“Pe Mafai Moni Ona Ou Faatuatuaina le Taitaiga a le Perofeta?,” Liahona, Mat. 2025.
Autalavou Matutua
Pe Mafai Moni Ona Ou Faatuatuaina le Taitaiga a le Perofeta?
Sa ou filifili lava e mulimuli i le perofeta, ae pe mafai ona ou faatuatuaina o ia i lenei tulaga?
Ata na tusia e Kylee Bodily
Ina ua ou maua le valaau o le a aveesea a’u mai la’u misiona, sa ou lē fiafia ma lē mautonu.
I ni nai masina a o lei faamaloloina a’u, na filifili ai le Au Peresitene Sili e auina atu a’u ma nisi faifeautalai i le fale e faavae i mea sa ou manatu sa na o ni tala sese o se feteenaiga faavaomalo e ono tulai mai. Sa leai se faamaoniga o le a iai se mea o le a tupu.
Ou te lei manatu e i ai se mea e popole ai.
Fesiligia o Musumusuga
Sa ou manao lava e auauna atu i se misiona ma sa ou galue malosi e ausia lena sini. Sa le lava tupe, ae sa ou maua se galuega na fesoasoani ia te a’u e lava ai le tupe maua e totogi ai la’u misiona. Ina ua ou tatalaina lo’u valaauga, sa matuai sa’o lava, ma sa ou iloaina na sau mai le Atua.
Ae, ona o le faama’i o le COVID-19, na toe tofia ai a’u i se misiona i Iuta mo le iva masina ae ou te lei oo atu i atunuu mamao i lo’u uluai tofiga. Sa matuu atu lo’u [popole] ma fiafia tele ina ua ou i ai i le mea na muai valaauina ai a’u e le Atua.
Ae, ina ua mavae ni nai masina o i ai iina, sa faafuasei lava ona aveesea a’u mai tagata ma atunuu sa ou alofa i ai. Sa ou lagonaina e pei ua aveesea mea uma mai ia te a’u.
Sa ou lagona le faalataina. Sa ou fesiligia ma le faamaoni pe o se filifiliga musuia lenei.
Ma le musuā, sa ou lele atu i le fale i Texas. Sa matuai le’i faamoemoeina lava le aveesea o a’u o lea sa le’i i ai lo’u tamā ma o’u tei i le malaevaalele e faafeiloai a’u.
O Se Faamanuiaga o le Saogalemu
I ni nai aso talu ona ou tuua la’u misiona, sa faate’ia a’u ina ua tupu se feteenaiga matautia e latalata i le mea sa ou auauna atu ai. I lena taimi, sa ou iloa ai o le mulimuli i le perofeta na ou saogalemu ai i se auala moni lava. Sa lofituina a’u i le agaga faafetai mo le perofeta ma ana musumusuga.
Sa ou faia se folafolaga ia te a’u lava ia o le a ou faalogo pea i mea na fai mai ai le perofeta, e tusa lava pe le talafeagai i lena taimi.
Na saunoa mai Elder Ulisses Soares, o le Korama a Aposetolo a Toasefululua: “O le i ai o perofeta o se faailoga lea o le alofa o le Atua mo Lana fanau. Latou te faailoa maia folafolaga ma le natura moni o le Atua ma Iesu Keriso i o La’ua tagata.”
Ou te matua talitonu o Peresitene Russell M. Nelson o se fofoga o le Alii. E galulue tu’usa’o o Ia ma le Tama Faalelagi ma le Faaola e taitai i tatou i le saogalemu ma tuuina mai ia i tatou le faamoemoe ma le taitaiga i taimi faigata.
O Faamanuiaga o le Mulimuli i le Perofeta
Afai o loo e mafaufau pea pe na valaauina le perofeta e le Atua, o la’u fautuaga o le faatino lea o ana valaaulia. Taumafai e toe faitau lauga lata mai nei a Peresitene Nelson i le konafesi ma suesue i tusitusiga paia na ia fautuaina mai. Faatino ana valaaulia ma suesue i faamanuiaga ua ia folafola mai faatasi ma na valaaulia.
Na aoao mai foi Elder Soares, “O le mulimuli i [perofeta], e sili atu ai ona fiafia o tatou olaga ma faaitiitia ai le faigata, o le a faigofie ai ona onosaia o tatou faigata ma faafitauli, ma tatou fatuina ai se ofutau faaleagaga e siomia ai i tatou.”
Ua ou vaaia nei faamanuiaga i lo’u olaga a o ou mulimuli i le fautuaga a le perofeta. Ou te iloa o nei faamanuiaga e avanoa mo tagata uma o e tuu lo latou faalagolago i le Atua ma Lana perofeta.