Na o Tusiga Faatekinolosi
O Aafiaga e 2 na Aoaoina Ai A’u e Tutusa le Alofa o le Atua i Tagata Uma
E faatauaina ma talisapaia i tatou e lo tatou Tama Faalelagi o ni tagata taitoatasi, pe ua faaipoipo pe nofofua.
Saunia e Minerva Teichert
I lo’u olaga atoa, e tasi le mataupu faavae na fesoasoani ia te a’u e maua ai le fiafia e tusa lava po o a o’u tulaga: o le faamautinoaga e alofa le Atua ia te a’u ma e finagalo i le mea sili mo a’u. Se’i o’u faamatala atu.
Sa faamuamua e o’u matua taimi faaleaiga a o matou laiti ma o’u uso e toalua. O lea la ua avea i matou ma tagata matutua, o loo faaauau pea lenei mea o se vaega o tu masani faaleaiga. O le taimi matou te faaaluina faatasi e mālie ma e tumu i tu ma aga masani e pei o tuuga ma taaloga, faatasi ai ma mea e tutupu e aofia ai se togi o le tortilla ma se tauvaga feula puta.
A o ou tuputupu ae, sa ou maua le lototele e faaalu ai le taimi ma lo’u aiga ma lagona ai sa taua a’u. Sa ou lagonaina o a’u saofaga sa manaomia ma moomia. Ae peitai, e lei leva ona ou toe foi mai mai la’u misiona, ae suia le faaaluina faatasi o le taimi. O le mafuaaga: na faaipoipo lo’u uso matua i ni nai masina ae ou te lei toe foi mai i le fale.
Sa ou fiafia mo ia ma fiafia i le mauaina o se tuagane mo le uluai taimi. Ae sa ou matauina le amata ona ese le taulimaina o i maua ma lo’u uso laitiiti e o’u matua. Sa ou lagonaina ona ou te le’i faaipoipo, sa tulei ese ai a’u ma taulimaina e pei o se tamaitiiti. Mulimuli ane, sa ou talanoa i o’u matua e uiga i suiga i lo matou aiga. Na matou faaiuina e lē fesoota’i o matou tulaga taitoatasi ma o matou taua. E taua tagata uma i lo matou aiga, e tusa lava po o le a le matua, itupa, tulaga tautupe, taleni, po o le tulaga faale-faaipoipoga.
Na tatala lo’u mafaufau i le manatu e alofa ma talisapaia i tatou taitoatasi e lo tatou Tama Faalelagi. E finagalo le Tam Faalelagi ia tatou faatuina ma faafailele ni sootaga malolosi faaleaiga, ae o lo tatou taua faaletagata lava ia e le sau mai o tatou aiga. Ona o i tatou o fanau faapelepele a le Atua ma o se vaega o Lona aiga, o lo tatou taua e le iu ma e faavavau. Na faaalia e Iesu Keriso lenei mea e ala i le tuuina atu o Lona soifua mo i tatou taitoatasi. (Tagai i le Mataupu Faavae ma Feagaiga 18:10–11.)
Sa uunaia i tatou e Elder Alan T. Phillips o le Fitugafulu ina ia “iloa po o ai outou. Ia iloa lou faasinomaga paia moni. O le fuafuaga o le fiafia a le Atua e faatatau uma ia te oe. O oe o Lona atalii/afafine faapelepele ma e taua tele. Na te silafia ma alofa ia te oe.”
A o mavae atu tausaga ma faaputuina aafiaga o lo’u olaga, sa amata ona ou vaaia faamaoniga o le alofa o le Atua mo tagata uma na siomia au, ae ou te lei faamoemoeina pe iloaina i taimi uma Lona alofa mo au lava ia. Sa ou fesiligia lo’u taua o se tagata.
Pe na Faaitiitia Lo’u Agavaa?
Ia Iulai o le 2008, sa ou lagona ai le uunaiga malosi e tuua se galuega sa le toe lelei mo a’u. Sa leai se isi a’u galuega, ae o le amataga o la’u matātā ma sa foliga mai e leai se faatapulaa o filifiliga. Ma le isi, ona o la’u uunaiga, sa ou mautinoa ai o le a fesoasoani le Tama Faalelagi ia te a’u e saili le avanoa sa’o.
I ni nai vaiaso mulimuli ane, na oo ai le lalolagi i se faafitauli tau tupe ma ua faateteleina le fua o le leai o ni galuega. A o mavae atu vaiaso ma masina, sa amata ona ou popole. Sa ou faalogo i tala nutimomoia o tamā ma tina ua leai ni a latou galuega. Sa ou nofofua ma sa leai se tasi na faalagolago mai ia te au, o lea sa ou mafaufau ai pe e sili atu ona manaomia ma tatau ai mo isi ni galuega nai lo a’u.
I se tasi po, sa ou aveina atu ai o’u popolega i le Alii. Sa ou fai atu ia te Ia ou te manaomia se galuega e tausia ai a’u lava ae sa mafai ona ou iloa atu sa i ai ni aiga sa sili atu ona manaomia le fesoasoani. Sa pei lava sa ou vaai faalemafaufau i tagata uma o loo laina e maua faamanuiaga a le Alii, ma ona sa ou nofofua, sa faamoemoeina ia ou faataga aiga ia muamua atu i o’u luma.
A o ou tatalo, sa aoaoina a’u e le Agaga e le o le mea lea sa faamoemoeina mai ia te a’u. E leai se laina e oo atu ai i lo tatou Tama Faalelagi. Ua Ia valaaulia Ana fanau uma e o mai ia te Ia aua “ua tutusa uma lava i latou ia te Ia” (2 Nifae 26:33). Na matua manino lava le manatu i lo’u mafaufau e faapea, e le faatapulaaina le Tama Faalelagi i soo se tulaga o lo tatou lalolagi ma o le a fesoasoani o Ia i tagata taitoatasi uma e o mai ia te Ia ma Iesu Keriso.
I lena taimi, sa faamanatu mai ai ia te au e leai se faiga faavasega i fanau a le Tama Faalelagi. Na te faamanuiaina i tatou a o tatou filifili e osia ma tausia feagaiga ma Ia ma Iesu Keriso. E alofagia ma taua i tatou uma ia te Ia, e tusa lava po o fea o tatou i ai i le ala o le feagaiga.
Ma e lei leva, ae ofoina mai ia te au se galuega e tuu ai la’u matātā i le ala o loo i ai nei.
“E taua i tatou i le Atua e le ona o lo tatou lisi o aafiaga ma tomai ae ona o i tatou o Ana fanau,” o le saunoaga lea a Elder Dieter F. Uchtdorf o le Korama a Aposetolo e Toasefululua. “E alofa o Ia ia i tatou uma, e oo lava ia i latou o e sese, teenaina, faafaigata, faanoanoa, pe nutimomoia.”
Ou te taumafai e vaavaai mo tulaga, matau lagona, ma manatua aafiaga na faamanatu mai ai ia te a’u le alofa o le Atua mo a’u. E faigata i se lalolagi, ma o aso uma lava e foliga mai e aumaia ai se tauiviga fou. O lo’u taula’i atu pea i le alofa o le Atua mo a’u, e fesoasoani ia ou fiafia ai ai e tusa lava po o ā o’u tulaga. Pe a tietie i se uila, o le a e agai atu i le mea o loo e tilotilo i ai. Ou te filifili e taula’i atu i le alofa o le Atua ma taitai atu lo’u olaga i ai aua ou te iloa o a’u o Lona afafine pele.