‘Oku ʻOmi ʻe he Toetu‘u ʻa Sīsū Kalaisí ha ʻAmanaki Lelei

[Vitiō]: “ʻI he Toetuʻú, ʻoku tau kau fakataha mo e kau Kalisitiané kotoa ʻi hono fakamanatua ʻo e Toetuʻu moʻoni ʻa Sīsū Kalaisí. ʻI he hā ki Heʻene kau ʻAposetoló hili ʻEne pekiá, naʻá Ne fakapapauʻi ange kiate kinautolu naʻe ʻikai ko ha laumālie Ia. Naʻe hiki ia ʻe Luke ko ha toketā ʻi he kuonga ko iá, naʻe folofola ʻa Sīsū, ‘Ala mai kiate au, pea mou vakai; he ʻoku ʻikai kakano mo hui ha laumālie, ʻo hangē ko ia ʻoku mou ʻiló ni ʻiate aú’ [Luke 24:39].

“Ka ʻe toetuʻu nai ʻa e tokotaha fakamatelie kotoa pē mo ha sino? ʻOku ʻomi ʻe he ngaahi folofola kuo fakafoki maí ha mahino ʻokú ne fakatahaʻi kitautolu ʻi he tui mālohi mo e fakahā ʻe toetuʻu ʻa e taha kotoa ʻi ha sino haohaoa. ʻOku akoʻi ʻe he Tohi ʻa Molomoná ʻe toe fakatahaʻi ʻa e laumālié mo e sinó. ʻOku fakamatalaʻi ʻe he fakahā ʻi onopōní ʻa e kau ʻāngeló, ko ha kau tangata toetuʻu ʻoku nau maʻu ʻa e sino ʻo e kakano mo e hui. Ko e meʻa pau tahá, ko e ngaahi meʻá ni mei he Tohi ʻa Molomoná.

“Naʻe akonaki ʻe he palōfita ko ʻAlamaá, ‘ʻE fakafoki ʻa e laumālié ki he sinó, pea mo e sinó ki he laumālié; ʻio, pea ʻe fakafoki ʻa e kupu kotoa mo e hokotanga hui kotoa pē ki hono sinó; … naʻa mo ha tuʻoni louʻulu mei he ʻulú he ʻikai mole ia; [pea] ʻe fakafoki ʻa e ngaahi meʻa kotoa pē ki honau anga-totonu mo haohaoá’ [ʻAlamā 40:23].

“ʻOku ʻi ai ha ʻuhinga makehe ke tau fakatuʻamelie kotoa atu ki he toetuʻu ʻo ha sino haohaoá.”

“Ko ha fakamoʻoni ʻo e Toetuʻu ʻa Sīsū Kalaisí ko ha maʻuʻanga ʻamanaki lelei mo e loto-vilitaki fakatouʻosi ia. ʻOkú Ne moʻui, pea tuʻunga ʻi Heʻene feilaulaú, te tau toetuʻu mo māʻoniʻoni ai. Ko Sīsū ʻa e Kalaisi kuo toe tuʻú, ko hotau Fakamoʻui, pea mo hotau faʻifaʻitakiʻanga haohaoa mo e fakahinohino ki he moʻui taʻengatá. ʻOku ou lotu ke tau manatuʻi ʻEne feilaulaú mo ʻEne ʻofa ʻiate kitautolú ʻaki e kotoa hotau lotó ʻi he kotoa ʻo ʻetau moʻuí.”

“ʻOku ou fakamoʻoni ki he moʻoni kakato mo tuʻuloa ʻo e feilaulau fakalelei taʻe-hano-tatau ʻa e Fakamoʻuí pea mo ʻEne Toetuʻu nāunauʻiá. ʻI hono tukutaha ʻetau moʻuí ki he fakakaukau ko ʻení, ʻoku ou palōmesi atu te tau ongoʻi ʻEne ʻamanaki leleí, ko ʻEne melinó, mo ʻEne ʻofá.

“ʻI he taimi ʻoku mālōlō fakafokifā ai ha taha ʻoku tau ʻofa ai, ʻe lava ke lōmekina kitautolu ʻe he loto-mamahí mo e mamahí.

“ʻI he konga kimui ʻo e taʻu kuo ʻosí, naʻe mālōlō fakafokifā ʻa e tokotaha ako foʻou lelei ʻi he ʻUnivēsiti Pilikihami ʻIongí ko ʻAna Pitasoni, hili ha fakatamaki fakamamahi ʻi ha fakapaheke ʻi he sinoú. Ko ʻAná ko ha ākonga loto-fakatōkilalo, ʻofa, mo angaʻofa ia ʻa Sīsū Kalaisi. Naʻá ne fekumi ki ha ngaahi founga ke tokoniʻi ai e niʻihi kehé ke nau ongoʻi e ʻofa ʻa e ʻOtuá. Ko hono moʻoní, naʻe toki ʻosi pē ʻene tohi kole ke hoko ko ha faifekau taimi kakató.

Neongo naʻe hoko ʻa e mālōlō ʻa ʻAná ko ha mole ʻo ha kaungāmeʻa ki ha tokolahi, ka ko ha mole ia ʻo ha maama fakaʻofoʻofa ki heʻene ongomātuʻá, Sione mo Suli, ʻa ia naʻá na tokangaʻi, lotua, mo ʻofaʻi ʻi he taʻu ʻe 18. ʻOku feʻunga ʻa e mālōlō ʻo ha ʻofefine, ke ne lōmekina ha tokotaha ʻi he mamahí. Ka neongo ʻa e mamahi lahi naʻa nau ongoʻí, naʻe fili ʻa Sione mo Suli ke falala ki he ʻEiki ko Sīsū Kalaisí.

“Naʻá ku kole kia Sione—ʻa ia naʻá ma ngāue fakafaifekau ʻi he taimi naʻá ku tokangaʻi ai ʻa e Misiona France Bordeaux—mo Suli ke na vahevahe mai ʻena fakakaukaú ʻi heʻena hokohoko atu ʻena ngāue ʻaki ʻa e tui kia Sīsū Kalaisí ʻi he fehangahangai mo e meʻa fakamamahí ni. Ko e meʻa ʻeni naʻá na vahevahe mo aú:

“Sione: ʻNaʻe lavea lahi hoku lotó ʻi he mālōlō fakafokifā mo fakamamahi ʻa ʻAná. Ka ʻoku ʻi ai ha lolo faitoʻo ʻi Kiliati, pea ʻi heʻetau falala ki he houngaʻia ʻi he Fakalelei ʻa e Fakamoʻuí pea mo e ngaahi taimi fakaʻofoʻofa mo fakaofo naʻá ma maʻu ʻi he taʻu ʻe 18 ʻo ʻAná, ʻoku fonu mahuohua ʻa ʻema moʻuí ʻi he ngaahi ʻaloʻofa ongongofuá. ʻOkú ma maʻu ha mālohi ke laka atu.ʼ

“Suli: ʻHili ha taimi nounou mei he fakatamaki ʻa ʻAná, naʻe ueʻi au ke u faʻu ha kaveinga ki heʻemau ngaahi feingá, ko e ʻTafoki ki he Maama, ʻa Hotau Fakamoʻuí.ʼ ʻI heʻetau fevahevaheʻaki ʻa e ngaahi faingamālie ko ʻeni ke fili ʻa e māmá ke tau matuʻuaki ʻaki kae ʻikai ko e fakapoʻulí, ʻoku tau fefakamālohiaʻaki ai, pea ʻoku fuesia kitautolu ʻe he ʻEikí ʻi heʻetau mamahí. ʻOku Ou/Tau fili ke falala ki he ʻEikí.ʼ

“ʻOku ou tanganeʻia moʻoni ʻi he tui ʻa Sione mo Suli kia Sīsū Kalaisí. Ko ha sīpinga fakaʻofoʻofa kinaua kiate au. Lolotonga ʻa e faʻahitaʻu Toetuʻu ko ʻení, ʻoku ou fakamoʻoni naʻe maumauʻi ʻe Sīsū Kalaisi ʻa e ngaahi haʻi ʻo e maté, fakaʻatā ʻa e taha kotoa ke moʻui hili ʻa faʻitoka, pea ko e mahuʻinga tahá, ʻokú Ne talaʻofa mai kiate kitautolu takitaha, ʻi heʻetau tui mo muimui kiate Iá, te tau lava ʻo nofo mo Ia ʻo taʻengata—ʻio, ʻo taʻengata!”

“ʻI he fakaofi mai ʻa e Toetuʻú, kuó u fakakaukau ki ha meʻa naʻá ku aʻusia mo hoku uaifí ʻi heʻema folau kimuí ni mai ki ʻAmelika Lotolotó. ʻI homa ʻaho fakaʻosi ʻi Kuatemala Sití, naʻá ma kau atu ki ha fakataha lotu naʻe vahevahe ai ʻe ha kuaea Palaimeli fakasiteiki ʻe fā ʻa e ngaahi hiva mo ha ngaahi fakamoʻoni kia Sīsū Kalaisi.

Ko ha ʻaho fakaʻofoʻofa mo fakamāfana ia. He ʻikai toe ngalo ʻiate au ʻa e fakamoʻoni fakamātoato mo faingofua ʻa Misa ʻAngela Suniaká. ʻI heʻene fai ha fakamoʻoni faingofua kia Sīsū Kalaisí, naʻá ku ongoʻi ha fakamoʻoni mālohi ʻi hoku lotó ʻoku ʻiloʻi moʻoni ʻe ʻAngela ko Sīsū Kalaisi ʻa Hono Fakamoʻuí. Ko ha momeniti he ʻikai vave mangalo.

Hili ʻa e fakataha lotú, naʻá ma lulululu mo e fānaú takitaha. Naʻe fehuʻi mai ʻe ha kiʻi tamasiʻi ʻe taha, ‘ʻOku fēfē ʻa Sīsū?’ Naʻá ku tali ange, ʻʻOku ʻofa ʻa Sīsū ʻiate koe, pea ʻokú Ne falala atu kiate koe, pea te ke lava ʻo maʻu ha loto-falala kiate Ia.ʻ Naʻe tali ʻe he kiʻi tamasiʻi ko ʻení ʻaki ha malimali lahi ʻi heʻene ʻiloʻi naʻá ne fakafonu hoku lotó ʻaki ha fiefia.

ʻI heʻetau fakakaukau ki he meʻa naʻe fai ʻe hotau Fakamoʻuí maʻatautolu lolotonga ʻa e uike kimuʻa ʻi he Toetuʻú, ʻoku ou fakaafeʻi kimoutolu takitaha ke fakafonu homou laumālié ʻaki ʻa e ʻilo ʻoku ʻofa ʻa Sīsū ʻiate kimoutolu, ʻokú Ne falala atu kiate kimoutolu, pea te mou lava ʻo falala kiate Ia.”

“ʻOku ou fakatauange pē naʻa mou maʻu ha uike Toetuʻu lelei ʻi he fakaʻosinga ʻo e uiké, mo manatuʻi maʻu pē ko e ʻuhinga ʻoku tau fakamanatua ai ʻa e Toetuʻú koeʻuhí ko e feilaulau fakalelei mo e Toetuʻu ʻa hotau Fakamoʻuí. Ka ne taʻeʻoua Ia, he ʻikai ha ʻuhinga ke fakafiefiaʻi ʻa e Toetuʻú koeʻuhí he ʻikai ha ʻamanaki lelei maʻatautolu ʻi he māmani ko ʻení pe ʻi he maama ka hoko maí. ʻOku totonu ke tau manatu maʻu ai pē kiate Ia; koeʻuhí ko Ia, ʻoku ʻi ai maʻu pē ʻa e ʻamanaki lelei.

“Kuó u manako maʻu pē ki he kupuʻi lea ko ʻeni meia ʻEletā Sefilī R. Hōlaní: “Ko e taha ʻo e ongoongo fakafiemālie taha ʻo e faʻahitaʻu Toetuʻu ko ʻení, koeʻuhi ko e ʻaʻeva toko taha ʻa Sīsū ʻi ha hala lōloa mo fakataʻelatá, ʻe ʻikai fiemaʻu ke tau fai pehē foki.… Kuo tau ako mei he tumutumu ʻo Kalevalé ʻa e foʻi moʻoni ko ia, he ʻikai ʻaupito ha taimi ia ʻe teitei tuku toko taha pe taʻefaitokonia ai kitautolu, neongo te tau ongoʻi ʻoku hoko ʻeni ʻi he taimi ʻe niʻihi. Ko e moʻoni naʻe folofola ʻa hotau Huhuʻí: ʻʻE ʻikai te u tuku ke tuēnoa ʻa kimoutolu.’ …

“‘… ʻI heʻetau fakaofi mai ki he uike toputapu ko ʻení … ʻofa ke tau fakahaaʻi kitautolu ko ha kau ākonga kakato ange ʻa e ʻEiki ko Sīsū Kalaisí, ʻo ʻikai ʻi he leá pē pea ʻikai ʻi he taimi ʻo e fiemālié pē, ka ʻi he ngāue pea mo e loto-toʻa pea ʻi he tui, kau ai mo e taimi ʻoku fakataʻelata ai ʻa e fonongaʻangá pea mo e taimi ʻoku faingataʻa ai ke fua hotau kolosí. Fakatauange ke tau tuʻu fakataha mo Sīsū Kalaisi ʻi he uike Toetuʻu ko ʻení pea maʻu ai pē “ʻi he kuonga kotoa pē pea ʻi he meʻa kotoa pē, mo e feituʻu kotoa pē te [tau] ʻi ai, ʻo aʻu ki he maté,” he ko e moʻoni ko e founga ia naʻá Ne tuʻu fakataha ai mo kitautolu ʻo aʻu ki he maté pea mo e taimi naʻe pau ke Ne tuʻu toko taha aí’ (konifelenisi lahi, ʻEpeleli 2009).

“ʻOku ou tānaki atu ʻeku fakamoʻoní ki ai koeʻuhí ko hotau Fakamoʻui ko Sīsū Kalaisí, he ʻikai ha taha ʻiate kitautolu ʻe teitei tuenoa. Hangē ko e lea fakaʻofoʻofa naʻe fai ʻe Palesiteni Kamila N. Sionisoni ʻi heʻene lea ʻi he konifelenisí, ‘Ko Sīsū Kalaisi ʻa e Fakafiemālié!’ Fakatauange te tau maʻu ʻa e fiemālie ko iá ʻiate Ia, pea ʻofa ke tau takitaha omi ke maʻu haʻatau fakamoʻoni pau, ʻoku ʻikai pea he ʻikai ʻaupito te tau teitei ʻaʻeva toko taha. Maʻu ha Toetuʻu Fiefia!”