Ua Na’o Tusiga Faaeletonika: Talavou Matutua
O Mea e 4 Ou te Faalagolago I Ai Pe A Ou Taumafai e Faatuatuaina le Tama Faalelagi
E alala le tusitala i Verona, Italia.
E finagalo le Atua e fetalai mai ia i tatou ma taiala i tatou i le ala o le feagaiga.
“Pe o se vaega lenei o le fuafuaga?”
O se fesili lenei ou te fesili ai i nisi o taimi. Ou te iloa e i ai se fuafuaga atoatoa a le Tama Faalelagi, ae i taimi eseese o lo’u olaga, sa ou tauivi ai e vaai pe o le a faapefea le taunuuga o lo’u olaga. Pe a tatou oo i tofotofoga e fenumiai ma tiga, e mafai ona faigata ona iloa pe faapefea ona latou “galulue faatasi mo [lo tatou] lelei” (Mataupu Faavae ma Feagaiga 90:24).
O le tala fiafia e faapea, e finagalo le Atua e fetalai mai ia i tatou ma taialaina i tatou i le ala o le feagaiga. E finagalo o Ia ia tatou liliu atu ia te Ia pe a tatou tauivi ina ia mafai ona tatou malamalama i Lana vaaiga e faavavau. Ma ua Ia tuuina mai ia i tatou ni nai meafaigaluega e fesoasoani ia i tatou e faalogo ai ia te Ia.
O Lo’u Faamanuiaga Faapeteriaka
Ina ua 18 o’u tausaga, sa ou feagai ma se suiga i lo’u faatuatua. Sa ou iloaina le toatele o tagata sa ola ae o ni tagata lolotu ae sa le’i aafia malosi i a latou tapuaiga, ma sa ou lagona le faaosoosoina e pauu atu i lena lava mamanu. Ae sa ou iloaina foi o le tautinoga moni i le Ekalesia a Iesu Keriso e manaomia ai le tele o mea nai lo le avea ma soo nofonofo, ma ua oo i le taimi mo a’u e fai ai se filifiliga.
A o ou filifili pe ou te manao e auauna atu i se misiona ma tuuto atoatoa atu i le Alii, sa ou iloaina sa ou manaomia le taitaiga faaopoopo e mafai ona maua mai i se faamanuiaga faapeteriaka. Sa ou manaomia se taitaiga patino ma se vaaiga o mea ua teuina e le Tama Faalelagi mo a’u.
E ui lava ua tatou iloa mai ia Elder Kazuhiko Yamashita o le Fitugafulu e faapea “o se faamanuiaga faapeteriaka o le a le faafanua ai lou olaga pe taliina ai au fesili uma,” ae “o se savali mai lou Tama Faalelagi ma atonu o le a aofia ai folafolaga ma fautuaga musuia e taiala ai oe i lou olaga atoa.”
O lo’u faamanuiaga faapeteriaka o le mea tonu lava lea sa ou moomia. Sa ou mauaina fautuaga musuia mai le Tama Faalelagi ma le faamaoniga sa i ai se fuafuaga mo lo’u olaga.
Faaaliga Faaperofeta
O se tasi o mea e sili ona ofoofogia na tupu ia te au i la’u misiona o le mauaina lea o se molimau moni e faapea, o perofeta ma aposetolo ua valaauina e le Atua. Ou te lei tatalo muamua lava mo lena malamalama, ma ina ua oo mai lena faamautinoaga, sa matuai mamana lava ia te a’u. O le iloaina latou te saunoa moni mai i le afioga a le Atua na ou maua ai se isi punaoa mo le sailia o le taitaiga mo lo’u olaga.
E pei ona molimau mai Elder Allen D. Haynie o le Fitugafulu: “O le iloaina e ala i faaaliga o loo i ai se perofeta soifua i le lalolagi e suia ai mea uma. … O se perofeta o se tasi ua sauniaina, valaauina, faasa’oina, musuiaina, aoaiina, faapaiaina, ma lagolagoina e le Atua lava ia.”
Faaaliga Faaletagata Lava Ia
Afai tatou te mafaufau i tofotofoga tatou te feagai, e mafai ona tatou fesili ifo ia i tatou lava i fesili nei na tuuina mai e Peresitene Russell M. Nelson: “O le a se mea o le a tatala e lo outou sailiga mo outou? O le a se atamai e le o ia te oe? O le a se mea ua e lagona le manaomia vave ona iloa pe malamalama i ai?
A tatou iloa mea moni tatou te manaomia mai le Tama Faalelagi ma Iesu Keriso, e mafai ona tatou mulimuli i le fautuaga a Peresitene Nelson: “Tatalo i le suafa o Iesu Keriso e uiga i o outou popolega, mea tou te matatau ai, o outou vaivaiga—ioe, o faanaunauga tonu lava o o outou loto. Ona fa’alogo lea! Tusi i lalo manatu e oo mai i lou mafaufau. Tusifa’amaumau i lalo ou lagona ma tulitatao i fa’atinoga e u’una’ia oe e fai.”
A o ou aoaoina le auala e saili ai faaaliga patino, ua ou iloaina ai e aumaia faatasi ai le tele o vaega eseese o mea tatou te faatinoina i le Ekalesia. Pe a ou fia iloa pe moni se mea, ou te faalagolago i le tatalo, ou te suesue i tusitusiga paia, ma ou te sailia upu a perofeta soifua.
O le fausiaina o mausa faaleagaga faifai pea e faatumauina ai lo’u saunia e maua faaaliga patino pe a ou manaomia. Pe a i ai ni a’u fesili pe lagona le leiloa, ou te manatua e i ai sa’u auala e maua ai tali ou te manaomia.
O Le Folafolaga a se Fuafuaga Atoatoa
I na taimi ou te fesili ai pe o taialaina moni lava e le Tama Faalelagi lo’u olaga, ou te manatua le mataupu faavae lona iva o le faatuatua: “Matou te talitonu foi o le a Ia [le Atua] faaali mai le tele o mea silisili ma le taua tau i le Malo o le Atua.”
E tele atu isi mea e tatau ona faaali mai e le Tama Faalelagi i Ana perofeta e uiga i le Ekalesia, ma e tele atu mea e tatau ona Ia faaali mai ia i tatou e uiga i o tatou olaga.
E pei ona folafola mai e Elder Dieter F. Uchtdorf o le Korama a Aposetolo e Toasefululua i talavou matutua, “Ma a o tatou tauivi e faalagolago i le Atua ma mulimuli i Lona Alo, o Iesu Keriso, o le a i ai se aso o le a tatou vaaia ai le fua faaiu, ma o le a tatou iloa ai sa taitaiina ma taialaina lava e le aao o le Atua a tatou laasaga.”
E mafai e le Tama Faalelagi ona faafetaui mea uma i o tatou olaga i Lana fuafuaga atoatoa a o faaauau pea ona tatou faatuatuaina ma mulimuli ia te Ia.