ព្រះមានព្រះបន្ទូលមកកាន់បុត្រាបុត្រីរបស់ទ្រង់តាមរយៈព្យាការី

ព្រះស្រឡាញ់យើងម្នាក់ៗ ហើយចង់ឲ្យយើងទទួលអារម្មណ៍ពីសេចក្តីស្រឡាញ់នោះ ដើម្បីយើងអាចរីកចម្រើន និងលូតលាស់បាន ។ ទ្រង់ប្រទានមធ្យោបាយដល់យើងដើម្បីស្វែងរកអត្ថន័យនៅក្នុងជីវិត និងទទួលបានអារម្មណ៍នៃភាពសុខសាន្ត និងភាពច្បាស់លាស់ក្នុងពិភពលោកដ៏ចលាចលនេះ ។ ជំនួយដែលព្រះបានប្រទានមកយើងរួមមានពាក្យសម្តីរបស់ពួកព្យាការី ។

នៅពេលអ្នកភ្ជាប់ជាមួយព្រះតាមរយៈការអធិស្ឋាន នោះអ្នកអាចទទួលបានការណែនាំសម្រាប់ជីវិតរបស់អ្នកផ្ទាល់ ។ ប៉ុន្តែ ព្រះក៏មានបន្ទូលទៅកាន់បុត្រាបុតី្ររបស់ទ្រង់ជាសមូហភាពតាមរយៈព្យាការីផងដែរ ។ ពួកព្យាការីទាំងនេះត្រូវបានចាត់មក ដើម្បីបង្រៀនយើងអំពីដំណឹងល្អនៃព្រះយេស៊ូវគ្រីស្ទ និងចែកចាយការណែនាំជាក់លាក់ពីព្រះសម្រាប់ជំនាន់របស់យើង ។

ប្រវត្តិសាស្ត្រពីបុរាណ និងការបង្រៀនដ៏ពិសិដ្ឋដែលបានកត់ត្រានៅក្នុងព្រះគម្ពីរប៊ីប និងព្រះគម្ពីរមរមន បង្ហាញនៅទូទាំងប្រវត្តិសាស្ត្រថា ព្រះបានជ្រើសរើសព្យាការីឲ្យធ្វើសកម្មភាពក្នុងព្រះនាមទ្រង់ សម្រាប់សេចក្តីសង្គ្រោះនៃបុត្រាបុត្រីរបស់ទ្រង់ ។

ពេលខ្លះ មនុស្សបានជឿលើពាក្យសម្តីរបស់ពួកព្យាការី ហើយរស់នៅដោយសុចរិត ។ ពេលខ្លះ ពួកគេបានបដិសេធសារលិខិតរបស់ព្រះដែលបាននាំមកដោយពួកព្យាការី ហើយបានងាកចេញពីព្រះ—ស្ថានភាពនេះត្រូវបានស្គាល់ថាជា « ការក្បត់សាសនា » ។ គ្រានៃការក្បត់សាសនាទាំងនោះ នៅទីបំផុតបាននាំទៅរកផ្លូវនៃសេចក្ដីសុចរិតជាថ្មី នៅពេលដែលមនុស្សបានប្រែចិត្ត ហើយបានស្ដាប់តាមពួកព្យាការីដែលព្រះបានជ្រើសរើសម្ដងទៀត ។

នៅក្នុងព្រះគម្ពីរប៊ីប អេម៉ុស ៣:៧ បង្រៀនយើងថា ព្រះនឹងមិនធ្វើដូច្នោះឡើយ លុះត្រាតែទ្រង់បើកសម្តែងការណ៍នេះដល់ « ពួកហោរា ជាអ្នកបម្រើទ្រង់ » ជាមុនសិន ។ ព្រះអម្ចាស់បានចាត់ពួកព្យាការីនៅទូទាំងព្រះគម្ពីរសញ្ញាចាស់ ដើម្បីព្រមានមនុស្សឲ្យរៀបចំខ្លួនសម្រាប់គ្រោះទុរភិក្ស សង្គ្រាម ឬគ្រោះមហន្តរាយផ្សេងៗ ។ ពួកលោកបានចែកចាយព្រះឆន្ទៈរបស់ព្រះជាមួយប្រជាជន ហើយបានថ្លែងទីបន្ទាល់អំពីលទ្ធផលនៃអំពើបាប ។ អ្វីដែលសំខាន់បំផុតនោះគឺ ព្យាការីបាននាំមកនូវក្តីសង្ឃឹម កាលពួកលោកព្យាករអំពីការប្រសូតរបស់ព្រះយេស៊ូវគ្រីស្ទ និងការផ្លាស់ប្តូរជីវិតនៅក្នុងដំណឹងល្អរបស់ទ្រង់ ។

ព្យាការីនៅក្នុងព្រះគម្ពីរប៊ីប និងព្រះគម្ពីរមរមនបានបង្រៀនមេរៀន និងសេចក្តីពិតដែលនៅតែមានឥទ្ធិពលរហូតដល់សព្វថ្ងៃនេះ អំពីការស្ថាបនាសេចក្តីជំនឿលើព្រះយេស៊ូវគ្រីស្ទ ហើយប្រែក្លាយកាន់តែដូចទ្រង់ ។ អ្នកអាចស្វែងរកភាពរឹងមាំ សេចក្តីសង្ឃឹម និងការបំផុសគំនិតក្នុងការអានពាក្យសម្តីរបស់ពួកលោក ។

ពេលព្រះយេស៊ូវគង់នៅលើផែនដី ទ្រង់បានហៅពួកសាវកដប់ពីរនាក់ឲ្យជួយដឹកនាំសាសនាចក្ររបស់ទ្រង់ ។ បន្ទាប់ពីព្រះយេស៊ូវបានសុគត ពួកសាវកបានប្រឈមមុខនឹងការបៀតបៀន ហើយករណីខ្លះត្រូវបានគេសម្លាប់ទៀតផង ។ យូរៗទៅសេចក្ដីពិតនៃដំណឹងល្អសំខាន់ៗ និងសិទ្ធិអំណាចបព្វជិតភាពពីព្រះត្រូវបានបាត់បង់ នៅពេលមនុស្សជុំវិញពិភពលោកធ្លាក់ចូលទៅក្នុងការក្បត់សាសនានោះ ។

នៅឆ្នាំ ១៨២០ ក្មេងប្រុសអាយុ ១៤ ឆ្នាំម្នាក់ឈ្មោះ យ៉ូសែប ស្ម៊ីធ បានអធិស្ឋានដោយស្មោះអស់ពីចិត្ត ដើម្បីស្វែងរកការណែនាំអំពីសុខុមាលភាពនៃព្រលឹងរបស់លោក និងដើម្បីដឹងថា តើលោកគួរចូលរួមព្រះវិហារមួយណា ។ ព្រះជាព្រះវរបិតា និងព្រះយេស៊ូវគ្រីស្ទបានយាងមកជួបយ៉ូសែប ហើយបានមានបន្ទូលប្រាប់លោកថា អំពើបាបរបស់លោកត្រូវបានអត់ទោសឲ្យ ហើយថាលោកមិនគួរចូលរួមក្នុងព្រះវិហារណាមួយដែលមានស្រាប់នោះទេ ។ ក្រោយមក លោកបានក្លាយជាព្យាការីដ៏ជម្រើស ដើម្បីស្ដារសាសនាចក្ររបស់ព្រះយេស៊ូវគ្រីស្ទនៅលើផែនដីឡើងវិញ ។

ចាប់តាំងពីពេលនោះមក សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយត្រូវបានដឹកនាំដោយព្យាការីនៅរស់ម្នាក់ ដែលគាំទ្រដោយពួកសាវកដប់ពីរនាក់ និងថ្នាក់ដឹកនាំផ្សេងទៀតដែលយកលំនាំតាមសាសនាចក្រពីបុរាណរបស់ព្រះគ្រីស្ទ ។

ព្យាការី និងពួកសាវកនាពេលបច្ចុប្បន្ននេះ ដើរតាមគន្លងរបស់ព្យាការីដែលមាននៅក្នុងព្រះគម្ពីរ ។ ពួកលោកបង្រៀនសេចក្តីពិតដ៏អស់កល្បជានិច្ច ថ្លែងទីបន្ទាល់អំពីព្រះយេស៊ូវគ្រីស្ទ ព្រមានយើងពីគ្រោះថ្នាក់ ផ្តល់ហេតុផលឲ្យយើងមានសេចក្ដីសង្ឃឹម និងផ្តល់ការណែនាំពីព្រះជាពិសេសសម្រាប់ជំនាន់របស់យើង ។

ការធ្វើតាមពាក្យសម្តីរបស់ព្យាការីដែលនៅរស់ អាចនាំឲ្យអ្នកខិតកាន់តែជិតព្រះយេស៊ូវគ្រីស្ទ ហើយជួយអ្នកឲ្យរកឃើញសេចក្តីសង្ឃឹម និងសេចក្តីអំណរ ។ ប៉ុន្មានឆ្នាំមកនេះ ប្រធាន រ័សុល អិម ណិលសុន ដែលជាព្យាការី និងជាប្រធាននៃសាសនាចក្របានផ្ដល់សេចក្តីណែនាំមួយចំនួន រួមមាន ៖

• របៀបស្វែងរកសេចក្ដីសុខសាន្ដនៅក្នុងព្រះគ្រីស្ទ សូម្បីតែពេលដែលពិភពលោកជុំវិញយើងស្ថិតក្នុងភាពចលាចលក៏ដោយ ។
• សារៈសំខាន់នៃការបញ្ចប់ជម្លោះនៅក្នុងជីវិតរបស់យើងផ្ទាល់ ។
• របៀបកសាងគ្រឹះខាងវិញ្ញាណដ៏រឹងមាំ ដែលនឹងជួយយើងឲ្យយកឈ្នះលើការសាកល្បង និងការល្បួង ។
• របៀបដែលយើងអាច « ឱបក្រសោបយកអនាគតដោយសេចក្ដីជំនឿ » ។