Ua Na’o Tusiga Faaeletonika: Talavou Matutua
O Le A Ou Faia le Galuega Faaleagaga. O Afea e Oo Mai ai O’u Faamanuiaga?
E mafai ona faigofie le i ai o se mafaufau i “faamanuiaga vave” pe a oo i la tatou sootaga ma le Tama Faalelagi.
I ni nai tausaga ua mavae, sa ou i ai i se tulaga nutimomoia lea na ese le i’uga nai lo le mea sa ou faamoemoeina. Sa ou faanoanoa ma lē fiafia aua sa ou lagonaina sa ou faia mea uma i le sa’o.
Ou te manatu o le toatele o i tatou na i ai lagona faapea. O nisi taimi tatou te faatalitali ai i le Tama Faalelagi mo ni tali, ma a tatou ola amiotonu, e faigofie lava ona mafaufau o le a vave ona oo mai ni vaifofo.
Ae a le lelei mea uma i le auala tatou te mananao ai pe faamoemoe i ai, e faigofie lava ona lagona le ita, le fiafia, faapea ma le faagaloina.
I na taimi, e mafai ona tatou aoao ai le uiga moni o le faatuatuaina o le Alii.
Fa’atalitali i le Ali’i
Ua tatou ola i se lalolagi o le faamalieina vave o manaoga. A i ai se tatou fesili, e mafai ona tatou faaaoga le Google ma maua ai se tali vave. A tatou ivavā, e mafai ona tatou maua vave ni vitio o faafiafiaga e le muta i luga o ala o faasalalauga faaagafesootai. O lea la, e faigofie ai ona maua lenei mafaufau o “faamanuiaga vave” pe a oo i la tatou sootaga ma le Tama Faalelagi.
Atonu tatou te mafaufau, “Ua ou faia le galuega, o fea la o’u faamanuiaga?” Ma atonu e faateteleina lo tatou ita ma le le faamalieina i le umi tatou te faatalitali ai mo le oo mai o na faamanuiaga.
Ae e pei ona a’oa’o mai Elder D. Todd Christofferson o le Korama a le Au Aposetolo e Toasefululua e faapea:
“E le tatau ona tatou mafaufau i le fuafuaga a le Atua o se masini faifaatau lea tatou te (1) filifili ai se faamanuiaga moomia, (2) tuu i totonu se aofaiga o galuega lelei, ma (3) vave ai loa ona tiliva mai le oka.
“… Tatou te faia le mea silisili ae e tatau ona tuu atu ia te Ia le puleaina o faamanuiaga, faaletino ma le faaleagaga.”
A o le’i agai i luma le olaga i le ala sa ou faamoemoeina, sa ou matuai tauivi lava! Sa ou lagonaina le alagatatau o faamanuiaga mo a’u ona o [lo’u] faamaoni. O le a le uiga o le faamaoni po o le usiusitai pe afai sa matuai leai se uiga na fai ai? Pe sa na ona taumafai o le Tama Faalelagi e taofia mea lelei mai ia te a’u?
Ae ina ua ou mafaufau i le tele o le popole ma le alofa o le Tama Faalelagi i Ana fanau taitoatasi, sa ou iloa ai e le mafai ona moni nei manatu. Sa ou iloaina o le filifili e faatuatuaina le Tama Faalelagi pe afai na o mea lelei lava e tutupu o le a faigofie.
O taimi luitauina na tatou te le o saunia ai i taimi uma mo lena mea e atili ai ona anoa, sili atu le faamamaina, ma sili atu ona mamana le faatuatuaina o Ia.
Mo Lo Tatou Lelei
O le a i ai pea lava taimi o le a le vave oo mai ai faamanuiaga tatou te matua mananao lava i ai e pei ona tatou faamoemoeina. Ae a tatou faia le mea sili tatou te mafaia e savavali ai i le ala o le feagaiga, e mafai lava ona tatou faatuatua i taimi uma o loo tatou i ai i aao o le Tama Faalelagi ma o loo Ia silafia le ata telē atu.
O le mea e sili ona aumaia ia te a’u le olioli tele a o ou faatalitali, o le iloaina lea o a’u o se atalii faalelagi o le Tama Faalelagi ma e i ai so’u Faaola e malamalama i mea uma e uiga ia te a’u. I faigata uma lava ua ou oo i ai, pe a ou filifili e taulai atu i a’u feagaiga, ou te lagonaina lo La’ua alolofa atoatoa ma manatua o loo La’ua silafia lelei mea ou te manao ai.
Na molimau mai talu ai nei Elder Gerrit W. Gong o le Korama a Aposetolo e Toasefululua, “Pe a tatou faatuatuaina le Atua ma Lona alofa mo i tatou, e oo lava i o tatou loto nutimomoia sili ona faigata e mafai, i le iuga, ona galulue faatasi mo lo tatou lelei.”
Ua moni lena mea mo a’u. E tusa lava po o le a le maulalo o o’u lagona, ou te lagona lava le olioli i le iloaina e atoatoa le fuafuaga a le Tama Faalelagi. A o ou faalagolago i le Faaola, e mafai ona fesoasoani mai o Ia ia te au e faataga mea faigata o le olaga e faamalosia ai lo’u faatuatua.
Filifili e Faatuatuaina
Afai o loo e tauivi e tumau i le mautinoa po o le faamoemoe a o e faatalitali mo faaaliga ma faamanuiaga folafolaina, ou te iloa ou lagona.
Ae ua ou iloa foi le mafai ona mamana o le filifili e faatuatuaina. Talanoa i le Tama Faalelagi, fesootai ma Ia ma Iesu Keriso i aso taitasi, ma o le a e iloa ai e le o tuua na o oe. O loo Laua taitai pea oe i le itu sa’o pe afai e faaauau pea ona e liliu atu ia i Laua.
Ia naunau lou loto e faatalitali i lo Laua taimi atoatoa.
E le o faagaloina e i Laua oe.