Na o Tusiga Faaeletonika: O Tali mai se Aposetolo
E Faapefea Ona Ou Faailoa Atu Lo’u Alofa mo le Atua?
O auala nei e fa e faailoa atu ai le alofa mo le Atua, e pei ona aoao mai e le perofeta o Iosua.
Mai se saunoaga i le faigalotu a le Iunivesite o Polika Iaga–Idaho na tuuina atu ia Fepuari 13, 2022.
O se tasi o upumoni silisili o le mana o le alofa i o tatou olaga. Ou te fia vaai i le alofa o se aoaoga faavae faatauanau o loo i ai ma le poloaiga.
“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.”
O le alofa i le Atua e aofia uma ai le Tama ma le Alo ma o se autu totonugalemu lea o le talalelei ma tusitusiga paia. I le fautuaga mulimuli a le perofeta o Iosua i tagata Isaraelu, na ia saunoa ai: “Ia outou matua anaana … tou te alofa atu ia Ieova lo outou Atua, ma savavali i ona ala uma, ma anaana i ana poloaiga, ma pipii lava ia te ia, ma auauna ia te ia ma o outou loto atoa ma o outou agaga atoa.”
“Ia e faamalosi ma loto tele,” na fetalai atu ai le Alii ia Iosua, e le faatasi ae faafa, a o iu ina alu atu o ia ma le faitau selau o afe e ulu atu i le laueleele folafolaina. E le’i vaeluaina le Vaitafe o Ioritana a o latalata atu le motu o tagata. Ae ina ua faatofuina e faitaulaga o loo tauaveina le atolaau o le feagaiga, o sui o le Alii, o latou vae i le vaitafe, sa vaeluaina vai ma sopoia e le toatele le eleele matutu.
E pei o tagata Isaraelu anamua, ua outou i ai i le faatausiusiuga o lo outou Vaitafe o Ioritana ma tulimatai atu i mea uma ua i ai i le Atua mo outou i la outou malaga i le olaga nei. Ae e mafai foi ona e faia le tautinoga i le taimi nei e alofa i le Alii lou Atua.
O le poloaiga sili muamua lea, ma e lei suia lava i tisipenisione uma. Ou te folafola atu ia te outou o isi mea uma o le a talafeagai lelei pe afai e te faamuamua le Alii.
Atonu e te mafaufau: E faapefea ona avea le manatu faavae o le alofa o le Atua e le mafaatusalia e avea ma ute o o outou olaga, lau tapuaiga, ma lou tuuto? Na faasino mai e Iosua ia i tatou le ala, e pei ona ia faasino atu i tagata Isaraelu. Se’i mafaufau faatasi ma a’u i ana auala e fā e mafai ona e faaalia ai lou alofa i le Atua.
1. Savali i Ona Ala Uma
E te savali i Ona ala uma pe a e faatinoina le lotomaualalo, faatuatuaina, faatuatua, onosai, ma le lototele e pei o i latou o e na feoai solo mo le fa sefulu tausaga. Sa taofimau e faitaulaga le atolaau o le feagaiga—o se faatusa o le Atua—ma faatasi ai ma le faatuatua, sa latou laa atu ai i totonu o le vai. O oe foi, o le a tatau ona galueina le faatuatua ma le faalagolago i le Alii a o e feagai ma faafitauli e pei o le vai loloto lea e foliga mai e faafitia ai lou alualu i luma. Ae sa savavali atu le fanauga a Isaraelu i luga o le eleele matutu, ma o le faatasi ai o le Alii i ou tafatafa, i se faaupuga faafaatusa, o le a faapea foi ona e faia.
O le ola ai i le talalelei e le o se savalivaliga i se auala—lautele, lamolemole, ma mafolafola. Atonu e te le fetaiai ma vaitafe, ae o le a e feagai ma luitau e taufaafefe. Manatua, o lou alofa i le Atua e mafai ai ona valaauina ai vavega e faamanuia ai oe.
Tou te savavali i Ona ala pe a outou popole i mea e popole i ai o Ia.
E te savali i Ona ala pe a e tumau i le ala o feagaiga, e te le uia ni auala ’alo ma ni auala i autafa. O le tuuina o feagaiga i le totonugalemu o o outou olaga o le a fesoasoani ia te outou e liliu ese ai mai mea faalavefau, taufaasese, ma e oo lava i le faavaivai o ou faalagona o loo vagevagea oe, ma toso ese ai oe mai le ala o le Atua ma Ona aao alofa.
2. Tausi Ana Poloaiga
Ina ua vaai atu tagata Isaraelu manumalo ua pauu puipui o Ieriko, sa fai atu Iosua, “Ua tuuina mai e le Alii ia te outou le aai.” A o le’i faia le osofa’iga, na faamanino mai e Iosua e faapea, o le a leai ni mea e faoa, ma e leai se mea e aveesea mo le manuia o le tagata lava ia.
Sa mumū le toasa o le Alii e faasaga i le fanauga a Isaraelu ma sa le manuia la latou osofaiga i le aai o Ai ona o le solia o le poloaiga ia aua nei gaoi. Ina ua uma ona aveesea le au le usiusitai, sa faatasi le Alii ma i latou, ma sa faamanuiaina le isi a latou taumafaiga.
Na aoao mai Peresitene Nelson, “O tulafono a le Atua e uunaia atoatoa lava e Lona alofa le mafuatia mo i tatou ma Lona finagalo ia tatou avea uma ma tagata e mafai ona tatou avea ai.”
3. Pipiimau ia te Ia
A e pipii atu i le Atua e tumau lou latalata atu ia te Ia, e te lagonaina o Ia, ma e te lagonaina faaaliga mo na o oe lava. O le faalogo i Ana afioga, ua e saunia ai e fetaiai ma soo se mea e oo mai.
Na saunoa mai Peresitene Nelson e faapea, a o tatou saili e avea ma “soo o Iesu Keriso, o a tatou taumafaiga ia faalogo ia te Ia e manaomia ona matuā faia ma le faamoemoe sili i ai. E manaomia ai le lotofuatiaifo ma taumafaiga tumau e faatumu o tatou olaga i aso taitasi i Ana afioga, Ana aoaoga, Ana upumoni.”
E pito sili ona malosi lo’u lagonaina o Ia i lo’u olaga pe a ou faitauina tusitusiga paia ma faalatalata atu i le Alii ma Ana folafolaga.
Ou te folafola atu ia te outou i le asō afai tou te pipii atu i le Alii ma Ana faaaliga, o le a outou vaaia vavega o le a faatulagaina ai lo outou ala ma faatumauina ai lo outou latalata atu ia te Ia.
4. Auauna atu ia te Ia ma Lou Loto Atoa ma Lou Agaga Atoa
O le manatu lona fa ma le mulimuli mai ia Iosua o le “auauna atu ia te Ia ma lou loto atoa ma lou agaga atoa.”
“Pe tou te fia o ese foi?” Na fesili atu ai Iesu iā Peteru i se tasi taimi. Na tali mai Peteru, “Le Alii e, a matou o ea ia te ai? o ia te oe upu o le ola e faavavau.” Ou te fesili atu ia te outou, “Pe tou te o ese foi?” Pe a e fetaiai ma ni faafitauli faigata pe i ai ni au fesili, pe e te sailia au tali mai le Alii ma Ana auauna? Pe e te alu i le initoneti? Pe o le a e auauna atu i le Alii, pe o le a e faavaivai?
E faapefea ona e auauna atu ia te Ia ae o loo foliga mai ua vevesi mea uma o loo siomia ai oe? E maua le tali i le auauna atu i isi. Ua ou talitonu, a o ou toe tepa i tua i lo’u olaga, o lena auaunaga aemaise lava i lo’u aiga ma le Ekalesia o se tasi lea o faamanuiaga silisili i le mamanuina o au.
Pe afai o lou alofa i le Atua le mafuaaga o lau auaunaga, mea e fiafia i ai, mea e faamuamua, ma le alofa, e faamanuiaina oe, ma e i ai le olioli i na faamanuiaga.
Filifili e savavali i Ona ala, mulimuli i Ana poloaiga, pipii atu ia te Ia, ma auauna atu ia te Ia. O le ala lenei i le ola e faavavau ma le fiafia i le afioaga o le Tama.