Fakaʻilekitulōnika Pē: Kakai Lalahi Kei Talavoú
Ko e Fili ke Toe Falala ki he ʻOtuá hili Hono Aʻusia ha Ngaahi Faingataʻa ʻi Heʻeku Ngāue Fakafaifekaú
ʻOku nofo ʻa e tokotaha naʻá ne faʻú ʻi Sipeini.
Naʻe ʻikai hoko ʻeku ngāue fakafaifekaú ʻo tatau mo e meʻa naʻá ku fakakaukau maʻu pē ki aí, pea naʻá ku ongoʻi puputuʻu mo tuenoa ai—kae ʻoua kuó u ako ke falala ki he ʻOtuá.
ʻI he kamata ʻeku ngāue fakafaifekaú, naʻe lahi ʻa e ngaahi meʻa naʻá ku fakatetuʻa ki aí. Te u ngāue faivelenga, papitaiso ha kakai tokolahi, pea foki ki ʻapi mo ha ngaahi talanoa loto-falala mo ueʻi fakalaumālie ke talanoaʻi. Te u fakafiefiaʻi hoku fāmilí.
Ka neongo ia, ʻi he kotoa ʻo ʻeku akó, naʻe taʻeʻamanekina ʻeku loto-hohaʻá. Naʻá ku saiʻia ʻi he ongoongoleleí—naʻe ʻikai mahino kiate au ʻa e ʻuhinga naʻe fuʻu faingataʻa ai ke u vahevahe iá. Naʻe hanga ʻe heʻeku feinga ke maʻu ha loto-falala lolotonga ʻeku faiakó ʻo ʻai ke u veiveiua ʻiate au pē mo ʻeku tuí.
ʻI he fakalau ʻa e taimí, naʻe fakaʻau ke u loto-mafasia (naʻe ʻikai foki ke tokoni ʻa e COVID-19). Naʻe ʻikai ke fuʻu maheni ʻeku palesiteni fakamisioná mo e ngaahi faingataʻaʻia fakaeʻatamaí, pea naʻe ʻikai ke ma fetaulaki lelei maʻu pē lolotonga ʻema ngaahi pōtalanoá. Naʻe kamata ke u sio ki ha faifaleʻi, ʻa ia naʻe tokoni lahi, ka naʻe ʻikai mole ʻeku ngaahi faingataʻaʻia ʻi he ongoongoleleí. Naʻá ku manavasiʻi ke toe talanoa ki heʻeku palesiteni fakamisioná fekauʻaki mo ʻeku ngaahi ongó koeʻuhí naʻá ku manavasiʻi naʻá ne fakafoki au ki ʻapi, pea naʻá ku fie fakaʻosi ʻeku ngāue fakafaifekaú.
Naʻe hala ʻeku tui, ʻoku ʻikai totonu ke faingataʻaʻia ʻa e kakaí ʻi he ngāue fakafaifekaú pe ʻi he taimi ʻoku nau feinga ai ke fai ʻa e meʻa ʻoku totonú, ko ia naʻá ku puputuʻu ʻi hoku tūkungá. ʻIkai naʻe totonu ke u aʻusia ʻa e fiefiá ʻi heʻeku fai e ngāue ʻa e ʻEikí?
Ko e Tui ʻi he lotolotonga ʻo e Faingataʻá
ʻI he ʻosi ʻeku ngāue fakafaifekaú, naʻá ku fāinga ke maʻu ha ngaahi tali mo ha poupou fekauʻaki mo ʻeku ngaahi ongo faingataʻaʻiá. Naʻe ʻikai haʻaku fetuʻutaki mo hoku ngaahi hoá pe palesiteni fakamisioná, pea naʻá ku ongoʻi mā lahi fekauʻaki mo ʻeku ngaahi ongó. Naʻá ku manavasiʻi ke vahevahe kinautolu koeʻuhí naʻe ʻikai ha toe taha naʻe faingataʻaʻia ʻi heʻenau ngāue fakafaifekaú—pe naʻe ʻikai pē ke nau talanoa ki ai.
ʻI ha ʻaho ʻe taha ʻi he lotú, naʻe lea ai ʻeku faiako Lautohi Faka-Sāpaté fekauʻaki mo e founga naʻe fehangahangai maʻu ai pē ʻa hono fohá, ʻa ia naʻá ne moʻui faivelenga ʻaki ʻa e ongoongoleleí mo ngāue fakafaifekaú, mo e ngaahi faingataʻa ʻi heʻene moʻuí pea naʻá ne ongoʻi naʻe taʻetotonu. Naʻá ne fakamatalaʻi ʻa e tūkunga tatau pē naʻá ku ʻi aí!
Naʻá ne fakamoʻoniʻi ʻoku ʻikai maluʻi kitautolu ʻe he ʻilo ki he ongoongoleleí mei he ngaahi faingataʻá mo e ngaahi polé, ka ʻe lava ke tokoni hono maʻu ʻo e tuí mo hono tauhi ʻetau ngaahi fuakavá ke tau maʻu ai ha mālohi mei he Tamai Hēvaní mo Sīsū Kalaisi pea mo e fakafiemālie ʻa e Laumālie Māʻoniʻoní.
ʻOku fekauʻaki ʻa e moʻuí mo e fili ke falala ki he Tamai Hēvaní ʻi he ngaahi momeniti ko iá pea maʻu ha nonga, tupulaki, mo ha tui lahi ange ʻi he lotolotonga ʻo e faingataʻá mo e taʻetotonú.
Naʻe akoʻi ʻe Palesiteni Henelī B. ʻAealingi ko e Tokoni ʻUluaki ʻi he Kau Palesitenisī ʻUluakí: “ʻOku ou loto ke fakalotolahiʻi ʻa kinautolu ʻoku lolotonga tofanga ʻi ha faingataʻá, pea ongoʻi ʻoku hōloa ʻenau tuí ko e taulōfuʻu mai ʻa e ngaahi faingataʻá. ʻE lava ke hoko e faingataʻá ko e founga ia ke fakamālohia pea maʻu ai ha tui ʻe tuʻumaʻú.”
Naʻá ku fakatokangaʻi ko e ngāue fakafaifekaú, mo ha faʻahinga meʻa pē ʻoku kole mai ʻe he ʻEikí ke tau fai, ʻoku ʻikai ke nau faingofua maʻu pē. ʻI he fakalau mai ʻa e taimí, ko e ngaahi faingataʻa naʻá ku pehē naʻá ne fakavaivaiʻi ʻeku tuí, ko e ngaahi aʻusia ia te ne lava hono fakamālohiá. Naʻe fiemaʻu ke liliu ʻeku fakakaukaú. Makatuʻunga ʻi heʻeku Tamai Hēvaní mo Hono ʻAlo ko Sīsū Kalaisí, te u lava ʻo fakaʻatā ʻa e ngaahi faingataʻa naʻá ku fehangahangai mo ia ʻi heʻeku ngāue fakafaifekaú ke fakatupulaki ʻeku tuí.
Ko e Toe Falalá
Naʻe akoʻi mai ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá kimuí ni: “ʻOku kātekina ʻe he tuí ʻa e ngaahi faingataʻa mo e taʻepau ʻo e moʻuí he ʻoku tuʻu maʻu ia ʻia Kalaisi mo ʻEne tokāteliné. ʻOku faʻu fakataha ʻe Sīsū Kalaisi mo ʻetau Tamai Hēvaní ʻa ia naʻá Ne fekauʻi mai Iá, ʻa e taumuʻa taʻe-liua mo falalaʻanga haohaoa pē taha ʻo ʻetau fakafalalá.”
ʻI he taimi ʻoku kehe ai ʻa e moʻuí mei he meʻa naʻa tau ʻamanaki ki aí, ʻoua naʻa tau tui kuo liʻaki kitautolu ʻe he Tamai Hēvaní pe ʻoku ʻikai moʻoni ʻa e ongoongoleleí, te tau lava ʻo fili ke falala kiate Ia.
Kuó u ako foki hono mahuʻinga ke talanoa ki he kakai falalaʻangá pea ʻoua ʻe faingataʻaʻia fakalongolongo pē. He ʻikai mahino kakato ki he tokotaha kotoa pē ʻetau ngaahi aʻusiá, ka ʻoku fuʻu mahuʻinga ʻa e fehokotaki ʻuhingamālie mo e niʻihi kehé ki heʻetau lelei fakaeʻatamai mo fakalaumālié.
ʻOku ʻofa haohaoa ʻetau Tamai Hēvaní ʻiate kitautolu, pea ʻoku tau maʻu ha Fakamoʻui ʻokú Ne ʻafioʻi kitautolu. ʻOkú Na finangalo ke tau manatuʻi te tau lava ʻo falala kiate Kinaua—maʻu pē.