Ua Na’o Tusiga Faaeletonika: Talavou Matutua
E Mafai Faapefea Ona Ou Maua ma Iloa Faaaliga Faaletagata Lava Ia?
O faaaliga patino e avanoa mo soo se tasi e naunau e faia se taumafaiga.
“E finagalo moni ea le Atua e talanoa mai ia te a’u?”
O se fesili lenei sa masani ona i a te a’u e uiga i faaaliga faaletagata lava ia. E mafai ona fesoasoani le Atua ia i tatou e fai faaiuga o le olaga e ala i faaaliga, ae o le toatele lava o i tatou atonu e fesiligia pea pe faapefea ona fai.
Ae e faafetaia, e pei ona molimau mai ia Peresitene Russell M. Nelson: “E finagalo moni ea le Atua e talanoa mai ia te oe? Ioe!”
E naunau lava le Tama Faalelagi e talanoa i Ana fanau uma! Atonu e ese lou aafiaga nai lo a’u, ae o nisi nei o upumoni ma manatu e mafaufau i ai e mafai ona fesoasoani ia i tatou e faaleleia atili ai lo tatou gafatia e maua ai faaaliga patino mai le Tama Faalelagi.
E Mafai Faapefea ona Ou Valaaulia Faaaliga?
E anoanoai auala e valaaulia ai faaaliga. Mo le tasi, e mafai ona tatou “saili, mafaufau loloto, ma tatalo.” Ia te au lava ia, o lenei mea e aofia ai le suesue i tusitusiga paia ma isi punaoa o le talalelei po o le talanoa ma uo ma faufautua faamaoni. Aua, na molimau mai Peresitene Nelson e faapea, “o musumusuga lelei e faavae i luga o faamatalaga lelei.”
O le mafaufau loloto e tutusa lava le taua ma le suesue i tusitusiga paia ma le tatalo. Ou te le atoatoa i le faaaluina o se taimi e mafaufau loloto ai i mea ou te suesueina, ae e masani lava o na taimi ou te tapunia ai mea faalavefau ma liliu atu i le Alii ou te lagona ai le Agaga o taialaina au.
Na valaaulia i tatou e Peresitene Nelson ia tatou “tatalo atu i le suafa o Iesu Keriso e uiga i ou atuatuvalega, ou popolega, ou vaivaiga—ioe, o faanaunauga o lou loto. Ona fa’alogo lea! Tusi i lalo manatu e oo mai i lou mafaufau. Tusi fa’amaumau i lalo ou lagona ma tulitatao i fa’atinoga e u’una’ia oe e fai.”
Ua faamamafa mai foi e taitai o le Ekalesia le taua o le mama, taimi e tuuto atu ai i galuega o malumalu ma talafaasolopito o aiga, auauna atu i isi, ma le naunautai e usiusitai. O nei mea e mafai ona faateleina ai lou nofouta i le Agaga ma fesoasoani e te maua ai le taitaiga mai le Atua.
E Mafai Faapefea ona Ou Iloa Faaaliga?
Atonu tatou te lagona le lotovaivai ona tatou te le vaaia ni faaaliga vaaia, faalogo i leo, pe maua ni aafiaga e pei o i latou o loo i tusitusiga paia po o tagata foi o siomia i tatou. Ae ia manatua, “e leai ni tagata se toalua e tutusa lelei le auala e maua ai le malamalama ma le upumoni a le Atua.”
O nisi taimi e oo mai ai le tali i le tulaga o le lagonaina o le filemu pe a ou faia se filifiliga e ogatasi ma le finagalo o le Atua (tagai i le Mataupu Faavae ma Feagaiga 19:23). O isi taimi e lagona ai e lo’u mafaufau le faamalamalamaina a o ou aoaoina se mea fou mai tusitusiga paia (tagai i le Mataupu Faavae ma Feagaiga 11:13). E i ai taimi e oso mai ai i lo’u mafaufau se manatu i le auala e auauna atu ai i se tasi (tagai i le Moronae 7:13). Ma i taimi filemu, ou te faalogoina ai se leo mālū i lo’u mafaufau e faamanatu mai ai ia te au upumoni o le talalelei (tagai i le Helamana 5:30).
O nei mafaufauga ma lagona uma—ma isi mea—e mafai ona avea ma auala e talanoa mai ai le Agaga ia i tatou. Ole atu i le Tama Faalelagi mo se fesoasoani i le iloaina o Lona siufofoga, ma o le a Ia fesoasoani ia te oe e logona ia te Ia.
Aisea E Le O Mai ai Tali?
O nisi taimi ou te faia ai mea uma ou te mafaufau i ai ae ou te le lagona lava o o’u maua se tali. E mafai ona e fesootai i ai? Ia aua nei lotovaivai! E lei tuulafoaiina i tatou e le Atua. E tele mafuaaga e ono tatou le maua ai faaaliga i le taimi lava tatou te ole atu ai.
Atonu ua tali mai le Atua ia te oe, ae e faigata ona iloa. E mafai e le Agaga ona faailoa mai savali i le tele o auala, ma afai e na o se auala patino o e faamoemoeina ai se tali, atonu e te misia.
Atonu e te le o mauaina se tali manino aua e faatuatuaina oe e le Atua ma e finagalo e faaaoga lou faitalia e fai ai se filifiliga atamai (tagai i le Eteru 2:23–25). O le galue i le faatuatua e faamaonia mai ai e le Atua pe o e i ai i le ala sa’o pe leai.
O luitau o le soifua maloloina faalemafaufau ma isi tauiviga e le o ni o tatou sese e mafai ona faigata ai ona lagona pe faalogo i le Agaga.
Atonu o loo i ai se mea e manaomia ona e salamo ai?
Pe atonu foi e te manaomia se isi taimi ma sauniuniga ae e te lei saunia e talia le afioga a le Atua (tagai i le 3 Nifae 17:2–3).
E tele mafuaaga atonu tatou te le maua ai tali i le taimi lava tatou te mananao ai, ae ia manatua, e alofa le Atua ia te oe! O le a Ia aapa atu ia te oe i le taimi ma le ala sa’o pe afai e te aapa atu pea mo Ia (tagai i le Mataupu Faavae ma Feagaiga 88:63).
A o tatou valaaulia pea le Agaga i o tatou olaga, o le a tatou iloa ai e finagalo le Atua e talanoa mai ia i tatou! Ua saunia o Ia e tali a tatou fesili.