Na Fetalai le Atua i le Au Paia Anamua—Pe Fetalai Mai o Ia ia te Au?

Tatalo Faamaualalo a Iosefa

Na amata i se fesili. Ma na avea ma mea na faamatalaina e Elder Alexander Dushku o le Fitugafulu o se “pa lofituina o le malamalama ma le upumoni.” O le tatalo faatauvaa a Iosefa Samita na taitai atu ai i se asiasiga matagofie mai le Tama Faalelagi ma Iesu Keriso (tagai i le Iosefa Samita—Talafaasolopito 1:14–17). E ui lava ina ofoofogia le talanoa faafesagai ma le Atua, ae o nei aafiaga e seāseā tupu ma e paia.

E ui e le o i tatou uma o le a maua le avanoa lava lea e tasi na maua e Iosefa, “e mafai foi ona tatou maua o tatou lava poutu o le malamalama—e tasi le ave i le taimi.” Pe a tatou fai atu se fesili ma tootuli i le tatalo faamaulalo, o le a tatou maua se tali mai le Atua e ala i le Agaga Paia.

Ata pue o le vai papatisoga i le Malumalu o Ogden Iuta

O Le Mana o le Malumalu

Sa ositaulagaina e le Au Paia i Katelani, Ohaio, ia taimi, tupe, ma galulue e fausia le maota o le Alii. I le faapaiaga o le Malumalu o Katelani, sa tatalo ai Iosefa Samita ina ia faamanuia e le Atua nei Au Paia faamaoni i le mana a o latou ulufale atu ma tapuai (tagai i le Mataupu Faavae ma Feagaiga 109:13). O le malumalu sa tatau ona avea “o se fale o le tatalo, o se fale o le anapogi, o se fale o le faatuatua, o se fale o le mamalu ma [o se fale] o le Atua” (Mataupu Faavae ma Feagaiga 109:16).

I aso e gata ai, ua faamanuiaina i tatou i malumalu i le lalolagi atoa. Ua folafola mai ia i tatou o le a tatou maua faaaliga a o tatou auai i le malumalu. Na saunoa talu ai nei Peresitene Russell M. Nelson e faapea “i totonu o le malumalu e mafai ona tatou ‘maua ai le atoatoaga o le Agaga Paia’ [Mataupu Faavae ma Feagaiga 109:15]. Vaai faalemafaufau i le uiga o lena folafolaga e tusa ma le matala o le lagi mo tagata taitasi e saili ma le naunautai mo le upumoni e faavavau.”

Fesili a Ailama i le Perofeta

Pe na e mafaufau ea pe faapeī le fai atu i le perofeta e talanoa i le Atua mo oe? O Ailama, le uso o le Perofeta o Iosefa, na faia lena mea. Sa ia mauaina lenei fautuaga mai le Alii e ala mai ia Iosefa: “Faauta o oe o Ailama, lo’u atalii; saili le malo o le Atua, ma o le a faaopoopo atu mea uma e tusa ma le mea ua tonu” (Mataupu Faavae ma Feagaiga 11:23).

O nisi taimi, e oo mai ai le taitaiga e ala mai i isi tagata. Na fautuaina i tatou e Peresitene Russell M. Nelson ina ia “saili le taitaiga mai leo e mafai ona outou faatuatuaina—mai perofeta, tagatavaai, ma talifaaaliga ma mai musumusuga a le Agaga Paia.” E ui e le mafai ona tatou fesili sa’o atu i le perofeta i a tatou fesili, ae e mafai lava ona tatou maua tali i a tatou fesili patino.

Atatosi o Oliva Kaotui na saunia e Lewis A. Ramsey

Suesuega a Oliva o le Faatuatua

O Oliva Kaotui o se fesoasoani taua tele ia Iosefa i le taimi o le faaliliuga o le Tusi a Mamona. Ae i le 1829, na ia lagona ai le le fiafia. Aisea na le mafai ai ona ia faaliliu? Na tuuina mai e le Alii ia Oliva ni fautuaga patino e uiga i le auala e maua ai se tali i lana fesili—fautuaga o loo faatatau pea ia i tatou i aso nei.

A i ai se fesili, e uunaia i tatou e suesue i ai, ia i ai le faatuatua, ma faalagolago i uunaiga (tagai i le Mataupu Faavae ma Feagaiga 9:6–9). E ono oo mai o tatou uunaiga i le tulaga o lagona, lagona mafanafana, po o le filemu o le mafaufau. E pei ona saunoa mai Elder Mathias Held o le Fitugafulu, “Pe a tuufaatasia [mafaufauga talafeagai ma musumusuga a le Agaga Paia] i o tatou agaga, o le a faaalia i se ata atoa se tasi le moni o mea e pei ona i ai moni.”

Ata na pueina e Craig Alan Shelley

O Faamanuiaga Faapeteriaka o le Aiga o Samita

O faamanuiaga faapeteriaka ua avea ma se vaega o le Ekalesia talu mai taimi o le Feagaiga Tuai (tagai i le Kenese 48). Ina ua faatulagaina le Ekalesia i aso e gata ai, sa fetalai atu le Atua ia Iosefa e valaau lona tamā, o Iosefa Samita le Matua, e avea ma peteriaka i le 1834. I le tolu o aso mulimuli ane, na faapotopoto ai le aiga o Samita ina ia mafai e Iosefa Samita le Matua ona tuuina atu se faamanuiaga faapeteriaka i lana fanau taitoatasi ma o latou taitoalua. O nei faamanuiaga na ofoina mai ai fautuaga ma le faamafanafanaga mo o latou olaga.

E faaopoopo atu i le tautinoga o le tupu’aga, o se faamanuiaga faapeteriaka “o se tusitusiga paia patino ia te oe.” Ao tatou su’esu’e i le tele o taimi ia tatou faamanuiaga faapeteriaka, e “tatau ona faatauaina ona upu, mafaufau loloto i ai, ma ola ia agavaa e maua ia faamanuiaga folafolaina i le olaga nei ma i le faavavau.”

Atatosi o Ema Samita na saunia e Lee Greene Richards

O Le Taitaiga Patino a Ema mai le Atua

I le avea ai ma avā i le perofeta, sa masani ona tauivi Ema Samita ma tofotofoga ma feteenaiga sa talosagaina ai lona aiga e onosaia. I le Mataupu Faavae ma Feagaiga 25, e mafai ona tatou faitau ai i upu o le faamafanafanaga ma le faamalosiau a le Tama Faalelagi ia Ema.

A tatou sailia a tatou lava savali o le faamafanafanaga mai le Tama Faalelagi, e mafai ona tatou ole atu mo faamanuiaga o le perisitua. E pei ona sa aoao mai Peresitene James E. Faust (1920–2007), Fesoasoani Lua i le Au Peresitene Sili: “O faamanuiaga o le perisitua e mafai ona fesoasoani ia i tatou i faaiuga laiti ma tetele o o tatou olaga. Afai, e ala mai i o tatou faamanuiaga faaleperisitua, e mafai ai ona tatou iloa na o sina vaega itiiti lava o le tagata ua finagalo le Atua tatou te avea ai, o le a leai so tatou fefe ma e le toe masalosalo lava.”

Atatosi o Iosefa F. Samita na saunia e Albert E. Salzbrenner

Suesuega o Tusitusiga Paia a Iosefa F. Samita

Ina ua faatamaia e faama’i, taua, ma le oti le lalolagi i le 1918, sa liliu atu le perofeta o Iosefa F. Samita i tusitusiga paia mo ni tali. Ina ua uma ona suesue i upu a Peteru i le Feagaiga Fou, sa amata ona ia manatunatu ma mafaufau loloto. Sa aveesea o ia i se faaaliga vaaia mo le Ekalesia lea na ia vaaia ai le Faaola o faatulagaina le galuega faafaifeautalai i le lalolagi o agaga. (Tagai i le Mataupu Faavae ma Feagaiga 138.)

E pei ona aoao mai Elder Robert D. Hales (1932–2017) o le Korama a Aposetolo e Toasefululua: “Pe a tatou mananao e talanoa i le Atua, tatou te tatalo. Ma a tatou mananao ia te Ia e fetalai mai ia i tatou, tatou te suesue i tusitusiga paia.” O tusitusiga paia o afioga a le Atua ua faasaosaoina i tusitusiga, ma i lo tatou vaitaimi faatekinolosi, e lei sili atu lava ona tatou mauaina. A o tatou faitau ma mafaufau loloto i tusitusiga paia, o le a tatou maua le fesoasoani mai le lagi tatou te manaomia.

Ata na pueina e John McKinney

Taumafaiga Faamoemoeina e Faalogo ia te Ia

Na aoao mai Peresitene Nelson: “A o tatou saili e avea ma soo o Iesu Keriso, o a tatou taumafaiga ia faalogo ia te Ia e manaomia ona matua faia ma le faamoemoe sili i ai. E manaomia ai taumafaiga magafagafa ma tumau e faatumu ai o tatou olaga i aso taitasi i Ana afioga, Ana aoaoga, Ana upumoni.” E pei lava o le Au Paia anamua, e mafai ona tatou maua savali mai le Atua e patino ma moni.

Na fetalai atu le Atua ia i latou. O le a Ia fetalai mai ia i tatou. E na o le tatou faalogo atu lava ia te Ia.