមគ្រួសារ ។ សូមអរគុណចំពោះការព្យាករណ៍ប្រកបដោយការដឹកនាំ និងដោយប្រាជ្ញារបស់ពួកលោក ដែលមនុស្សរាប់លាននាក់នៅជុំវិញពិភពលោកអាចទទួលបានពរជ័យនៃសាសនាចក្រដែលបានស្តារឡើងវិញរបស់ព្រះយេស៊ូវគ្រីស្ទ ។