Digital Lamang: Mga Young Adult
Gihimo na Nako ang Espirituhanong Buluhaton. Kanus-a Moabot ang Akong mga Panalangin?
Mahimong sayon ra nga makabaton og “dihadiha nga mga panalangin” nga panghunahuna kon kini kabahin sa atong relasyon sa Langitnong Amahan.
Pipila ka tuig nang milabay, anaa ko sa usa ka makapaguol kaayo nga sitwasyon nga lahi ang resulta kaysa akong gilaoman. Naguol ko ug nadismaya tungod kay gibati nako nga sakto ang pagkabuhat nako sa tanan.
Seguro daghan nato ang mibati usab og sama niini kaniadto. Usahay maghulat kita sa Langitnong Amahan alang sa mga tubag, ug kon nagpuyo kita nga matarong, mahimong sayon ra kaayo ang paghunahuna nga ang mga solusyon moabot sa dili madugay.
Apan kon ang mga butang mahitabo nga dili maoy atong gilaoman, sayon ra kaayo nga mobati og pagkahugno, pagkadismaya, ug gani nakalimtan.
Atol niadto nga mga higayon, atong makat-onan kon unsa gyod ang buot ipasabot nga mosalig sa Ginoo.
Naghulat sa Ginoo
Nagpuyo kita sa kalibotan nga anaa dayon ang katagbawan. Kon kita adunay pangutana, mahimo natong gamiton ang Google ug makadawat dayon og tubag. Kon kita laayon, mahimo kitang makakita dihadiha dayon og walay kataposang mga video feed sa social media. Mao nga sayon ra kaayo nga makabaton niining “dihadiha nga mga panalangin” nga panghunahuna kon kini kabahin sa atong relasyon sa Langitnong Amahan.
Tingali makaplagan nato ang atong kaugalingon nga maghunahuna, “Gihimo na nako ang buluhaton, mao nga asa ang akong mga panalangin?” Ug kita tingali mas mobati og kalagot ug pagkadili kontento samtang magkadugay ang atong paghulat nga moabot kadto nga mga panalangin.
Apan sama sa gitudlo ni Elder D. Todd Christofferson sa Korum sa Napulog Duha ka Apostoles:
“Kita kinahanglan nga dili maghunahuna sa plano sa Dios nga sama sa cosmic vending machine diin kita (1) mopili sa gitinguha nga panalangin, (2) mosuksok sa gikinahanglan nga gidaghanon sa maayong mga buhat, ug (3) ang gi-order moabot dayon.
“… Kita maningkamot sa atong labing maayo apan kinahanglan nga itugyan ngadto Kaniya ang pagdumala sa mga panalangin, temporal ug espirituwal.”
Kon ang kinabuhi dili mao kon unsay akong gilaoman, nakigbisog gyod ko! Gibati nako nga angayan gyod ko sa mga panalangin tungod sa pagka-matinud-anon. Unsa may kapuslanan sa pagkahimong matinud-anon o masulundon kon balewala ra diay ang tanan? Gisulayan ba sa pagpugong sa Langitnong Amahan ang maayong mga butang ngari kanako?
Apan kon akong hunahunaon ang mahitungod kon giunsa sa Langitnong Amahan pag-atiman ug paghigugma ang matag usa sa Iyang mga anak, nakahibalo ko nga kini nga mga hunahuna dili tinuod. Akong naamgohan nga ang pagpili nga mosalig sa Langitnong Amahan kon maayo lang nga mga butang ang nanghitabo sayon ra.
Kadtong mahagiton nga mga higayon nga dili kita kanunay nga andam ang makapahimo sa pagsalig Kaniya nga mas makahuloganon, mas makapalunsay, ug mas gamhanan.
Alang sa Atong Kaayohan
Kanunay nga adunay mga kahigayonan nga ang mga panalangin nga gusto kaayo nato dili moabot dayon sama sa atong gilaoman. Apan kon kita nagbuhat sa atong labing maayo nga molakaw sa dalan sa pakigsaad, kita kanunay nga makasalig nga kita anaa sa mga kamot sa Langitnong Amahan ug nga Siya nakakita sa unsay mahitabo.
Ang nakahatag nako og dako nga kalipay samtang ako naghulat mao ang pagkahibalo nga ako balaanon nga anak sa Langitnong Amahan ug nga ako adunay Manluluwas nga nakasabot sa tanan mahitungod kanako. Sa matag kalisod nga akong giagian, kon ako mopili nga motutok sa akong mga pakigsaad, bation nako ang Ilang hingpit nga gugma ug makahinumdom nga anaa sa Ilang kasingkasing ang akong kaayohan.
Si Elder Gerrit W. Gong sa Korum sa Napulog Duha ka Apostoles bag-ohay lang mipamatuod, “Kon kita mosalig sa Dios ug sa Iyang gugma alang nato, bisan ang atong hilabihan nga mga kasakit, sa kataposan, magkahiusa sa paglihok alang sa atong kaayohan.”
Kana tinuod alang nako. Bisan unsa pa man ka luya ang akong gibati, mobati ko og kalipay sa pagkahibalo nga ang plano sa Langitnong Amahan hingpit. Samtang misalig ko sa Manluluwas, Siya makatabang nako nga tugotan ang lisod nga mga butang sa kinabuhi nga molig-on sa akong pagtuo.
Pagpili nga Mosalig
Kon ikaw nakigbisog nga magpabiling positibo o malaomon samtang naghulat ka alang sa pagpadayag ug sa gisaad nga mga panalangin, nakahibalo ko unsa ang imong gibati.
Apan nakahibalo usab ako unsa kagamhanan ang pagpili nga mosalig. Pakig-istorya sa Langitnong Amahan, pakigkonektar Niya ug ni Jesukristo matag adlaw, ug imong makita nga ikaw wala mag-inusara. Sila kanunay nga naggiya nimo sa eksakto nga direksiyon kon ikaw magpadayon sa pagdangop ngadto Nila.
Tugoti ang imong kasingkasing nga andam sa paghulat sa Ilang perpekto nga tayming.
Sila wala makalimot nimo.